Wjace hač 600 eurow pokuty płaćić dyrbi kóždy z 30 wěriwych, kotřiž běchu so najebać płaćiwe wobmjezowanja koronawirusa dla w awstralskim Sydneyju na Božej słužbje wobdźělili. Cyrkwi běchu pokutu 3 000 eurow napołožili. Awstralska je korony dla wot měrca 2020 w dalokej měrje izolowana. W městach kaž Sydneyju knježi kruty lockdown. Protesty ludźi pak mjeztym přiběraja.
W stajnej alarmowej hotowosći je wobsedźerka alpaki Geronima, po tym zo je sudnistwo doskónčnje wukazało zwěrjo morić. Geronimo je dwójce na natykliwu tuberkulozu testowany. Jeho wobsedźerka Helen Macdonald pak testam njewěri a ma Geronima za stroweho. Dyrbjało-li „komando mordarjow“ na jeje statok přińć, nochce so wona zakonjej spjećować. „Potom pak móže cyły swět bjezzmyslnemu morjenju přihladować.“
Hišće w prawym času přeprošenje na dźěćace narodniny dóstał je hólc w Augsburgu – dźakowano policistam. Kriminalna policija bě pad pokradnjenych listow přepytowała a tójšto wočinjenych posyłkow namakała. Mjez nimi bě tež přeprošenje. Bychu-li zastojnicy list z póštu dale słali, njeby přeprošenje wjace w prawym času dóšło. Tuž přiwjezechu je wosobinsce.
Samotwarjene kabrio je francoska policija sćazała. Muž bě z pomocu piły swój 20 lět stary Citroën Xantia přetwarił a třěchu prosće wotrězał. Policisća njewšědne jězdźidło na awtodróze A 20 do směra na atlantiski pobrjóh zadźeržachu a wotpowědujo předpisam sćazachu. Z tym zbudźichu tež tójšto kritiki. Ludźo njerozumja, zo so policisća z tajkim „problemom“ zaběraja, město toho, zo bychu woprawdźitych kriminelnych přesćěhowali.
Hač do dźensnišeho wječora ma plahowarka Helen Macdonald chwile, k smjerći zasudźeneho alpaku „Geronimo“ sama morić. Tole je britiske sudnistwo rozsudźiło. Geronimo je pozitiwnje na chětro natykliwu chorosć testowany. Wobsedźerka bě wospjet sudnisce spytała, so wukazanemu zasparnjenju zwěrjeća wobarać. Mjeztym na statoku žony aktiwisća přećiwo morjenju alpaki protestuja.
Chětro bolostnje skónčiła je so ležaca wuměłska instalacija 41lětneje Awstričanki wosrjedź Salzburga. Kaž policija zdźěla, měješe 71lětny šofer awta na dróze ležacu žonu za klanku z wukładneho wokna a so za to rozsudźi, zadźěwk přejěć. Jako słyšeše wukřik, wosta stejo. Pěšcy žonu pod awtom wućahnychu a dowjezechu ju do chorownje. Šofer dyrbi z chłostanjom ličić. Dotal njewědźa, hač měješe žona za performance dowolnosć.
Spěšnje ke kóncej bě dowolowa jězba z traktoromaj a připowěšakom za dweju 16lětneju w Allgäuju. Policija planowanu 18 hodźin trajacu jězbu z Kaufbeurena do Würzburga po někotrych kilometrach přetorhny. Młodostnaj měještaj drje jězbnu dowolnosć za traktory, z njej pak smědźa jenož ratarske a lěsniske dźěła wukonjeć, jimaj zastojnicy rozłožichu. Poprawom chcyštaj młodostnaj stanować.
Swojemu wobsedźerjej žiwjenje wuchowała je kóčka w francoskim Straßbourgu. Susodźa běchu policiju wołali, dokelž bě kóčka hižo tři dny sama na werandźe. Jako zastojnicy přez wotewrjene wokno do bydlenja zalězechu, wuhladachu wučerpaneho wobsedźerja na zemi ležo. Muž bě so zwjezł a njemóžeše sej hižo pomhać. Jeho dowjezechu do chorownje, kóčku do zwěrjatownje. Bjez lěkarskeje pomocy by muž drje zemrěł.
W padźe k smjerći zasudźeneho alpaki Geronimo čerpaja w Jendźelskej zaso nadźiju. Britiske wobswětowe ministerstwo je rozmołwje z wobsedźerku přizwoliło. Do toho bě knježerstwo wotpokazało, wo wukazu zasparnjenja alpaki diskutować. Pola zwěrjeća běchu natykliwu howjadowu tuberkulozu zwěsćili. Mjeztym něhdźe 30 aktiwistow ratarski statok na zapadźe Jendźelskeje wobstražuje, zo bychu morjenju alpaki zadźěwali.
Žane zbožo njeměješe paduch w Berlinje, jako chcyše wobchod debjenkow w měšćanskim dźělu Wilhelmstadt wurubić. 44lětny bě do wobchoda přišoł a wobsedźerja a předawarku z trašawku wohrožował. 70lětnemu wobsedźerjej so poradźi, alarmowy knefl tłóčić, jako skućićel za debjenkami we witrinje hrabaše. Policisća jeho hišće we wobchodźe zajachu a 380 rubjenych wěcow zawěsćichu.
Dale zjawnje prezentna wostanje Angela Merkel tež po zakónčenju swojeho kanclerskeho zastojnstwa – byrnjež jenož jako dohodowny kurjačk. Tole zdźěla zawod za ludowe wuměłstwo w rudnohórskim Seiffenje. Zhotowić chcedźa 14 centimetrow wulku postawu z typiskim dźerženjom rukow we wjacorych barbach. Spočatnje chcedźa 300 eksemplarow zhotowić, połojca z nich je hižo předata.
Zmužiće a rozsudźeni su ludźo na kupanskim brjoze w Španiskej pomhali, dweju wikowarjow z drogami zajeć. Kriminelnaj běštaj ze spěšnočołmom před policiju ćěkałoj a z wotmachom na pobrjóh zajěłoj, zo byštaj pěši ćeknyłoj. Daloko pak na brjoze pola městačka Melicena na juhu kraja njepřińdźeštaj: Wjace hač dźesać muži a žonow jednoho z jeju wobkruži a zaja. Druheho runje tak. W čołmje bě 800 kilogramow hašiša.
„Najsylniši muž Němskeje“ pochadźa z Badensko-Württembergskeje. Dennis Kohlruss z badenskeho Rastatta je sej we wuchododurinskej Gerje požadany titul zdobył. 33lětny bě so wčera w finalu přesadźił. Cyłkownje 26 sportowcow z nimale wšitkich zwjazkowych krajow bě so dwaj dnjej wubědźowało. Při tym dyrbjachu mužojo před mnohimi přihladowarjemi mjez druhim nakładne awta ćahać.
Z přetwarjenym trawusyčakom je pod wliwom drogow stejacy muž po porynsko-pfalcskim Münchweileru jězdźił a so do policajskeje kontrole dóstał. Šofer, kiž njeměješe jězbnu dowolnosć, dyrbješe krej wotedać. Samotwarjene jězdźidło policisća sćazachu. Muž bě trawusyčakej třěchu, wokno, radijo a wótřerěčak přitwarił a spěšnosć manipulował. Hač by jězdźidło dowolnosć za nadróžny wobchad dóstało, je dwělomne.
Z helikopterom k lodarni lećał je 34lětny w Kanadźe, zo by tam lodowu tortu kupił. Wón přizemi na wjele wužiwanym parkowanišću před wobchodom w městačku Tisdale w centralnej Kanadźe. Z helikoptera wulěze žona, kotraž poda so do lodarnje a tam tortu kupi. Dokelž njejednaše so wo nuzowe přizemjenje, dyrbi so 34lětny nětko před sudnistwom zamołwić, byrnjež licencu za mašinu měł.
Zabyteho handyja dla móžachu w Frankfurće nad Mohanom paducha awta zajeć. 26lětny sedźeše hižo we wozu, kotryž chcyše pokradnyć, jako jeho wobsedźer lepi a narěča. Na to paduch twochny. Jako wobsedźer z policiju telefonowaše, so paduch nawróći, dokelž bě swój mobilny telefon w awće ležo wostajił. Muž pak skućićela kruće dźeržeše, doniž policija njepřijědźe. Při sebi měješe wón spakosćenu žonjacu tobołku.
Nowu złotu medalju dóstanje japanska olympiadnica Miu Goto, po tym zo bě měšćanosta jeje ródneho města Nagoya Takashi Kawamura při witanju sportowcow w radnicy města do medalje kusnył. To je organizaciski komitej rozsudźił. Goto bě měšćanosće swoju złotu medalju wokoło šije powěsnyła, na čož 72lětny trofeju do ruki wza a do njeje kusny. Wobrazy sceny zbudźichu rozhorjenosć. Kawamura je so mjeztym zamołwił.
Nuznikowy připowěšak za prominentnych su w Hornjej Frankskej pokradnyli. Něhdźe 40 000 eurow drohi připowěšak běchu na zarjadowanju mebloweho wobchoda w Kulmbachu wužiwali a po tym při dróze wotstajili. Jako chcychu jón nazajtra wotewzać, bě wón preč. Za transport tajkeho připowěšaka wšak je wjetše nakładne awto trěbne. Policija nětko za swědkami pyta.
Kóčku z palaceho bydlenja wuchowała je wohnjowa wobora w Frankfurće nad Mohanom. Do toho bě w kuchni wjaceswójbneho domu woheń wudyrił. Wobydlerjo móžachu dom hišće wopušćić, jenož kóčka wosta w palacym bydlenju. 17lětna dźowka podarmo za njej pytaše a dyrbješe skónčnje bjez swojeje micki z bydlenja. Wohnjowa wobora ju skónčnje namaka. Dokelž bě so z kurom zajědojćiła, dósta wona samo kislikowu masku.
Zo by wutrajnosć baterije pruwował, je muž ze swojim e-scooterom po awtodróze A 2 jěł. Policija jeho zadźerža, po tym zo běchu jej to wjacori šoferojo přizjewili. Zastojnikam 24lětny rjekny, zo je elektriski roler dźeń do toho kupił a zo chcyše wědźeć, kak dołho aku dźerži. Zo njesmě na awtodróze scyła jězdźić, njebě jemu znate. Dokelž njeměješe předpisane zawěsćenje za roler, dyrbješe dale nóžkować.