To a tamne (25.09.17)

póndźela, 25. septembera 2017 spisane wot:

Z drastiskimi kubłanskimi metodami spyta Thailand nětko swoju statistiku njezbožow pozitiwnje wobwliwować. Dokelž pokuta abo jatba skućićelow njezatrašatej, tam wopitych šoferow hinak chłostaja. Sćelu jich do ćěłownjow, zo bychu na swojej woči widźeli, što móhli ze swojim zadźerženjom zawinić. 7 000 ludźi je tajke chłostanje hižo přešło.

Dźiwinje znjemóžnić so něhdźe chować je jedna metoda, kak móhli jich wobstatk pomjeńšić. Japanscy burja pasu swoje kruwy na njewobdźěłanych płoninach. Tak njemóža so tam sorny, jelenje­ abo dźiwje swinje wjace we wy­sokej trawje chować. Kurioznu ideju zrodźi­ ratar na połkupje Hokkaido a je na polu mobilnu rězarnju zarjadował. Zatřělenu dźiwinu móže tuž hnydom na městnje předźěłać.

To a tamne (22.09.17)

pjatk, 22. septembera 2017 spisane wot:

Willy Brandt je tři dny do wólbow zwjazkoweho sejma do SPD zastupił. To njeje žadyn wólbny žort. 23lětny muž, kotrehož je socialdemokratiska strona nětko přijała, ma samsne mjeno kaž štwórty zwjazkowy kancler. Podobnaj pak sej wobaj scyła njejstaj. Młody Willy Brandt ma brodu a je cyle ležernje w sportowych črijach a puliju na fotowy termin přišoł.

Policajski rewěr z póstowym zarjadom zaměnił je 65lětny w Pforzheimje. W jeho wočomaj wosta to hač do dźensnišeho dnja póst. Bjez jeničkeho słowa połoži wón paket na tejku a wočakowaše wot muža w uniformje, zo swoje dźěło čini. Na prašenje zastojnika, što ma z pakćikom činić, muž wotmołwi, zo ma jón wróćo pósłać. Policist pak jemu rozkładźe, zo njemóže paket přiwzać. Muž widźeše kurioznu situaciju z humorom a wopušći policajski zarjad z posměwkom.

To a tamne (21.09.17)

štwórtk, 21. septembera 2017 spisane wot:

Z papjerjanej, přez hłowu sćehnjenej titu je 45lětny w Bardowicku pola Lüneburga nakupować šoł. Nochcyše spóznaty być, dokelž měješe zastup do wobchoda zakazany. Přiwšěm njeje so muž tež tónkroć zadźeržał. Wón dźěše runu smuhu k polcy spirituozow, hdźež hnydom wino z kartonka piješe. Personalej je maskěrowany lačny muž wězo napadnył. A tuž ma nětko jednanje na šiji: kaženja domjaceho měra a padustwa dla.

Tobołku ze 14 000 eurami w podzemskej železnicy zabyła je 78lětna žona, kotrejž napadny to hakle mjeńšiny pozdźišo, po tym zo bě hižo wulězła. Pjenjezy pak běchu po dołhim pytanju sobudźěłaćerjow wobchadneho předewzaća fuk. Hač bě bankowki něchtó pokradnył, njemóžachu tam rjec. Dóstała je je staruška potom tola zaso. 16lětna ćěkanča z Iraka bě tošku z pjenjezami namakała, a jeje mać dowjeze je na policiju.

To a tamne (20.09.17)

srjeda, 20. septembera 2017 spisane wot:

Hoberski monster tuka a wotpadkow, kotryž je Londonski wopłóčkowy kanal zatykał, ma so na biodiesel předźěłać. Hač do 10 000 litrow ćěriwa móhło z toho nastać. Tež Londonski měšćanski muzej­ chce hižo dźěl 130 tonow ćežkeje a 250 metrow dołheje hromady tuka jako wustajenski objekt měć. Mjeztym ma tónle monster hižo někotre mjena, kaž na přikład Fat the Ripper.

Šrot město rězka a běrnjaceje solotje je sej 25lětny w Ludwigshafenje kupił. Młody muž bě sej nowu kuchnju popřał. Dyrbješe pak ju najprjedy raz natwarić, štož bě jemu po wšěm zdaću chětro wulke wužadanje. Hižo někotre dny wón twarješe, ale njeje ani kročałku dale přišoł. Zadwělowanosć přeměni so do njemdrosće, a wón rozbi kuchnju na kruchi. Při tym pokaza wjace talenta. Zbył je z meblow jenož hišće šrot.

To a tamne (19.09.17)

wutora, 19. septembera 2017 spisane wot:

Pokład w nuznikach zaběra tuchwilu statne rěčnistwo w šwicarskim Genfje. Pjenjezy w hódnoće wjacorych dźesaćtysac eurow su na nuznikach města našli. Pozadki toho njejsu dotal znate. Samo toaleta banki bě z titami bankowkow zatykana. Tež w třoch hosćencach mějachu hosćo wjele pjenjez w nuznikach dla ćeže wodu ćahnyć. Statne rěčnistwo pyta nětko za skućićelemi njewšědneje wotstronjowanskeje akcije.

Podarmo na listy čakali su ludźo w durinskim Arnstadće. Wulke mnóstwa póšty z listowych kašćikow su so prawdźepodobnje zhubili. Zašły štwórtk pak lepichu zastojnicy skónčnje 48lětneho, kak je ju z kašćikow wjaceswójbneho domu wudźił. Jako jeho bydlenje přepytachu, nańdźechu tam njeličomne listy z cyłeho města. Póštu wšak ludźo přiwšěm najprjedy raz dóstać njemóža, dokelž je ju policija sćazała.

To a tamne (18.09.17)

póndźela, 18. septembera 2017 spisane wot:

Dźěle hoberskeje dule tuka, kotraž bě wopłóčkowy kanal w Londonje zatykała, chce tamniši měšćanski muzej kupić. „To by jedyn z najwurjadnišich objektow wšěch muzejowych zběrkow Londona był“, wu­zběhny direktorka Sharon Ament w nowinskej zdźělence. Dula móhła wopytowarjow inspirować, zo problemy rosćacych­ metropolow lěpje rozrisaja.

Njewšědny pišćelowy koncert je kantor Wiesbadenskeje cyrkwje na nohi stajił. Tydźeń do wólbow zwjazkoweho sejma zaklinčachu na wčerawšim koncerće twórby pod hesłom Merkel, Lindner a Schulz. Twórby pak njejsu originalni wólbni kandidaća spisali. Kantor Hans Kielblock je za wuměłcami ze samsnym swójbnym mjenom kaž politikarjo slědźił a tajke tež našoł. Tak zaklinčachu wčera twórby Gustava Adolfa Merkela, Wolfganga Lindnera a Hermanna Schulza.

To a tamne (15.09.17)

pjatk, 15. septembera 2017 spisane wot:

Hoberski monster tuka je wopłóčkowy kanal w Londonje zatykał. Dula je ně­hdźe 250 metrow dołha a 130 tonow ćežka, štož wotpowěduje dźesać dwuposchodowym busam. Hłownje wobsteji wona z pjelchow, hadrješćow a stwjerdnjeneho tuka. Wodowe zastaranske přede­wza­će je ludźi hižo namołwjało duli­ mjeno dać. Prěnje namjety nablaku běchu „brexit“, „Trump a „Donald“. Tři tydźenje budźe nětko trać, hoberski monster fachowsce wotstronić.

Štož sy někomu slubił, maš dodźeržeć. Tak je so 62lětny dźěd na swojeho konja sydnył, zo by wot Abenberga do 550 ki­lometrow zdaleneho Münstera jěchał a tam swojeho wnučka w šuli wote­wzał. 23 dnjow je za to zaplanował a jěcha wšědnje 17 do 35 kilometrow. Kóždy šesty dźeń čini přestawku. Wnučk Hannes ma akciju swojeho dźěda za „cool“.

To a tamne (14.09.17)

štwórtk, 14. septembera 2017 spisane wot:

Butry so nichtó wzdać nochce. Na tym tež dale stupace płaćizny ničo njezměnja. A dokelž je butra mjez ludźimi tuchwilu tak požadana, chcyše paduch w Praskej kupnicy 150 kuskow spakosćić. Wěstotny personal pak jeho zadźerža. To wšak njeje jenički tajki pad. Hižo w awgusće bě 30lětny w Karlovych Varach 180 kuskow butry pokradnył. Dokelž pak bě tež hižo do toho w samsnym wobchodźe „aktiwny“ był, jeho policija skónčnje lepi.

Pokradnjenu točawu přez płót z twarskeho wikowanišća „wudźił“ je njeznaty w durinskim Sondershausenje. Do toho bě wón powjaz wokoło mašiny zwjazał a jón na tamny bok přez płót ćisnył. Ně­hdźe 100 eurow drohi nastroj tak bjez wulkich ćežow přez płót sćahny a zminy so na to z awtom. Kedźbliwy swědk pak je wšitko fotografował. Policija so nětko z kurioznym padom zaběra.

To a tamne (13.09.17)

srjeda, 13. septembera 2017 spisane wot:

Mjez łatowej lěsycu a matracu chował je so paduch w Bielefeldźe. Jako policija jeho domske přepyta, twjerdźeše mandźelska, zo 34lětny doma njeje. Zastojnikam pak napadny dźiwne wuhorbjenje na łožu. Jako je dokładnje přehladachu, podhladneho tam lepichu. Nimo toho­ namakachu wšelke pokradnjene debjenki, handy a laptop.

„Nětko wěmy, hdźe bydliš“, rěka w podpismje fota, kotrež je policija třěliła, jako skućićela lepi. Tón bě mjenujcy z twarjenja w Berlinje-Neuköllnje z laserpoin­terom policajski helikopter slepił, štož je jara strašne. Wottam pak je kamera winika fotografowała. 13lětny hólc bě ze staršiskeho bydlenja agěrował. Z wobrazom a mjenowanym podpismom warnuje policija před atakami z laserpointerom. Poprawom hrozy za tajki njeskutk pokuta abo samo jastwo.

To a tamne (12.09.17)

wutora, 12. septembera 2017 spisane wot:

Bankowki w hódnoće 500 milionow su dźěći w bayerskim měsće Regen namakali a přepodachu je nanej, kiž dowjeze je na policiju. Tam wšak so spěšnje wukopa, zo jedna so jenož wo pjenjezy ze zběranskej hódnotu. Běchu to bankowki Reichs­mark, bankowki z NDR a bywšeje Juhosłowjanskeje, potajkim ničo hódne.

Při pospyće njerodź spalić je muž w Durinskej prawdźepodobnje swoju garažu zapalił. Kaž policija zdźěli, chcyše 63lětny z palakom rostliny zničić. Je pak jón mylnje do směra na garažu dźeržał, při čimž so twarjenje hnydom zapali. Nastata škoda: 20 000 eurow.

Zakaza hrajkanja z kompjuterom dla je dźesaćlětny hólčec zasadźenje policije zawinił. Wón mjenujcy ze złobami tak wótře rjeješe, zo su so susodźa nastróžili a zastojnikow zawołali.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND