To a tamne (06.07.21)

wutora, 06. julija 2021 spisane wot:

Z runje jědnaće lětami studij fyziki zakónčił je Laurent Simons na Uniwersiće Antwerpen w Belgiskej, a to z najwyšim wuznamjenjenjom, kaž jeho nan wčera zdźěli. Pachoł trjebaše dobre lěto za maćiznu, za kotruž liča normalnje tři lěta. Kwantowa fyzika jeho wosebje zajimuje. Nětko chce hišće masterski studij zmištrować a potom doktorske dźěło pisać. Laurent je wulce nadarjeny a bě hižo z wosom lětami maturował.

Dlěje hač 35 lět bjez płaćiweje jězbneje dowolnosće z awtom jězdźił je 56lětny muž ze sakskeho Mockrehna, kaž so při wobchadnej kontroli wukopa. Tam policija zwěsći, zo bě muž wotydźenja časćišo z awtom na dźěło jězdźił a wužiwaše je tež za priwatne jězby. Jeho 1985 w bywšej NDR wupisana jězbna dowolnosć płaćeše pak jeničce za moped a traktor. Nětko drje ma z chłostanjom ličić.

To a tamne (05.07.21)

póndźela, 05. julija 2021 spisane wot:

Na wšě 300 000 awtowych kilometrow zalutował je Robert Grein z badensko-württembergskeho Wertheima, dokelž hižo 30 lět wšědnje z čołmom na dźěło jězdźi. Za 15 mjeńšin je wón na tamnym pobrjoze Mohana w Bayerskej a jědźe wottam z kolesom poslednje kilometry hač na dźěło, wón rozprawja. Wosebje pozbudźace jemu je, hdyž rano w pjećich na rańšu změnu wotjědźe a słónco schadźa. Do wody padnył hišće ženje njeje.

76 hotdogow w běhu dźesać mjeńšin zjědł je dobyćer minjenych lět Joey Chestnut na tradicionalnym napřemojědźenju w New-Yorkskim wólnočasnym parku Coney Island a je tak swój lońši rekord wo jedyn hotdog polěpšił. Chestnut je wubědźowanje mjeztym 14. króć dobył. Na druhe městno přińdźe Geoffrey Esper z 50 kołbaskami w całće. Pola žonow doby Michelle Lesco z 31 hotdogami.

To a tamne (02.07.21)

pjatk, 02. julija 2021 spisane wot:

Wjace hač 30 króć nuzowe čisło wolił je sydomlětny hólc w Mnichowje a zawini tak zasadźenje policije. Pachoł bě tak mjenowanu smartwatch wužiwał – naručny časnik, z kotrymž móžeš tež telefonować. Zastojnicy podachu so na to k městnu, hdźež hólčec bydleše. Tam so wukopa, zo bě smartwatch k narodninam dóstał, zo pak njemóžeše ju hišće posłužować.

Z kašćikom piwa je wonkowny minister Heiko Maas swój dołh pola Britow zarunał. Wón bě so z britiskim kolegu w zastojnstwje Dominicom Raabom sadźił, zo Němska na koparskich EM přećiwo Jendźelskej dobudźe, čemuž wšak na kóncu tak njebě. Po poražce 0:2 we Wembleyjowym stadionje Maas kašćik piwa we wulkopósłanstwje Wulkeje Britaniskeje woteda. Tam přizna, zo je sej z Raabom w mjezynarodnych prašenjach poprawom pře­zjedny, nic pak w kopańcy.

To a tamne (01.07.21)

štwórtk, 01. julija 2021 spisane wot:

Lubosć k zwěrjatam je pjaneho kolesowarja pječa pohnuła po seklojtej čarje jězdźić. Wón bě so šlinkam wuwinyć chcył, zo njeby je přejěł, kaž policistam rjekny. Swědk bě zastojnikow alarmował, dokelž bě kolesowar cyłu kolesowansku šćežku za sebje trjebał. Test alkohola wunjese, zo drje njeběchu šlinki jenička přičina: Pola muža naměrichu 2,5 promilow.

Kónc němskeje wubranki na europskich koparskich mišterstwach je třećinje wobydlerjow Němskeje wšojedne. To je wuslědk reprezentatiwneho naprašowanja slědźenskeho instituta YouGov mjez 1 731 ludźimi nad 18 lětami. Na prašenje za začućemi po zwrěšćenju mustwa rjekny 35 procentow „zo so wo to njerodźa“. 27 proc. poda, zo „njejsu překwapjeni“. 15 proc. je „jara přesłapjenych“, wosom procentow so „rudźi“ a jenož pjeć procentow je „rozhněwanych“.

To a tamne (30.06.21)

srjeda, 30. junija 2021 spisane wot:

Awto zemrěteje britiskeje princesny Diany je muzej w Chile kupił. Ford Escort bě na wčerawšim internetnym přesa­dźo­wanju přeličene 61 145 eurow wunjesł. Diana bě awto 1981 jako dar k slubej wot princa Charlesa dóstała a wopytowaše jeho­ z Fordom často k polo-hram. Pozdźišo wona awto fanej předa. Diana, ko­traž­ bě 1997 při njezbožu z awtom w Parisu žiwjenje přisadźiła, by jutře, 1. julija, 60. narodniny swjećiła.

Njewšědna spowědź: Njeznaći paduši su cyrkwi w Dormagenje swoju rubiznu wróćili a so z listom pola wosady zamołwili. Kaž policija zdźěli, běchu paduši mi­nje­ny tydźeń swěčnik a jedyn z wo­bra­zow křižoweho puća pokradnyli. Woboje ležeše nětko derje zapakowane zhromadnje z listom před cyrkwju. Pakostnikaj prosytaj wo wodaće za njeskutk, kotryž „sta so pod šwarnym wliwom alkohola“. Policija jeju nětko prosy, so tež pola njeje wosobinsce „wuznać“, štož móhło jimaj při chłostanskim jednanju pomhać.

To a tamne (29.06.21)

wutora, 29. junija 2021 spisane wot:

Wosrjedź jězby z kófroweje rumnosće awta padnyłoj staj mužej w starobje 19 a 24 lět njedaloko bayerskeho Obergünzburga. 19lětneho dyrbjachu zranjeneho w chorowni zastarać. Po prěnich dopó­znaćach bě wosobowe awto njedźelu rano­ tak połne, zo dyrbještaj mužej, kotrajž­ chcyštaj z awtostopom sobu jěć, do wotewrjeneje kófroweje rumnosće zalězć.­ Jako šofer raznje pospěši, padny­štaj wonaj na asfalt. Awto je dale jěło. Policija nětko swědkow pyta.

Sta litrow jabłukoweho sirupa zhubiło je wčera nakładne awto w Frankfurće nad Mohanom. Na lěpjatej maćiznje so wjacore motorske, mopedy a kolesa wobsunychu a znjezbožichu. Tank ze sirupom měješe dźěru. Hakle po pjeć kilometrach Lkw zasta. Wohnjowi wobor­nicy dźěru zapłatachu. Sirup na dróze dyrbjachu z wodu wotmyć.

To a tamne (28.06.21)

póndźela, 28. junija 2021 spisane wot:

Dale žane wujasnjenje nimaja w USA za ně­hdźe 140 zjawow na njebju, kaž z runje wozjewjeneje rozprawy zakitowanskeho ministerstwa wuchadźa. Tak nimaja žanych pokiwow na to, zo tči za mjez­ druhim wot pilotow a mariny USA wobkedźbowanymi „njeidentifikowanymi powětrowymi fenomenami“ minjeneju lětdźesatkow tajna technika Chiny, Ruskeje abo zwonkazemskich swětnišćowych nastrojow. Přiwšěm no­chcedźa to zasadnje wuzamknyć.

Cyła wjes na předań je w Šotiskej. Po­wostanki wsy Lawers ze 17. lětstotka a něšto kraja maja 145 000 eurow wunjesć. W rozwalinach šeri pječa hišće duch wuspěšneje zaprajerki tehdyšeho časa z mjenom Lady of Lawers. Žona bě wjacore podawki wěšćiła, kaž twar ćahow a par­nikow. Posledni wobydlerjo běchu wjes spočatk 20. lětstotka wopušćili.

To a tamne (25.06.21)

pjatk, 25. junija 2021 spisane wot:

Ćelo na awtodróze A 4 je w nocy na štwórtk zasadźenje policije zawiniło. Zastojnicy dyrbjachu A 4 njedaloko wot-jězdki Wüstenbrand do směra na Erfurt dospołnje zawrěć. Skónčnje so poradźi, skoćo popadnyć. Wutoru bě cyłkownje wosom ćelatow ćeknyło. Za někotrymi přeco hišće pytaja. Policija prosy šoferow w regionje wo wosebitu kedźbnosć.

Nimale tři promile alkohola w kreji měještaj wodźerjej nakładneju awtow, jako jeju policija kontrolowaše. 37lětny jědźeše po awtodróze A 2, jako ze swojim Lkw-jom škitne wobhrodźenje po dołhosći něhdźe sto metrow wobškodźi. Šofera pak to njestaraše. Něšto pozdźišo jeho policija kontrolowaše a zwěsći 2,58 promilow. Dalši, 35lětny bě na A 14 do směra na Schwerin po puću, hdźež je chětro njewěsteho jězdźenja dla napadnył. Pola njeho naměrichu 2,96 promilow.

To a tamne (24.06.21)

štwórtk, 24. junija 2021 spisane wot:

Mužej w kostimje spidermana ruku dał je bamž Franciskus a je tak wulku kedźbnosć zbudźił. Maskěrowany muž bě Italčan, kiž w kostimje chorownje wopytuje, zo by tam předewšěm dźěćom wjeselo wobradźił. Tydźenska generalna awdienca 84lětneho Franciskusa wotměwa so mjeztym zaso z wopytowarjemi. Bamž je dawno přećiwo koronje šćěpjeny.

Postawa praženeho prosatka wuskutkuje w Romje wótre diskusije. Wuměłska uniwersita italskeje stolicy bě skulpturu w měšćanskim dźělu Trastevere postajiła, hdźež je wosebje wjele turistow. Tući widźa tam nětko mortwe prosatko z kamjenja, bjez nohow a kaž ke grilowanju zwjazane – tak mjenowanu „porchetta“, tradicionalne pražene prosatko. Zwěrinoškitne organizacije přećiwo postawje raznje protestuja, dokelž maja ju za ranjenje zasadow derjeměća skotu a wšitkich ludźi w Romje.

To a tamne (23.06.21)

srjeda, 23. junija 2021 spisane wot:

Paducha w swojim bydlenju přewinyłoj staj mandźelskaj w Berlinje Charlottenburgu. 27lětny bě pozdatnje z wotewrjenymi durjemi terasy do bydlenja w přizemju zalězł. Mandźelski słyšeše podhladne zwuki a wuhlada paducha, kak je runje nachribjetnik muža přeborkał. Přewiny a dźeržeše jeho, doniž wot mandźelskeje přiwołana policija njepřijědźe. Ta dyrbješe 27lětneho jenož hišće sobu wzać.

Čwěle myšow dla dyrbja na juhowuchodźe Awstralskeje jastwo ewakuować. Naprawa je trěbna, zo bychu strowotu jatych a přistajenych škitali, zdźěli nawodnistwo jastwa njedaloko Wellingtona w staće New South Wales. Hrymzaki su hižo milinowody a izolaciski material wobškodźili. W New South Walesu bědźa so z najhóršej myšacej kwaklu minjenych 40 lět. Zwěrjatka su wosebje w ratarstwje hižo hoberske škody načinili.

Serbska debata

nowostki LND