To a tamne (08.07.21)
Twochnjeny kenguru bě wčera w měsće Delmenhorsće po puću. Kaž rěčnik policije zdźěli, słuša skoćo swójbje. Swědka bě wčera rano policiju alarmowała, jako wuhlada kenguruwa při busowym zastanišću. Zastojnicy spytachu jeho popadnyć, štož pak so jim njeporadźi. Su tež přestali dale za nim pytać. Wšako z jich strony rěkaše: „Dokelž žane wohroženje njewobsteji, njejsmy přisłušni.“
Chětro wopity 56lětny je w běłym kitlu, ze zawobalenym łochćom a do ruki kałnjenej kanilu chorownju wopušćił a tak druhi raz na dźeń zasadźenje policije zawinił. Muž bě wutoru z 3,5 promilemi alkohola w kreji po durinskim Hildburghausenje kolesował. Zazy do wonkowneho špihela awta, padny a so zrani. Za braće kreje a zawobalenje ranow dowjezechu jeho do chorownje, hdźež pak so jemu po wšěm zdaću njelubješe.
To a tamne (07.07.21)
Zatłusnjeneje nohi dla je 76lětny rentnar při wuparkowanju swojeho awta w Neustrelitzu štyri dalše jězdźidła a 25 000 eurow škody zawostajił. Spočatnje bě muž do dweju awtow storčił. Při přešaltowanju pak je z nohu mjez borzdźidłowym a płunowym pedalom awtomatikoweho awta tčacy wostał. Te smaleše na to po parkowanišću a zrazy do dalšeju wozow. Kaž dźiw so nichtó njezrani. Wšako bě tam tójšto ludźi po puću. Awta pak běchu wšitke skóncowane.
Zranjenu wrónu ze štoma wuchowała je wohnjowa wobora w Berlinskim měšćanskim dźělu Rudowje. Něhdźe 20 metrow wysoko bě so ptak w powjazu zapopadnył a zranił. Wobydler wołaše na to pomocnikow, kotřiž přińdźechu z mustwom za wuchowanje ludźi z wulkeje wysokosće. Woni wrónu wuswobodźichu a přepodachu ju skótnemu lěkarjej.
To a tamne (06.07.21)
Z runje jědnaće lětami studij fyziki zakónčił je Laurent Simons na Uniwersiće Antwerpen w Belgiskej, a to z najwyšim wuznamjenjenjom, kaž jeho nan wčera zdźěli. Pachoł trjebaše dobre lěto za maćiznu, za kotruž liča normalnje tři lěta. Kwantowa fyzika jeho wosebje zajimuje. Nětko chce hišće masterski studij zmištrować a potom doktorske dźěło pisać. Laurent je wulce nadarjeny a bě hižo z wosom lětami maturował.
Dlěje hač 35 lět bjez płaćiweje jězbneje dowolnosće z awtom jězdźił je 56lětny muž ze sakskeho Mockrehna, kaž so při wobchadnej kontroli wukopa. Tam policija zwěsći, zo bě muž wotydźenja časćišo z awtom na dźěło jězdźił a wužiwaše je tež za priwatne jězby. Jeho 1985 w bywšej NDR wupisana jězbna dowolnosć płaćeše pak jeničce za moped a traktor. Nětko drje ma z chłostanjom ličić.
To a tamne (05.07.21)
Na wšě 300 000 awtowych kilometrow zalutował je Robert Grein z badensko-württembergskeho Wertheima, dokelž hižo 30 lět wšědnje z čołmom na dźěło jězdźi. Za 15 mjeńšin je wón na tamnym pobrjoze Mohana w Bayerskej a jědźe wottam z kolesom poslednje kilometry hač na dźěło, wón rozprawja. Wosebje pozbudźace jemu je, hdyž rano w pjećich na rańšu změnu wotjědźe a słónco schadźa. Do wody padnył hišće ženje njeje.
76 hotdogow w běhu dźesać mjeńšin zjědł je dobyćer minjenych lět Joey Chestnut na tradicionalnym napřemojědźenju w New-Yorkskim wólnočasnym parku Coney Island a je tak swój lońši rekord wo jedyn hotdog polěpšił. Chestnut je wubědźowanje mjeztym 14. króć dobył. Na druhe městno přińdźe Geoffrey Esper z 50 kołbaskami w całće. Pola žonow doby Michelle Lesco z 31 hotdogami.
To a tamne (02.07.21)
Wjace hač 30 króć nuzowe čisło wolił je sydomlětny hólc w Mnichowje a zawini tak zasadźenje policije. Pachoł bě tak mjenowanu smartwatch wužiwał – naručny časnik, z kotrymž móžeš tež telefonować. Zastojnicy podachu so na to k městnu, hdźež hólčec bydleše. Tam so wukopa, zo bě smartwatch k narodninam dóstał, zo pak njemóžeše ju hišće posłužować.
Z kašćikom piwa je wonkowny minister Heiko Maas swój dołh pola Britow zarunał. Wón bě so z britiskim kolegu w zastojnstwje Dominicom Raabom sadźił, zo Němska na koparskich EM přećiwo Jendźelskej dobudźe, čemuž wšak na kóncu tak njebě. Po poražce 0:2 we Wembleyjowym stadionje Maas kašćik piwa we wulkopósłanstwje Wulkeje Britaniskeje woteda. Tam přizna, zo je sej z Raabom w mjezynarodnych prašenjach poprawom přezjedny, nic pak w kopańcy.
To a tamne (01.07.21)
Lubosć k zwěrjatam je pjaneho kolesowarja pječa pohnuła po seklojtej čarje jězdźić. Wón bě so šlinkam wuwinyć chcył, zo njeby je přejěł, kaž policistam rjekny. Swědk bě zastojnikow alarmował, dokelž bě kolesowar cyłu kolesowansku šćežku za sebje trjebał. Test alkohola wunjese, zo drje njeběchu šlinki jenička přičina: Pola muža naměrichu 2,5 promilow.
Kónc němskeje wubranki na europskich koparskich mišterstwach je třećinje wobydlerjow Němskeje wšojedne. To je wuslědk reprezentatiwneho naprašowanja slědźenskeho instituta YouGov mjez 1 731 ludźimi nad 18 lětami. Na prašenje za začućemi po zwrěšćenju mustwa rjekny 35 procentow „zo so wo to njerodźa“. 27 proc. poda, zo „njejsu překwapjeni“. 15 proc. je „jara přesłapjenych“, wosom procentow so „rudźi“ a jenož pjeć procentow je „rozhněwanych“.
To a tamne (30.06.21)
Awto zemrěteje britiskeje princesny Diany je muzej w Chile kupił. Ford Escort bě na wčerawšim internetnym přesadźowanju přeličene 61 145 eurow wunjesł. Diana bě awto 1981 jako dar k slubej wot princa Charlesa dóstała a wopytowaše jeho z Fordom často k polo-hram. Pozdźišo wona awto fanej předa. Diana, kotraž bě 1997 při njezbožu z awtom w Parisu žiwjenje přisadźiła, by jutře, 1. julija, 60. narodniny swjećiła.
Njewšědna spowědź: Njeznaći paduši su cyrkwi w Dormagenje swoju rubiznu wróćili a so z listom pola wosady zamołwili. Kaž policija zdźěli, běchu paduši minjeny tydźeń swěčnik a jedyn z wobrazow křižoweho puća pokradnyli. Woboje ležeše nětko derje zapakowane zhromadnje z listom před cyrkwju. Pakostnikaj prosytaj wo wodaće za njeskutk, kotryž „sta so pod šwarnym wliwom alkohola“. Policija jeju nětko prosy, so tež pola njeje wosobinsce „wuznać“, štož móhło jimaj při chłostanskim jednanju pomhać.
To a tamne (29.06.21)
Wosrjedź jězby z kófroweje rumnosće awta padnyłoj staj mužej w starobje 19 a 24 lět njedaloko bayerskeho Obergünzburga. 19lětneho dyrbjachu zranjeneho w chorowni zastarać. Po prěnich dopóznaćach bě wosobowe awto njedźelu rano tak połne, zo dyrbještaj mužej, kotrajž chcyštaj z awtostopom sobu jěć, do wotewrjeneje kófroweje rumnosće zalězć. Jako šofer raznje pospěši, padnyštaj wonaj na asfalt. Awto je dale jěło. Policija nětko swědkow pyta.
Sta litrow jabłukoweho sirupa zhubiło je wčera nakładne awto w Frankfurće nad Mohanom. Na lěpjatej maćiznje so wjacore motorske, mopedy a kolesa wobsunychu a znjezbožichu. Tank ze sirupom měješe dźěru. Hakle po pjeć kilometrach Lkw zasta. Wohnjowi wobornicy dźěru zapłatachu. Sirup na dróze dyrbjachu z wodu wotmyć.
To a tamne (28.06.21)
Dale žane wujasnjenje nimaja w USA za něhdźe 140 zjawow na njebju, kaž z runje wozjewjeneje rozprawy zakitowanskeho ministerstwa wuchadźa. Tak nimaja žanych pokiwow na to, zo tči za mjez druhim wot pilotow a mariny USA wobkedźbowanymi „njeidentifikowanymi powětrowymi fenomenami“ minjeneju lětdźesatkow tajna technika Chiny, Ruskeje abo zwonkazemskich swětnišćowych nastrojow. Přiwšěm nochcedźa to zasadnje wuzamknyć.
Cyła wjes na předań je w Šotiskej. Powostanki wsy Lawers ze 17. lětstotka a něšto kraja maja 145 000 eurow wunjesć. W rozwalinach šeri pječa hišće duch wuspěšneje zaprajerki tehdyšeho časa z mjenom Lady of Lawers. Žona bě wjacore podawki wěšćiła, kaž twar ćahow a parnikow. Posledni wobydlerjo běchu wjes spočatk 20. lětstotka wopušćili.
To a tamne (25.06.21)
Ćelo na awtodróze A 4 je w nocy na štwórtk zasadźenje policije zawiniło. Zastojnicy dyrbjachu A 4 njedaloko wot-jězdki Wüstenbrand do směra na Erfurt dospołnje zawrěć. Skónčnje so poradźi, skoćo popadnyć. Wutoru bě cyłkownje wosom ćelatow ćeknyło. Za někotrymi přeco hišće pytaja. Policija prosy šoferow w regionje wo wosebitu kedźbnosć.
Nimale tři promile alkohola w kreji měještaj wodźerjej nakładneju awtow, jako jeju policija kontrolowaše. 37lětny jědźeše po awtodróze A 2, jako ze swojim Lkw-jom škitne wobhrodźenje po dołhosći něhdźe sto metrow wobškodźi. Šofera pak to njestaraše. Něšto pozdźišo jeho policija kontrolowaše a zwěsći 2,58 promilow. Dalši, 35lětny bě na A 14 do směra na Schwerin po puću, hdźež je chětro njewěsteho jězdźenja dla napadnył. Pola njeho naměrichu 2,96 promilow.
