To a tamne (27.05.21)
Kónčk kurjeneje cigary bywšeho britiskeho premierministra Winstona Churchilla ma za 4 850 eurow noweho wobsedźerja. Sydom centimetrow krótka historiska dopomnjenka je tak wo wjele wjace wunjesła, hač běchu trochowali, zdźěli awkciski dom Bellmans. Churchill, zahority kurjer cigarow, bě kónčk jedneje tajkeje 1940 preč ćisnył. Policist, kiž premierministra přewodźeše, bě jón zběhnył a swojemu wnučkej zawostajił.
Chětro rědki minikóń je so w zwěrjencu w Aue narodźił. Kobła Anielka je minjeny pjatk žrěbca porodźiła. Jara k wjeselu sobudźěłaćerjow ma kožuch konja krasnu a jara rědku barbu „liščeho tigra“. Charakteriske dypki na kožuchu njejsu kaž pola maćerje čorne, ale čerwjene. Po rysowarju z NDRskeje telewizy rěka žrěbjo „Taddeus Punkt“. Jeho mać Anielka je runje 86 centimetrow wulka.
To a tamne (26.05.21)
5 000 eurow namakała a policiji přepodała je dźesaćlětna holca w Düsseldorfje. Šulerka zakładneje šule bě pjenjezy – 5 000 eurow w 50eurowskich bankowkach – mjez parkowacymi awtami wuhladała. Policija so sprawnej namakarce dźakuje. „Wutrobny dźak, Elisabeth, a wostań tajka, kaž sy!“ Nětko spytaja wobsedźerja pjenjez wuslědźić.
Šudrowanski los w hódnoće milion dolarow je žona w zwjazkowym staće USA Massachusetts mylnje we wobchodźe wostajiła, dobyće pak najebać to dóstała. Wona bě w chwatku wobjedoweje přestawki los šudrowała a njemóžeše žane dobyće spóznać. Tuž 24,50 eurow drohi los předawarce wróći, zo by jón zrumowała. Teje syn pak dny po tym zwěsći, što je prečćisnjena papjerka hódna, a dobyćerce po prěnim wahanju los wróći.
To a tamne (25.05.21)
Elektriski kolesaty stoł pokradnyłoj staj mužej w Montabauru w Čornym lěsu, zo byštaj sej z nim wulećałoj. Policisća wopiteho 35lětneho a sobujěduceho na dróze w měsće wuhladachu. Jako jeju zadźeržachu, sobujěducy ćekny. Test wunjese 1,5 promilow alkohola pola šofera. Jězbnu dowolnosć muža hnydom sćazachu. Wobaj běštaj kolesaty stoł wowce znateho pokradnyłoj.
Škodu něhdźe 300 000 eurow je 80lětny šofer wosoboweho awta w myjerni awtow načinił. Jako awto hižo na běžitym pasu myjernje steješe, stupi muž mylnje na płunowy pedal. Elektroawto starca tak dwě před nim stejacej dosć drohej awće po cyłej myjerni suwaše, policija zdźěli. Wšě tři awta su dospołnje skóncowane. Jenož přez wulke zbožo njeje so žadyn z blisko stejacych sobudźěłaćerjow zranił. Šofer prědnjeho awta so snadnje zrani.
To a tamne (21.05.21)
Njewšědne transportne přeće je pola policije w delnjobayerskim Hauzenbergu posměwk zbudźiło. Jaty tamnišeho jastwa chcyše po swojim pušćenju z policajskim awtom domoj dowjezeny być. Wotpowědnu próstwu je wón policiji w lisće napisał. Ta wšak bě jeho tež do jastwa přiwjezła, jaty argumentuje. Nimo toho nima žane pjenjezy za domojjězbu. Policija je próstwu wotpokazała: „Darmotny tarif“ płaćeše jeničce za tamjězbu.
Hudźić w New-Yorkskej podzemskej železnicy je bórze zaso móžno. Wot 4. junija smědźa hudźbnicy z wotpowědnej dowolnosću we wagonach podzemskeje znowa wustupować, dyrbja pak sej nadal nós a hubu zakryć a wěstotny wotstawk dodźeržeć. Nimo toho jim radźa so šćěpić dać. Něhdźe 350 skupin a jednotliwcow wob lěto w podzemskej z milionami pasažěrow 7 500 króć wustupuje.
To a tamne (20.05.21)
Spjacemu pasažěrej ze Španiskeje je paduch na Düsseldorfskim lětanišću mobilny telefon a črije pokradnył, kotrež bě sej za swój spink na ławce zuł. Policija pak skućićela spěšnje zwěsći. Wšako běchu kamery wšitko nahrawali. 43lětny Španičan bě so pola policije přizjewił. Po 20 mjeńšinach 38lětneho pakostnika hišće na lětanišću lepichu. Rubiznu měješe wón při sebi. Přewšo zbožowny móžeše Španičan z jězbu skónčnje pokročować.
W Berlinje pokradnjene a w Běłohrodźe předate wubědźowanske koleso su cłownicy na Stuttgartskim lětanišću našli. Zastojnicy běchu porik po přizemjenju kontrolowali a sej koleso bliže wobhladali. Jako ramikowe čisło přepruwowachu, so wukopa, zo bu 3 000 eurow drohe koleso před třomi lětami pokradnjene. Pućowacaj měnještaj, zo staj koleso w interneće kupiłoj. Te je nětko zaso w Berlinje.
To a tamne (19.05.21)
Zbytki podnurjeneje wsy su tuchwilu w italskim Južnym Tirolu widźeć. Twarskich dźěłow dla je woda spjateho jězora wotpušćena. Znaty je jězor cyrkwineje wěže dla, kotraž tež z napjelnjeneho jězora saha. Wjes běchu 1950 zapławili, zo móhł spjaty jězor za wodomilinarnju nastać. Wjace hač 160 domow běchu tehdy wotbagrowali abo rozbuchnyli. Jeničce cyrkwinu wěžu ze 14. lětstotka dyrbjachu pomnikoškita dla stejo wostajić.
Płót zwěrjenca wobškodźiło je nakładne awto z měšakom, połnym betona jako so w bayerskim Dürrwangenje powróći. Zranił so na zbožo nichtó njeje. Lkw z betonom bě so z njeznateje přičiny do přirowa sunyło a so powróćiło. Elefantka Carla bě prěnja na městnje njezboža a je powróćene awto wobčuchała. Wona pak zajim spěšnje zaso zhubi, dokelž na nju wobjed čakaše.
To a tamne (18.05.21)
Legendarne spěchanje po schodach New-Yorkskeho Empire State Buildinga, kotrež dyrbjachu loni koronapandemije dla wotprajić, chcedźa zaso přewjesć. Mjeztym 43. wubědźowanje planuja lětsa 26. oktobra. Pandemije dla je ličba wobdźělnikow na 125 wobmjezowana, a tak chcedźa jich wulosować. W lěće 2019 bě Polak Piotr Łobodziński 1 576 schodźenkow wysokodomu w dźesać minutach a pjeć sekundach zmištrował.
Njedorozumjenje wopačneje pizzy dla je w delnjobayerskim Grafenauwje k namócnym rozestajenjam wjedło. We wjaceswójbnym domje běchu wobydlerjo wšelakich domjacnosćow pola wšelakich posłužbow pizzu skazali. Po tym zo bě 26lětny posoł pizzu wopačnemu adresatej wotedał, so wobydlerjo z nim wadźachu a storkachu do njeho. Nimo toho su awto dodawarja pizzy wobškodźili.
To a tamne (17.05.21)
Udo Lindenberg přija k dźensnišim 75. narodninam tež zbožopřeća Berlinskeho knježaceho wyšeho měšćanosty Michaela Müllera (SPD). Lindenberg je so na najwšelakoriše wašnje „za přewinjenje murje a za dojednanje mjez wuchodom a zapadom zasadźał“, Müller piše. Po znowazjednoćenju „angažowaše so za přewinjenje murje we hłowach, přećiwo hidźe na cuzych, za tolerancu, respekt a pisanu towaršnosć“.
Kopanje do dakla je muža w porynsko-pfalcowskim Ludwigshafenje do jastwa přinjesło. Jako přiwołani policisća personalije 52lětneho přepruwowachu, so wukopa, zo za nim z wukazom zajeća pytaja. Muž wšak wo tym ani ničo njewědźeše. Zastojnicy dowjezechu jeho do jastwa. Hač je so mały dakl 63lětneje wobsedźerki přez kopanje skućićela zranił, njeje policija zhoniła.
To a tamne (14.05.21)
Na sćežor milinowoda zalězł je mjedwjedź w měsće w južnym zwjazkowym staće USA Arizona, zo by tam wotpočował. Policija dyrbješe wokolne dróhi w Douglasu njedaloko mjezy k Mexiku a awtodróhu zawrěć, zo móhli mjedwjedźa wućěrić. Při tym hrožeše strach, zo poćerpi zwěrjo zranjenja miliny dla. Skónčnje mjedwjedź po sćežoru zaso dele zalěze. Policija ludźi namołwješe, městno spěšnje wopušćić, wšako je a wostanje mjedwjedź dźiwje a rubježne zwěrjo.
Wurosćeny łós (Elch) je so po wobchodźe za barby w Šwedskej rozhladował. Widejowa kamera dokumentowaše, kak zwěrjo naraz w róžku wobchoda w juhošwedskim Kalmaru steješe. Dospołnje njejasne je, kak so wulke skoćo do wobchoda dósta. Łosa dyrbjachu zatřělić, dokelž njewidźachu móžnosć, kak móhł wobchod zaso wopušćić.
To a tamne (12.05.21)
Sydom metrow wysoki drjewjany křiž a k tomu słušacy betonowy fundament dyrbi žona ze swojeje zahrody wotstronić. To je Düsseldorfske hamtske sudnistwo nětko rozsudźiło. Žona, kotraž bě křiž stajić dała, ma drje prawo zahrodu wužiwać, křiž pak njesłuša swojeje wulkosće a wobswětlenja dla „k normalnemu wuhotowanju zahrody“. Žona bydli w dwuswójbnym domje. Susodka bě křiža dla, kiž je tež w nocy wobswětleny a ju w sparje myli, skóržbu zapodała.
Tragiski kónc poćerpjeła je twochnjena kruwa w Zwickauwje. Wona bě so do rěki Modły (Mulde) dóstała, hdźež je dospołnje panisce reagowała. Do toho bě ze stadła ćeknyła, kotrež runje na pastwu ćěrjachu. Dokelž njeje so zaso popadnyć dała, wuradźowaše bur z weterinarnym zarjadom a so skónčnje rozsudźi kruwu zatřělić dać.
