To a tamne (14.05.24)
Cwólba dźesać lět starych paduchow zaběra tuchwilu policiju w Šwicarskej. Hólcam wumjetuja zadobywanje, policija w Schaffhausenje zdźěla. Pječa su so minjenu srjedu do domu zadobyli, w kotrymž měješe skupina hrajerjow swój domicil. Tam wšitko přeborkachu a wšelake wěcy spakosćichu. Do toho běchu wokno z plesternakom rozbili. Škoda wučinja wjacore sta eurow. Přepytowanja je statne rěčnistwo za młodźinu přewzało.
Symjo cannabisa kupiło je sej mjeztym sydom procentow ludźi w Němskej, zo by rostlinki priwatnje plahowało. To je slědźenski institut YouGov zwěsćił. 89 procentow to hišće činiło njeje. Jědnaće procentow pak to hišće planuje. Młodźi ludźi mjez 18 a 34 lětami symjo cannabisa za rostlinki najčasćišo kupuja (14 procentow). Wot 1. apryla smě kóždy doma – nic w zahrodźe – tři rostliny plahować.
To a tamne (13.05.24)
Jiří Korn – rady widźany hósć legendarneje telewizijneje show NDR „Kotoł pisaneho“ hotuje so na swoje 75. narodniny, kotrež woswjeći pjatk, 17. meje. Najebać to steji nadarjeny multitalent dale na jewišću. Hakle w februaru pjelnješe w Čěskej dale woblubowany star w Praze cyłu halu ze swojimi přiwisnikami. Korn jenož njespěwa, ale je tež dźiwadźelnik. Njedawno měješe hłownu rólu w bajkowym filmje a wustupuje prawidłownje w Praskim hudźbnym dźiwadle Karlin.
Plyšowa hrajka je wčera we Wiesbadenje zasadźenje policije zawiniła. Dospołnje rozpjeršeny muž bě 150 centimetrow wulkeho pozdatneho hada na parkowanišću nakupowanišća wuhladał a nuzowe čisło wolił. Zastojnikam skićeše so spočatnje samsny wobraz. Spěšnje pak so wukopa, zo jednaše so wo plyšowu hrajku. „Strašneho hada“ popadnychu.
To a tamne (10.05.24)
Dźěćo je w awće wohnjostroj zapaliło, čehoždla dóńdźe k wohenjej na zwjazkowej awtodróze A8 pola Stuttgarta, policija wčera zdźěli. Na zadnim sedle awta ležachu pryskotawki a bengalosy za narodniny. Kak a što dokładnje bě hólc zawčerawšim zapalił, njemóžachu přepytowarjo hišće zwěsćić. Jako wuchowanske pomocnicy k wohenjej přichadźachu, steješe awto na pódlanskej jězdnej a so hižo paleše. Mać a šěsćlětneho hólčeca dowjezechu pomocnicy do chorownje.
29. mjezynarodne zetkanje Trabantow je Trabbi Buggy klub zawčerawšim na lětanišću w Anklamje zahajiło. Něhdźe 700 wobdźělnikow zarjadowar tam wočakowaše. Za fanow NDRskich kultowych awtow a dalšich nostalgiskich jězdźidłow su hišće hač do zajutřišeje njedźele najwšelakoriše programowe dypki a wubědźowanja předwidźane.
To a tamne (08.05.24)
Bjez wuspěcha je muž w Bayerskej přećiwo cyrkwinskim zwonam skoržił. Ze swojej skóržbu je nětko tež před wyšim krajnym sudnistwom zwrěšćił. Mužej bě prawidłowne biće zwonow mjez 6 a 22 hodź. přewótře. Pruwowarjo pak njemóžachu ničo wopačneho zwěsćić. Nimo toho bě mužej znate, zo steji njedaloko jeho domu 125 lět stara farska cyrkej, sudnicy měnjachu. Muž bě hižo 2022 podarmo přećiwo zwonjenju skoržił.
Wobchadny chaos zawinowali su tři ćeknjene howjada wčera na awtodróze A7 južnje badensko-württembergskeho Ulma. Pomocnicy mějachu swoju lubu nuzu, dwě kruwje a byka zaso popadnyć. Wosebje byk bě chětro roznjemdrjeny. Zatřělić jeho njemóžachu, dokelž bychu tak druhich wohrozyli. Skótny lěkar jeho pohłuši. Awtodróha bě nachwilnje zawrjena. Zwotkel zwěrjata běchu, njewědźa.
To a tamne (07.05.24)
Z prawymi woclanymi putami policista hrał je sydomlětny hólc w poruhrskim Herdecke – bjez klučika. Narunanski klučik njemóžachu na straži wohnjoweje wobory namakać, jako hólca z putami na jednej ruce přiwjezechu. Tež policija njemóžeše pomhać, dokelž so nowe klučiki do starych putow njehodźachu. Z wulkimi klěšćemi wuswobodźichu skónčnje hólca, kiž bě wšitko zmužiće znjesł.
Paducha přesćěhował a skónčnje dosahnył je 67lětny muž zhromadnje z policiju w Lipsku-Paunsdorfje. Muž bě wobkedźbował, kak so paduch přez rozbite wokno do jednoswójbneho domu zadobywa. Paduch ćekny, jako jeho 67lětny narěča. Swědk alarmowaše policiju a podhladneho sam přesćěhowaše. Na zastanišću tramwajki móžeše policija 57lětneho paducha zadźeržeć a zajeć. Tón měješe rubiznu hišće při sebi.
To a tamne (06.05.24)
Rój pčołkow w koparskim stadionje popadnyła je wohnjowa wobora minjenu sobotu w Stuttgarće, dwě hodźinje do zahajenja koparskeje hry přećiwo Bayeram. Insekty běchu so na sćežorje wótřerěčakow zasydlili. We wobchadźenju z pčołkami kubłany wohnjowy wobornik je pčołki w pčołkacym košu popadnył a w lěsu zwonka města wusadźił. Kak bychu pčołki na haru w stadionje a na syły ludźi reagowali, njeje jasne.
Pytajo za rjanymi fotami z přirody je so 81lětny na sewjeru Mecklenburgsko-Předpomorskeje w bahnje zabłudźił a tam tčacy wostał. Z pomocu helikoptera jeho skónčnje wućahnychu. Starc bě předwčerawšim, sobotu, za přećelomaj přirody w bahnje po puću, a bě naraz zhubjeny. Jako jeho nańdźechu, tčeše wón hač k pasej w bahnje. Pomocnicy so k njemu předrěchu a helikopter přiwołachu.
To a tamne (03.05.24)
W dobrym pomjatku ma bamž Franciskus časy, jako bě hišće z ćahom a busom po puću. „Tam běch mjez ludźimi a začuwach jich ćopłotu a jich starosće“, rjekny 87lětny wótc katolskeje cyrkwje měsačnikej italskich železnicarjow. Jako šulski hólčec bě Franciskus wšědnje z ćahom do argentinskeje stolicy Buenos Aires jěł. Dźensa wužiwa wón nimo awta hišće papamobil we Vatikanje a pućuje z lětadłom a helikopterom.
We wólbnym lokalu wotpokazali su wčera bywšeho premierministra Wulkeje Britaniskeje Borisa Johnsona, dokelž njeměješe tón wupokaz sobu. Wotpowědny zakoń bě Johnson swój čas sam přesadźił. Při wčerawšich komunalnych wólbach přińdźe Johnson bjez płaćiweho dokumenta. Sobudźěłaćerjo běchu tuž nuzowani, 59lětneho domoj pósłać. Hač je pozdźišo tola hišće wolił, njeje znate.
To a tamne (02.05.24)
Njezapomnity drje wostanje 62lětnemu mužej z westfalskeho Lippstadta wčerawši prěni skok z parašutom: Krótko do přizemjenja na lětanišću w Bürenje zatorhny jeho sylny wětřik, tak zo přizemi skónčnje na wjeršku štoma. Wohnjowi wobornicy jeho z pomocu rěbla ze šěsć metrow wysokosće wuswobodźichu. Najebać někotre wobodrjenja hałzow dla wosta muž njezranjeny. Hač so hišće raz na tajki skok zwaži, njeje znate.
Hoberski hotdog steji wotnětka na sławnym New Yorkskim naměsće Times Square. Něhdźe 20 metrow dołha twórba ameriskeju wuměłcow Jena Catrona a Paula Outlawa je hač do 13. junija wustajena. Skulptura „Hot Dog in the City“ steji na wosebitym wozu a so do wysokosće wuzběhnje. Hižo nětko je twórba „skulptura, swjedźeń a kritika“ a wulki magnet wobydlerjam a turistam, kaž rěka.
To a tamne (30.04.24)
Njeznaty je na parkowanišću w Budyšinje młodemu mužej – w socialnych medijach jako „Anzeigenhauptmeister“ znatemu – do mjezwoča dyrił. Wón bu lochce zranjeny a medicinisce zastarany. Policija přepytuje pad zranjenja ćěła dla. Hižo dlěši čas wuskušuje 18lětny systematisce wopak parkowacych a informuje policiju. Swoju sobotnišu „akciju“ na parkowanišću běše sam w socialnych medijach připowědźił a tak wjace hač 100 wćipnych přiwabił.
Tři měsacy po swojej diagnozy schorjenja na rak, přewozmje kral Wulkeje Britaniskeje Charles III. zaso zjawne terminy. Zhromadnje ze swojej žonu kralownu Camillu wopyta dźensa centrum za schorjenja na rak, tak připowědźi kralowski palast. Wobaj chcetaj so tam z pacientami kaž tež z medicinskimi specialistami zetkać.
To a tamne (29.04.24)
Fanojo Jana Feddera – woblubowaneho lěta 2019 zemrěteho Hamburgskeho filmoweho hrajerja – maja přichodne dny składnosć, něšto ze zawostajenstwa policajskeho komisara na přesadźowanju kupić. Wudowa Marion Fedder poskićuje na internetnej awkciji mjez druhim oldtimer, motorske, tačelak a elektriske nastroje. Fedder bě jako zběrar starych wěcow znaty. Mercedes pochadźa z lěta 1960, Moto Guzzi z lěta 1978.
Z 212 km/h po puću był je šofer wosoboweho awta sobotu na awtodróze A 10 na Třiróžku Habolskeho kraja sewjero-zapadnje Berlina. Dowolene je tam 120 km/h. Policija z toho wuchadźe, zo jědźeše šofer wotpohladanje přespěšnje, dokelž dźeržeše sej ruku před mjezwočo. Pomhać pak jemu tole ničo njebudźe.
