,,Hišće jónu, hišće raz, widźeć chcył ...“ a nic jenož ja, ale tež šefetaža Mnichowskich Bayerow, Juliana Nagelsmanna na trenarskej ławce. Tola tutón són bě spěšnje wusonjeny, wšako je so Nagelsmann po chwilce přemyslenja jasnje­ za městno trenarja narodneho mustwa­ rozsudźił. W ćichim sym sebi tajki rozsud přał, dokelž wšak bě lońše dźě­lenje wšo druhe hač rozumna wěc. Snano je sebi młody trenar wuwědomił, zo drje dóstanje dale kusk mjenje pjenjez, ale za to sedźi tróšku krućišo w trenarskim sedle. Zwěrju sebi pak twjerdźić, zo poćah Bayerow a Nagelsmanna na wěčnje hišće z blida njeje. A štó wě z kotrymi poskitkami so hišće jónu na njeho wobroća. Skerje sebi myslu, zo Tuchel dalše lěto wostanje.

Awtor dźensa

André Strelow

Mišterstwo w zwjazkowej koparskej lize je rozsudźene. Nowy mišter Bayer Leverkusen ma hišće šansu zwjazkowy pokal dobyć. Hladajo na zbywacych kontrahentow je šansa na dalši titul wulka, wšako mustwo tuchwilu na cyłej liniji přeswědča. Runje njedźelu docpě Leverkusenske mustwo z wothwizdanjom w Dortmundźe hišće wurunanje 1:1. Za BVB bě dobyće nuznje trěbne, zo by so Lipskej přibližił. Tak steja Lipšćenjo dwaj dypkaj před Borusami, k tomu maja lěpši wrotowy poměr.

Na zašłym hrajnym dnju zwjazkoweje ligi mějachmy zaso wjacore rozbudźaki respektiwnje dwělomne sceny sudnikow. Zdźěla zapraji tež widejowy asistent. Principielnje mam widejoweho asistenta, jako dobru naprawu, dokelž čini to, štož ma činić, mjenujcy wopačnym rozsudam zadźěwać. Tuchwilny hłowny problem je, zo ćerpi akceptanca widejoweho asistenta swojeje snadneje transparency dla. To nastupa najprjedy fanow w stadionje, kotřiž widźa sudnika jenož k monitorej hić a dóstanu 60 sekundow pozdźišo rozsud prezentowany.

Awtor dźensa

Jurij Bjeńš

Awtor dźensa

Beno Šołta

To póndźe spěšnišo hač sej mysliš! To bě prěnja mysl po tym, zo sym wuslědki zwjazkoweje ligi w kopańcy widźał. Tež hdyž njejsym tón, kiž prawidłownje wšemu sćěhuje – mje wuslědki wězo stajnje zajimuja. A ćim bóle mje zwjeseli, zo budu lětsa koparjo z Leverkusena němski mištr. Dokelž popřeju to raz druhemu mustwu hač Baworskim. A Leverkusen je woprawdźe přeswědčił. Hižo nětko so wjeselu na přichodnu sezonu: předstajće sej, to budźe zajimawe, hdyž njejsu Mnichowscy jasni faworića, ale dyrbja sobu z druhimi dobrymi mustwami wojować. To přinjese wjace napjatosće a čini ligu zaso zajimawu. Nětko pak najprjedy dočakamy na jeničke dobyće Leverkusena. A nimo toho su na dobrym puću, tež hišće rekord w Europje docpěć.