Za něhdźe pjeć tydźenjow je tak daloko. Skónčnje! Potom zahaja so w pusćinowym staće Katar swětowe mišterstwa w kopańcy.

Zo so wo tutym sportowym wulko­podawku nic hakle nětko njediskutuje, absolutnje witam. Ćim mjenje mam ­zrozumjenje, hdyž něhdyši prezident Bayerow z Mnichowa za tute mišterstwa „politiku čini“, a to z dwělomnymi metodami.

Tak bě to před tydźenjomaj w tele­wizijnym wusyłanju „Doppelpass“. Uli Hoeneß bě so móhłrjec sam wot doma do wusyłanja přišaltował, twjerdźo při telefonje, zo so situacija ludźi w Katarje zhladujo na čłowječe prawa samo polěpši. Zo je situacija skerje nawopačna, wo tym su wjacore medije hižo roz­prawjeli. A jako wo wonym telefonaće přichodny dźeń čitach, sej jenož prajich: „Hoeneßo, ty sprawna duša!“

Pjatk wječor pobychmy po dołhim času zaso raz w Běłej Wodźe, zo bychmy sej Łužiske lodohokejowe liški wobhladali. Lodohokejowa sezona je wšak so před třomi tydźenjemi zaso zahajiła a tuž tłóčachmy druhemu zwjazkowemu ligistej z Łužicy w lodowym stadionje palcy, zo domjacu hru přećiwo Bad Nauheimej dobudźe. Tola hosćo z Hessenskeje běchu na kóncu zbožowniše mustwo a duel z 1:0 za sebje rozsudźichu. Byrnjež jenož jedne wrota padnyli, běše duel na lodźe chětro horcy, emocionalny a hač do poslednjeje sekundy napjaty. Tójšto sylnych čekow při bandźe, mnoho šansow na woběmaj stronomaj a tři mjeńše rozestajenja mjez hrajerjemi běchu přičina, zo so tež w fanowym bloku Łužiskich liš­kow chětro warješe. Tón wšak je tak a tak jedyn z najwótřišich cyłeje ligi. A to bě pjatk wječor zaso raz pytnyć. Tež 10 hóstnych fanow, kiž stejachu pódla nas, přeco zaso swoje šmóratko ze zaka wućahnychu a łužiski fanowy blok filmowachu. Móžu kóždemu doporučić, sej tež raz do Běłeje Wody dojěć a tónle sportowy event live dožiwić. Domjace hry su tam stajnje pjatk abo njedźelu wječor.