Grünheide (dpa/SN). Škitarjo wobswěta su braniborske knježerstwo namołwjeli, planowane rozšěrjenje twornje Tesle w Grünheide zadźeržeć. „Što dyrbi so hišće stać, doniž politikarjo njereaguja“, wuzběhny Lou Winters. Wona angažuje so w zwjazku, kotryž so přećiwo planam Tesle zasadźa. Předewšěm aktiwistka kritizuje, zo dźe politikarjam jenož wo profit. Twornja njeměła hižo žane spěchowanske srědki ze stron braniborskeho knježerstwa dóstać. Po słowach wobswětoškitarjow předewzaće přirodu masiwnje wohrožuje. To nastupa mjez druhim pitnu wodu. Tež hódnoty wopłóčkow, kotrež so z twornje do systema dóstanu, su přewysoke. Zastupjerjo gmejny w Grünheide njesmědźa tole ignorować. Kaž z naprašowanja wuchadźa, je wjetšina wobydlerjow tohorunja přećiwo planowanemu rozšěrjenju twornje za elektroawta.
Hač do lěta 2030 ma so w Němskej wěsty podźěl miliny, mjenujcy 80 procentow, z wobnowjomnych energijowych žórłow produkować. Kak móhli tole docpěć, bě tema wčerawšeje konferency w Choćebuzu.
Choćebuz (SN). Wutwar ekomiliny po cyłym Zwjazku po słowach zwjazkoweho hospodarskeho ministra Roberta Habecka (Zeleni) derje postupuje. To wuswětli wón wčera na energijowej konferency w Choćebuzu. „Jelizo dale takle pokročujemy, smy zaměry bórze docpěli“, wón zwurazni. Tuchwilu wučinja podźěl miliny wobnowjomnych energijow něhdźe 40 procentow. Za dalše wuwiće njejsu w přichodźe jenož solarne parki a wětrniki trěbne, ale tež milinowe syće. Tak měli so milinowody twarić. Dokelž pak su powody pod zemju předrohe, dyrbja wone nad zemju nastać.
Habeck chwaleše wčera iniciatiwu łužiskich komunow. Minjeny tydźeń je Łužiski kruh požadanje wo prěni „Net Zero Valley“ (dolina nettoweje nule) Europy w Brüsselu wotedał. Rěčnica kruha, Grodkowska měšćanostka Christine Herntier (njestronjanka) bě ministra wčera informowała.
Łužiska energija a milinarnje (LEAG) swój puć transformacije dale kroči. Hromadźe z wuwiwarjom projektow EP New Energies (EPNE) chce LEAG lětsa wjacore bytostne projekty wětroweje energije a fotowoltaiki započeć.
Choćebuz (SN/at). GigawattFactory mjenuja pola LEAG swój wulki cil. To ma w přichodźe najwjetši wotkrajny (onshore) zwjazk připrawow k produkciji zeleneje miliny w Němskej być. Wažny měznik budźe prěni swójski wětrowy park předewzaća Baršć-Rjasnik (Forst-Briesnig) II z wukonom 100 megawattow być. Kaž LEAG a EPNE informujetej, maja so twarske dźěła za park ze 17 wětrnikami na rekultiwowanej přestrjeni Janšojskeje jamy w nalěću započinać. Wot lěta 2026 chcedźa wottam zelenu milinu do syće dodawać. Připrawy za wětrowu energiju móža po podaću partnerow lětnje 270 000 MWh miliny dodawać. Z tutej milinu hodźi so nimale 77 000 domjacnosćow zastarać, wjace hač połdra raza telko, kaž su we Wojerecach, Kamjencu a Budyšinje.
Po swojim hospodarskim planje chce Zaměrowy zwjazk Łužiska jězorina Sakska lětsa dohromady 600 000 eurow inwestować, wot tutych 137 000 eurow ze swójskich srědkow.
Wojerecy (AK/SN). Do najwažnišich naprawow słušeja: Wodowe wotpočnišćo na Lejnjanskim jězoru, wodźenski system za motorizowany wobchad, wudospołnjenje značkow kilometrow za pućowacych kołowokoło jězorow, rozšěrjenje kapacitow přistawnišćow při Parcowskim jězoru kaž tež wuhotowanje zarjada zwjazka z modernej techniku.
Aktualnje eksistuje po cyłej přestrjeni zwjazka hižo wodźenski system, ke kotrymž słuša 90 „njehamtskich“ info-tafličkow na wjace hač 30 městnach. Spočatk 2023 je zwjazk system z hamtskimi pućnikami z pomocu Łužiskeje a srjedźoněmskeje towaršnosće hórnistwoweho zarjadnistwa (LMBV) wudospołnił.
Drježdźany (dpa/SN). Sakske knježerstwo chce Židowske wosady w swobodnym staće hišće bóle financielnje podpěrać. Suma za nabožne a kulturne potrjeby ma po rozsudźe kabineta wot lěta 2025 wob lěto 2,1 milion eurow wučinić. Wotpowědne zrěčenje su sakski ministerski prezident Michael Kretschmer (CDU) a zastupjerjo wosadow minjeny pjatk w Drježdźanskej statnej kencliji podpisali. Z pjenjezami so tež stražowanski škit za židowske zarjadnišća zapłaći. Dotal płaći Sakska wob lěto 1,07 milion eurow Židowskim wosadam.
Ze zrěčenjom zwuraznja Swobodny stat wosebitu zamołwitosć za židowske žiwjenje w Sakskej. „Židowske žiwjenje w Němskej a Sakskej našu towaršnostnu zhromadnosć wobohaća. Tole měli zhromadnje dale pěstować“, Michael Kretschmer zwurazni. Zrěčenje je zakład za spomóžne zhromadne skutkowanje mjez swobodnym statom a židowskim nabožinskim zjednoćenstwom.