Z klimowej změnu a kóncom zmilinjenja brunicy přiběraja naroki na saněrowanje pohórnistwowych přestrjenjow. Nowa krajina trjeba nowu perspektiwu. To płaći přidatne pjenjezy. Za to trěbne pjate zarjadniske zrěčenje mjez Zwjazkom a wuchodnymi brunicowymi krajemi je dowujednane.
Choćebuz/Zły Komorow (dpa/SN). Dalše saněrowanje bywšich brunicowych kónčin we Łužicy a w srjedźoněmskim rewěrje je zawěsćene. Wo tym rozprawja powěsćernja dpa zepěrajo so na informacije z Łužiskeje a srjedźoněmskeje towaršnosće hórnistwoweho zarjadnistwa (LMBV). Zwjazk kaž tež Braniborska, Sakska a Saksko-Anhaltska chcedźa zrěčenje bórze podpisać. Tute rjaduje mjez podpisacymi, kak kóšty za wotstronjenje hórnistwowych škodow w přichodnych pjeć lětach mjez sobu rozdźěleja.
Bjedrichecy (AK/SN). Łužiska a srjedźoněmska towaršnosć hórnistwoweho zarjadnistwa (LMBV) Slěborny jězor w přichodnych lětach dale cyle zaměrnje saněruje. To nam sobudźěłaćerka za zjawnostne dźěło LMBV Kathleen Hofmann- Mitschke na naprašowanje zdźěli. Wona doda: „Prěni wotrězk je přibrjóh pola Bjedrichec. Za to připrawimy tuchwilu přestrjeń za test, na kotrejž přepytujemy, što je najeficientniša metoda zahusćenja z wulkim ćišćom. Ručež změjemy wuslědki, budźemy wot nazymy lěta 2023 z dźěłami započinać a chcemy je hač do kónca lěta 2025 zakónčić. Tajki je naš plan.“ Mjenowany wotrězk přibrjoha budźe so potom zaso turistisce wužiwać móc. Dalše wotrězki Slěborneho jězora móže LMBV hakle po dowolnosći sakskeho hórnistwoweho zarjada planować a skrućeć.
Slěborny jězor je wobstatk Łužiskeje jězoriny a słuša do Łazowskeje gmejny. Leži z tym wosrjedź Łužicy w Sakskej a ma wšelakore wažne funkcije za tutu kónčinu. Wón nješkita ludnosć jenož před wulkej wodu abo je wobstatk regulowanja wysokosće wody cyłkowneje jězoriny, ludźo jón tež jako bliske wočerstwjenišćo lubuja.
Potrjeba fachowcow wuchodosakske předewzaća dale wužada. Dopokaz toho su zdobom swobodne dźěłowe městna, kotrež su tudyše firmy Budyskej wotnožce zwjazkoweje agentury za dźěło w nowembrje přizjewili.
Budyšin (SN/at). Dźěłowa agentura rěči we wuchodnej Sakskej wo stabilnych dźěłowych wikach. Bjezdźěłnosć je w nazymniku wo 2,2 procentomaj resp. 371 wosobow na 17 571 stupała. Porno lońšemu nowembrej pak je to přirost wo 1 358 resp. 8,4 procenty.
Naprašowanje za dźěłowymi mocami je porno oktobrej w nowembrje woteběrało. Kaž dźěłodawarski serwis informuje, su twornje 675 nowych socialneho zawěsćenja winowatostnych dźěłowych městnow přizjewili, štož je ze 162 jobami něhdźe pjećina mjenje. Tele wuwiće nimale wšitke branše jenak potrjechi, rěka w měsačnej dźěłowičnej rozprawje Budyskeje agentury za dźěło. Jenož we wobłukach wobchad a składowanje, kubłanje a zdźěłowanje, w swobodnopowołanskich, wědomostnych a techniskich posłužbach kaž tež w gastronomiji je wjace wakantnych dźěłowych městnow. Podobne bě połoženje hižo w oktobrje.
Drježdźany (SN). Najebać hubjene konjunkturne wuhlady wostanje wukubłanje kruty wobstatk we wuchodosakskich rjemjeslniskich zawodach. Cyłkownje 484 žonow a 1 687 muži je hač do nowembra wukubłanje w rjemjeslniskim předewzaću Drježdźanskeho komorneho wobwoda zahajiło. Ličba nowych zrěčenjow wotpowěduje tym minjenych lět. Loni bě ze spočatkom nowembra dohromady 2 135 žonow a muži wukubłanje na wuchodźe Sakskeje zahajiło. „Wukubłanje je puć, z kotrymž rjemjeslniske zawody w regionje swojich fachowcow přichoda dóstanu“, zwurazni hłowny jednaćel Drježdźanskeje rjemjeslniskeje komory Andreas Brzezinski. „Při tym su šansy w rjemjesle jara dobre. Kročele wot wučomnika k mištrej, k firmowemu šefej, njejsu w rjemjesle rědke.“
K Drježdźanskemu komornemu wobwodej słušeja wokrjesy Mišno, Budyšin, Zhorjelc, Sakska Šwica-Wuchodne Rudne horiny kaž tež stolica swobodneho stata.
Něhdźe 50 sypaniznowych kubiknych metrow drjewa skład skići. Wottam dóstawaja so třěski a włokniny z přewozom direktnje do spalernje. „Wšitko połnoawtomatisce běži. Technika hodźi so njekomplikowanje posłužować. Pospochi 24 hodźin móžemy drjewotřěskowu připrawu wužiwać. Cyłkowny wukon wučinja 150 kilowattow“, praji Lukas Beukelmann, jednaćel Šćeńčanskeje agrarneje towaršnosće „Při Dubiču (Am Eichberg)“. Na teritoriju zawoda ze sydom sobudźěłaćerjemi zastaruje připrawa mašinowu halu, dźěłarnju, sušenje žita kaž tež běrowowe a bydlenske twarjenja z ćopłotu. Klětu matej dwaj komunalnej bydlenskej blokaj w bjezposrědnym susodstwje k tomu přińć. Dom při Starej Budyskej dróze 52/54 z dwanaće bydlenjemi trjeba wukon ćopłoty 50 kilowattow. Dom na Nowošćeńčanskej 1 ze štyrjomi bydlenjemi trjeba ćopłotny wukon 20 kilowattow. Wobě twarjeni móže mjenowana připrawa přichodnje z ćopłotu zastarać.
Němska měła po słowach braniborskeho ministerskeho prezidenta Dietmara Woidkeho (SPD) z Čěskej, Pólskej a tamnymi europskimi partnerami hišće wušo hromadźe dźěłać, zo by so europske zastaranje z energiju hišće njewotwisniše wot dowožowanjow stało.
Čorna Pumpa (dpa/SN). Braniborska pokazuje nastupajo wobnowjomne energije přikładnje, dokal móhł puć wjesć, rjekny knježerstwowy šef wčera při wopyće čěskeho wulkopósłanca Tomáša Kafki w Čornopumpskim industrijnym parku a tamnišej milinarni LEAG. Kafka bě so tam mjez druhim wo planach LEAG za natwar Gigawatt-Factory wobhonił. Z njej chce so energijowe předewzaće stać z jednym z najwjetšich inwestorow we wobłuku wobnowjomnych energijow w Němskej.