Drježdźany (SN/JaW). Zhromadnje chcetej Srjedźoněmska syćowa towaršnosć za płun (Mitnetz) a koncern Łužiska energija a milinarnje (LEAG) na wuchodźe Němskeje infrastrukturu z wodźikom (Wasserstoff) wutwarić. To zwuraznichu zastupnicy předewzaćow minjeny pjatk popołdnju w Drježdźanach, hdźež podpisachu w přitomnosći sakskeho ministerskeho prezidenta Michaela Kretschmera (CDU) kooperaciske zrěčenje wo swojim předewzaću. Wo tym informujetej wobě firmje na swojich internetnych stronach.

Zrěčenje předwidźi zhromadne dźěło při wuwiwanju směrodajnych rozrisanjow surowiznu wodźik za łužiski a srjedźoněmski wuhlowy rewěr nastupajo. Zrěčenje wobsahuje rjadowanje wot zhotowjenja wodźika přez jeho transport a rozdźělenje hač k dodawanju tak mjenowaneho zeleneho wodźika industrijnym kupcam. „Zaměr zdobom je zhromadnje wutworić cyłkowny rjećaz tworjenja hódnotow k dekarbonizaciji regiona a tak k wažnej klimowej neutraliće w Němskej hač do lěta 2045 přinošować“, rěka w nowinskej zdźělence koncerna LEAG.

Satelity w swětnišću maja daty zběrać a ratarstwo polěpšić

Freiburg/Jena (dpa/SN). Wulki dźěl pitneje wody zasadźa ratarstwo, často pak to idealnje nječini a njeličomne litry wažneje resursy broji. Slědźerjo z Jeny a Freiburga chcedźa pomhać. Nowu wunamakanku su nětko do swětnišća třělili, a to jako kartony, wupadace kaž za nowe črije. Tak mjenowane mikrosatelity maja wužiwanje wody w ratarstwje po cyłym swěće polěpšić. Z nimi chcedźa slědźerjo daty temperatury na zemi zběrać. To pomha potrjebu wody trochować, wu­jasni techniski šef Freiburgskeje firmy ConstellR Marius Bierdel. „Hdyž so rostlinam špatnje dźe, so wone brune barbja a wjadnu“, Bierdel rozjasnja. „W tym padźe pak je hižo přepozdźe.“ Dźakowano infračerwjenej technice, z kotrejž su satelity předewzaća wuhotowane, móža hižo dwaj tydźenjej prjedy zwěsćić, hdźe je woda trěbna. Na tamnej stronje technika pomha, z wodu druhdźe njebrojić. Firma ConstellR je wotnožka Freiburgskeho Fraunhoferskeho instituta, kotryž projekt nawjeduje.