Dźěłowe wiki snadnje wolóžene
Wuchodosakske dźěłowe wiki su so 2021, w druhim lěće koronapandemije, snadnje wočerstwili. Wo tym informowaše dźensa Budyska wotnožka agentury za dźěło.
Budyšin (SN/at). Bjezdźěłnosć we wuchodnej Sakskej je w běhu minjeneho lěta woteběrała. W decembrje 2021 bě 1 239 ludźi mjenje bjez přistajenja hač kónc lěta 2020. To wuchadźa z aktualnych ličbow dźěłowych wikow, kotrež je Budyska agentura za dźěło dźensa wozjewiła. W decembrje bě tam 16 896 bjezdźěłnych, 683 resp. 4,2 procentaj wjace hač w nowembrje. Minjeny měsac mějachu poradźowarjo dźěłoweho zarjada 5 135 socialneho zawěsćenja winowatostnych dźěłowych městnow k dispoziciji. Jich bě 81 mjenje hač w nowembrje, ale 537 wjace hač w decembrje 2020.
Originelne sportowe stacije za trenowanje přepodali
Nimješk (AK/SN). Zaměrowy zwjazk braniborska Łužiska jězorina hódnotu Złokomorowskeho jězora dale stopnjuje. To podšmórny referentka předsydy zwjazka a zamołwita za marketing Dana Hüttner.
Minjene dny je zaměrowy zwjazk zhromadnje ze zastupnikami a zastupnicami města Zły Komorow (Senftenberg) tři tak mjenowane aktiwnotreningowe stacije při jězoru zjawnosći přepodał. Při Nimješćanskim (Niemtsch) přibrjohu maja zdobom staciju z wisatym rěblom. Při wuhladnej wěži na juhu jězora je naćahowanska stacija a při přibrjohu w Košynje (Großkoschen) je nastała tak mjenowana treningowa stacija za swójsku wahu. Wšitke tři stacije buchu z pomocu spěchowanja z programa Leader zhotowjene a spočatk decembra na wotpowědnych městnach nastajene. Zajimcy móža wšitke tež w zymje wužiwać.
Znowa mytoLEX wupisane
Běła Woda (SN/JaW). Hospodarska iniciatiwa Łužica (WiL) pyta z wubědźowanjom „Łužiscy załožerjo eksistencow – LEX“ tež 2022 najlěpši hospodarski koncept šulerkow a šulerjow z regiona. Wo tym informuje jednaćel WiL Michael Schulz w nowinarskej zdźělence.
„Łužiska młodźina ma telko dobrych idejow. Tajke chcemy znowa z pjenježnymi mytami podpěrać. Zdobom chcemy tak hižo zahe zajim šulerjow a šulerkow zbudźić, sej pozdźišo sami zawod załožić abo firmu w naslědnistwje přewzać. Šulerske wubědźowanje je tohorunja motiwacija młodym ludźom, so ze zawodnymi prašenjemi rozestajeć a z tak zdobytej wědu w najlěpšim padźe wuspěšny hospodarski model zwoprawdźić“, tak Schulz.
Tež w štwórtym nakładźe LEX-wubědźowanja maja šulerki a šulerjo swójske zawodne ideje koncepcionelnje wuwić. Wubědźowanje móže wobstatk šulskeje wučby abo wólnočasneje zaběry być. Wobdźělić móža so šulerki a šulerjo z Łužicy wot 8. lětnika. Swoje koncepty zapodać, móža zajimcy a zajimče hač do 30. junija w běrowomaj WiL. Dalše informacije su pod: wozjewjene.
Ze šěrokej paletu poskitkow
Nowa praksa fyzioterapije na dźeń wotewrjenych duri prosyła
Njebjelčicy (JK/SN). Njebjelčicy budu k spočatkej noweho lěta wo dalšu posłužbu bohatše. Fyzioterapeutka Stefanie Zarjenkowa z Časec budźe wot 3. januara w nowej praksy při Njebjelčanskim sportnišću najwšelakoriše terapije poskićować. Wčera popołdnju witaše wona tam zhromadnje z mandźelskim a dźěćimi mnohich hosći, kotřiž běchu přeprošenje na předstajenje praksy rady sćěhowali. Wjesnjenjo, ale tež přećeljo a přiwuzni přejachu młodej žonje do noweho powołanskeho wotrězka zbožo a wuspěch.
Změna na čole jednaćelstwa RBO
Za krótke puće mjez „polom a talerjom“
Budyšin (SN/BŠe). W Sakskej dóstawamy mnohe jara dobre regionalne wudźěłki, kotrež angažowani ludźo produkuja a tak regionalnu hódnotu spěchuja. Swobodny stat chce akterow nětko podpěrać a tak je mjenowanej bioregio-modelowej regionaj załožił, w kotrymajž móhła syć nastać.
Dale a mjenje swini w Němskej
Wiesbaden (dpa/SN). W Němskej plahuja tak mało swini kaž minjene 25 lět nic wjace. Wobstatk wučinješe na dnju ličenja, 3. nowembra, 23,6 milionow skoćatow, zdźěli statistiski zarjad we Wiesbadenje. To je najniši niwow wot lěta 1996. Přirunujo z lětom 2020 je wobstatk wo 9,4 procenty abo dobre 2,4 miliony skoćatow woteběrał. Zdobom pomjeńši so ličba plahowarnjow na 18 800, štož wučinja minus 7,8 procentow. Hłowna přičina su spadowace płaćizny swinjaceho mjasa we wikowanju a wuwožowanju – a to woteběraceho naprašowanja dla. Afriska swinjaca mrětwa, kotruž běchu w juliju prěni króć tež w plahowarni domjacych swini w Němskej zwěsćili, eksport na mjezynarodnych wikach haći. Tež zwučenosće ludźi w zežiwjenju so měnjeja: Woni hižo dale a mjenje swinjaceho mjasa jědźa.
Hladajo na minjene dźesać lět je ličba swini w Němskej wo 13,8 procentow abo 3,8 milionow skoćatow woteběrała. Ličba zawodow pomjeńši so w samsnym času wo 39 procentow. Nowy trend porno tomu su dźeń a wjetše zawody: Jich přerězny wobstatk je wot 886 w lěće 2011 na dźensa 1 254 swini rozrostł.
Dźěłać jako třěchikryjer w Norwegskej
Někotremužkuli je z Hórkow pochadźacy Elija Žur přez swoje parkurowe wideja w syći hižo znaty. Minjeny čas je młody Serb wjele we wukraju po puću był. Jako bě swoje wukubłanje na třěchikryjerja wotzamknył, poda so najprjedy do Portugalskeje, zo by z přećelemi swobodny čas wužiwał. Nawróćiwši so steješe před prašenjom, hdźe měł dźěłać – kotremu wužadanju chcył jako přichodnemu wotpowědować.
Skónčnje so wón rozsudźi znowa do wukraja hić, do Norwegskeje – a to cyle sam. Za to běchu mnohe přihoty trěbne. Tak dyrbješe swoje awto, z kotrymž chcyše so na něhdźe 1 400 kilometrow dołhi puć do sewjerneho kraja nastajić, dokładnje přepruwować dać.
Maja zwyšenje mzdy za wažny a trěbny měznik
Připowědźene zwyšenje minimalneje mzdy, kaž je nowa zwjazkowa koalicija SPD, Zelenych a FDP wobzamkła, je po wuprajenjach dźěłarnistwa Cyrobizny, požiwadła a hosćency dawno trěbna naprawa. Z njeje dźě móhli mnozy přistajeni w Budyskim wokrjesu profitować.
Po nowych čarach putnikować
Wosebje po Jakubowym puću je stajnje wjele putnikow ducy, k čemuž je tež kniha Hape Kerkelinga „Ich bin dann mal weg“ přinošowała. Štóž pak nochce po swětoznatej čarje putnikować, móže so za puć Via sacra rozsudźić.
Budyšin (SN/BŠe). Marketingowa towaršnosć Hornja Łužica-Delnja Šleska (MGO) ze sydłom w sprjewinym měsće Budyšinje je w zašłymaj lětomaj ze swojimi partnerami za projekt „Via sacra – Přinošk k zachowanju a wabjenju zhromadneho herbstwa“, spěchowany přez Europsku uniju, intensiwnje wabiła. Kónc lěta pak němsko-čěski projekt wuběži, čehoždla so wudani wróćo zhladować a naprawy hódnoćić.
