Hospodarski wuznam přiběra
Brjazki (AK/SN). Turizm we łužiskej jězorinje wuwiwa so k wažnemu hospodarskemu faktorej. „Wot lěta 1990 je w regionje k wulkim změnam dóšło“, podšmórny krajny rada wokrjesa Hornje Błóta–Łužica Siegurd Heinze (njestronjan) wčera na regionalnej konferency „Hospodarski wuznam łužiskeje jězoriny“. Přeprosył bě na nju Braniborski zaměrowy zwjazk Łužiska jězorina, a wjac hač 30 zastupjerjow z komunow, zwjazkow, towarstwow, wokrjesow a předewzaćow je do zahrodoweho města Marga, Złokomorowskeho měšćanskeho dźěla Brjazki (Brieske) přišło.
Zrěčenje wo kooperaciji podpisali
Mały Kólsk (JoS/SN). Wotnětka wobsteji partnerske zrěčenje wo kooperaciji mjez předewzaćom LEAG, geoparkom Mužakowski zahork a Uniwersitu Greifswald. Wotpohlad je slědźenje wo wuhlu we łužiskim rewěrje a wědomosć zwjazać. Regionalnogeologiski wobdźěłar LEAG Ralf Kühne, jako eksperta za kwarternu geologiju, chce brunicu z wědomosću na jedyn schodźenk stajić. Partnerske zrěčenje ma tomu słužić.
Próca wo dorost mytowana
Sakski dźěl Łužicy bóle zapřijeć
Na konferency minjenu sobotu w Běłej Wodźe su so přitomni intensiwnje wodźikej wěnowali. Zwuraznjene bu tam žadanje, sakski dźěl Łužicy do rozmyslowanjow a planowanja zapřijeć.
Běła Woda (AK/SN). Wot Gubina (Guben) přez Janšojce (Jänschwalde) a Choćebuz do Carneho Gozda (Schwarzheide) dyrbi raz wodźikowa pipeline wjesć a region ze surowiznu zastarać. Projekt je jedyn z dlěšodobnych wizijow wodźikoweje syće „Lausitz DurcH2atmen“. Nastać ma takrjec „wodźikowy region Łužica 2035“. „Běła Woda ma dźěl toho być“, podšmórny jeje wyši měšćanosta Torsten Pötzsch (Klartext) minjenu sobotu po konferency „Wodźik: surowizna přichoda?“ krajneho dźěłoweho wuběrka ekologija a sakskeje Lěwicy w Běłowodźanskim sociokulturnym centrumje Telux.
Na wosebitu akciju přeprosył je Budyski powołanskošulski centrum ...
Wobchod za njezapakowane twory
Dalšimaj projektomaj přihłosowali
Drježdźany (SN/at). Sakska móže dalšej projektaj za strukturnu změnu we łužiskim brunicowym rewěrje zwoprawdźić. Kaž statne ministerstwo za regionalne wuwiće wčera w Drježdźanach zdźěli, je Zwjazkowy zarjad za hospodarstwo a kontrolu wuwožowanja póndźelu poslednimaj dotal njewobkrućenymaj krajnymaj projektomaj „InnoCarbEnergy“ a „WALEMObase“ přihłosował. Přisłušny statny minister Thomas Schmidt (CDU) wjeseli so, „zo móžemy nětko tež wonej projektaj dale wjesć“. K hižo schwalenym předewzaćam słuša Serbski centrum wědy na Lawskim arealu w Budyšinje.
Z projektom „InnoCarbEnergy“ nastanje na milinarnjowym stejnišću LEAG w Hamorje po cyłej Europje jónkrótny a po wšěm swěće třeći slědźenski centrum za po kóštach přihodne, po měrje produkowane a „zelene“ karbonowe nitki. Na projekće wobdźělene su ekscelencny cluster MERGE „Fuzija technologijow za multifunkcionalne lochkotwarske struktury“ TU Kamjenica, Fraunhoferskej institutaj za gratowe mašiny a přeformowansku techniku a za nałožene slědźenje polymerow.
Wukubłanske wiki polěpšene
Koronapandemija bě tym, kotřiž na wukubłanskich wikach skutkuja, wosebite wužadanje. Najebać to je Budyska wotnožka zwjazkoweje agentury za dźěło wo tym informowała, zo je 98 procentow młodostnych, kotřiž běchu so we wukubłanskim lěće 2020/2021 za powołanske poradźowanje přizjewili, wukubłanje abo alternatiwu našło.
Teritorije a ličba wjelkow přiběrali
Sakski krajny wobswětowy zarjad je wčera wuslědki monitoringoweho lěta 2020/2021 wo wjelkach wozjewił. Tak zwěsćeja, zo jenož ličba wjelkow njepřiběra, ale zo je tež wjac teritorijow, w kotrychž je rubježnik doma.
Drježdźany (SN/JaW). W Sakskej je ličba wobkrućenych wjelčich teritorijow na 34 rozrostła. To su tři wjac hač před lětom, kaž z wuslědkow monitoringoweho lěta 2020/2021 wuchadźa, kotrež je Sakski krajny zarjad za wobswět, ratarstwo a geologiju (LfULG) wčera wozjewił.
Ze Sprjewje žanu wodu njebrać
Choćebuz (SN/at). Ze swětłowej instalaciju na Sprjewi je Choćebuska wobswětowa skupina předwčerawšim přećiwo planowanemu trajnemu branju wody z rěki za Janšojsku milinarnju protestowała. Na powjerch wody buchu słowa „Tale woda słuša do Błótow – nic do chłódźenskeje wěže!“ projicěrowane, kaž Zelena liga wčera informowaše. Ze swojej akciju žadachu sej škitarjo wobswěta wot braniborskeho knježerstwa, zo so wone planam zmilinjenja brunicy LEAG wotrjeknu. Předewzaće je próstwu stajił, směć wodu ze Sprjewje brać, zo by ju w Janšojskej milinarni jako chłódźensku wodu wužiwało. To je wuslědk dohlada Zeleneje ligi do aktow w braniborskim krajnym zarjedźe za wobswět. Hinak hač při zapławjenju bywšich brunicowych jamow směła milinarnja samo při niskej wodźe rědku wodu ze Sprjewje brać, rěka w zdźělence wobswětoškitarjow.
„Sprjewja trjeba přichodnje kóždy kubikny meter wody. Nětko tež hišće Sprjewinu wodu w milinarni wuparjeć, by njezamołwite było“, kritizuje Renej Šuster ze zwjazkoweho kontaktnišća brunica Zeleneje ligi.
