Figura z interneta je minjeny kónc tydźenja w Stróži (Wartha) lětuše Łužiske rybowe tydźenje wotewrěła. Tež hewak je to a tamne hinak hač lěta do toho wotběžało.
Stróža (UM/SN). Módro-běła smužkata matrozowa košla, žołty kabat, gumijowe škórnje, čerwjenu čapku na hłowje a šibały posměwk: To je Franzi. Holčka z rybarskeho dwora, kotraž hižo něšto měsacow w interneće na łužisku rybu skedźbnja. Tola kak so naraz realna stanje? „Cyle jednorje: Sym čłonka młodźinskeho dźiwadła NLSDź“, rozłoži Greta. Wšako je Greta Brückner prawe mjeno figury Franzi. A wona tež njeje hakle dźewjeć, ale hižo 13 lět. Hewak pak ma rodźena Budyšanka ze swojim wirtuelnym přikładom tójšto zhromadneho – hač k lubosći k přirodźe a domjacej rybinje.
Podstupim (dpa/SN). Twarc elektroawtow Tesla z USA za swoju fabriku pola Berlina prawdźepodobnje přizwolenje dóstanje, zdźěli wčera braniborski hospodarski minister Jörg Steinbach (SPD). W rozmołwje z dźenikom Frankfurter Allgemeine Zeitung liči Steinbach 95procentowsce z pozitiwnym rozsudom. Dotal jenož hišće wobswětoprawniska dowolnosć krajneho wobswětoweho zarjada Braniborskeje pobrachuje. Twar fabriki pak je mjeztym hižo chětro postupował, dokelž Tesla na zakładźe dočasnych přizwolenjow dale twari. Wobswětowe zwjazki a wobydlerjo pak widźa rizika.
Hospodarski minister wumjetuje koncernej Tesla „pobrachowacu wotewrjenosć ludźom napřećo. Bych sej přał, zo Tesla starosće wobydlerjow chutnišo bjerje.“ Poprawom chcyše Tesla hižo w juliju z produkciju elektroawtow započeć, mjeztym pak to kónc lěta planuje.
Budyšin (SN/BŠe). Za dwaj měsacaj spožča zaso Hornjołužiske předewzaćelske myto, za kotrež hodźa so hišće hač do 24. septembra namjety podać. Hłowne hesło wuznamjenjenja je lětsa New York. Što pak za tym tči, a kak so Hornja Łužica w nim jewi?
Z lětušim hesłom Hornjołužiskeho předewzaćelskeho myta njezwjazuja metropolu USA New York, ale dźe wo filozofiju Frithjofa Bergmanna. Wusměrjenje předewzaća skići sobudźěłaćerjam nowe móžnosće, nańć balansu mjez swójskim dźěłom a žiwjenjom. Organizatorojo předewzaćelskeho myta, Marketingowa towaršnosć Hornja Łužica-Delnja Šleska, reaguja tak na měnjate ramikowe dźěłowe wuměnjenja. Dźěłowy swět dźě so runje w zwisku z digitalizaciju přeměnja. Situacija a wužadanja kołowokoło korony wuwiće samo pospěšeja. Předewzaća a předewzaćeljo we wjesnych kónčinach maja wjetše ćeže, wuměnjenjam wotpowědować. Wopřijeće New York zjednoća měnjacy so dźěłowy swět a z tym zwisowacu filozofiju.
75 rjemjeslniskich su na swjatočnosći Budyskeho wokrjesneho rjemjeslnistwa w Němsko-Serbskim ludowym dźiwadle minjeny pjatk z wukubłanja wuwjazali a jim wuswědčenja přepodali.
Budyšin (CS/SN). Młodźi ludźo su powołanje pjekarja, rěznika, wšelakich fachowych předawarjow, frizerki, mulerja, třěchikryjerja, blidarja kaž tež překupče a překupca w běrowowym managemenće nawuknyli. Lětnik měješe so ćešo hač tamne, dokelž je w času korony něštožkuli hinak běžało hač zwučene. Předewšěm wučba w powołanskej šuli bě zdźěla wupadnyła abo bu digitalnje podawana. Frizerki njejsu zawrjenych zawodow dla zdźěla praktisce dźěłać móhli. Wone maja so tež dźensa hišće z najwjace wobmjezowanjemi bědźić. Zasadnje je wola, so wukubłać dać, přez koronu haćena była, rjekny zastupowaca wokrjesna rjemjeslniska mišterka, frizerka Szilvia Schiffel. Wobžarujomny sćěh z toho je, zo přichodnje žane frizerki a žani pjekarjo swoje powołanskošulske wukubłanje w Budyšinje wjac njezměja, dokelž bě so přemało młodostnych přizjewiło.
Kóšyna (AK/SN). Hižo wot lěta 2012 wobstejacy mjezy přesahowacy turistiski zwjazk Łužiska jězorina bjezbarjerny dowol nastupajo zaměrnje dale dźěła. To podšmórny wčera jednaćelka zwjazka Kathrin Winkler w Kóšynje (Großkoschen). W tamnišim prózdninskim domicilu „Sonnenhof 1864“ su sej turistikarjo z Braniborskeje w běhu dweju dnjow nazhonjenja a mysle wuměnjeli. Do zetkanja běchu organizatorojo dźěłarnički na temu turizm bjez zadźěwkow w Braniborskej zarjadowali.
„Na prěnim workshopje dźěše wo bjezbarjerny přistup k jězoram. Na druhim wobjednawachmy přikłady braniborskeho a sakskeho dźěla jězorinoweho zwjazka“, jeho jednaćelka rozłoži. Wuslědk rěkaše, zo su hišće wulke rezerwy. Zdźěla hač do 14 metrow wysoke nasypy maja tež za ludźi w jězbnym stole přewinjomne być. Ćežko zwoprawdźić hodźi so tohorunja přistup k wodźe po pěskojtym přibrjohu.
Trójce do Delnjeje a jónu do Hornjeje Łužicy du lětuše myta Łužiskeho wubědźowanja załožerjow eksistency (LEX), kotrež je Łužiska hospodarska iniciatiwa (WiL) za najlěpši předewzaćowy koncept nětko w Lěšćach spožčiła.
Lěšće (SN/at). Wšitke štyri wobchodniske ideje, kotrež běchu jurorojo za myto nominowane spočatk awgusta zjawnosći prezentowali, buchu nětko mytowane. WiL jako wuhotowarka je so rozsudźiła, w 17. lětniku tohole wubědźowanja dwě třećej myće spožčić. Rozsud za to mjenowaše dr. Markus Binder, předsyda WiL a jury LEX, wosebite wužadanje: „Fakt, zo smy dwě třećej městnje rozdali, pokazuje, kak ćežko nam bě, z jara dobrych wobchodniskich planow najlěpše wuzwolić.“
Kulow (AK/SN). Mějićeljo wobchodow, wikowarjo, hosćencarjo a posłužbarjo w Kulowje hromadźe dźerža. Woni wobydlerjow pohnuwaja na městnje w domiznje nakupować. Wuslědk to akcije koronowych dobropisow, kotruž su w měsće přewjedli. „Iniciatiwa je wulki wothłós žnjała. W aprylu wudatych 250 dobropisow bě spěšnje rozebranych“, hódnoći sobuorganizatorka a Kulowska wobchodnica Birgit Bensch. Měšćanski radźićel Alex Scholze (SPD) bě akciju nastorčił, orientujo so při tym na podobnej iniciatiwje w Załomju. Město Kulow je projekt z 2 500 eurami podpěrało. „Zaměr bě, domjacym małym wobchodam w koronowej krizy pomhać. Chcychmy na te wašnje mnohotnosć wobchodow a hosćencow zachować“, Birgit Bensch rozłožuje.