Na mnohich łužiskich šulach wučbu horcoty dla tuchwilu skrótšeja
Budyšin (SN/pdź). W juliju a awgusće temperatury zwjetša njesmilnje stupaja. Hdyž pokazuje termometer wjac hač 30 stopjenjow, wonka lědma šće wutraješ. Tola z blakami je nutřka tež tak ćopło, zo je ćežko so na swoje dźěło koncentrować. Runje tak kaž ma předewzaćel winowatosć, so wo dobre a strowe dźěłowe wuměnjenja za swojich přistajenych postarać, dyrbi šulski nawoda garantować, zo su wonkowne wobstejnosće za wuknjenje so hodźace. Při tym hraje temperatura wulku rólu: w šuli njesmě być přezyma, ale tež nic přećopło. W Braniborskej na přikład doporuča kultusowe ministerstwo, zo smědźa šule wučbu w dwanaćich skónčić, hdyž přeprěči temperatura wonka w dźesaćich 25 respektiwnje w šulskim twarjenju w jědnaćich 26 stopjenjow. „Tajkich směrnicow w Sakskej njeje“, zdźěli nowinski rěčnik krajneho zarjada za šulu a kubłanje (LaSuB) Clemens Arndt. „Přiměrjenje wučbnych časow na wonkowne wobstejnosće leži w zamołwitosći šulskeho wjednistwa. Tute indiwiduelnje rozsudźi, wšako maš w kóždej šuli hinaše wuměnjenja.