W Nuknicy a předewšěm wokoło tamnišeje skały knježi tele dny móhłrjec zaso wuwzaćny staw. Tam maja młodostni ruce połnej dźěła z přihotami kóždolětneho hudźbneho festiwala.
Nuknica (tw/SN). Słónco smali. Na zelenej łuce blisko Nukničanskeje skały traktor brunči. Sydom młódšich holcow a hólcow křesła, blida, stólcy a wulke płachty za stany z připowěšaka ćaha. Byrnjež so poćili, su wšitcy dobreje nalady. „Mamy hišće tójšto dźěła, zo bychmy pjatk wopytowarjow na Nukstock witać móhli“, rozłožuje Syman Deleńk, sobustaw towarstwa Barakka, „stany, jewišćo, technika kaž tež dekoracija – na wšitko dyrbimy kóžde lěto znowa myslić a zaso natwarić.“