Krótkopowěsće (02.11.23)
Wožiwjenje wuwostało
Budyšin. W oktobrje bě we wuchodnej Sakskej 19 452 bjezdźěłnych, 111 mjenje hač w septembrje. Kaž Budyska wotnožka Zwjazkoweje agentury za dźěło dźensa informuje, je lětsa we winowcu typiske nazymske wožiwjenje na tudyšich dźěłowych wikach wuwostało. Firmy su mjenje swobodnych dźěłowych městnow přizjewili. Zdobom móhło mjenje bjezdźěłnych nowe dźěło nastupić.
Ze serbskimaj kěrlušomaj
Drježdźany/Budyšin. Ewangelska cyrkej w Němskej přihotuje nowe spěwarske. Za sakski regionalny dźěl planuja tuchwilu jedyn abo dwaj serbskej kěrlušej, kaž Markus Leidenberger, krajny cyrkwinski hudźbny direktor Ewangelsko-lutherskeje krajneje cyrkwje Sakskeje, na naprašowanje zdźěli. To ma tež za cyłu Saksku wěsty wuznam, rjekny Jan Malink, serbski superintendent na wuměnku. Namjety zapodać je hišće móžne.
Z nowym předsydu
Krótkopowěsće (01.11.23)
Žadanje zwjazkowych krajow
Berlin. We wobłuku nastorčeneje reformy mjenoweho prawa w Němskej je Zwjazkowa rada stejišćo zapodała. Wona žada sej hladajo na splahej přiměrjenu formu swójbneho mjena, nowe rjadowanja na wosoby wobmjezować, kotrež maja hišće subjektiwny zwisk k tutomu rěčnemu a kulturnemu rumej. Tajke formy su předewšěm w słowjanskich krajach a w serbskich tradicijach z wašnjom.
Nakładnistwowe myto 2024
Drježdźany. Faza požadanja za Sakske nakładnistwowe myto 2024 je so dźensa zahajiła. Dźěło nakładnikow prěni raz w štyrjoch kategorijach počesća. Hač do 11. nowembra móža so sakske nakładnistwa w kategorijach „program nakładnistwa“, „poćahi při tworjenju hódnotow“, „přistup k wuhotowanju a produkciji“ a „widźomnosć stejnišća nakładnistwow a knihow Sakska“ požadać. W poslednjej kiwatej wosebitej myće.
Rudne horiny w srjedźišću
Krótkopowěsće (30.10.23)
Žada sej wotstup ministra
Drježdźany. Načolny kandidat sakskeje FDP za wólby Sakskeho krajneho sejma 2024, Robert Malorny, žada sej wotstup sakskeho ministra za ratarstwo Wolframa Günthera (Zeleni). Tón wohrožuje po měnjenju Malornyja hospodarsku eksistencu sakskich ratarjow, kotřiž maja wurunanske popłatki EU hakle w januaru abo februaru 2024 dóstać a nic, kaž bě planowane, lětsa w decembru.
Ličby spaduja
Drježdźany. Z naprawami, kaž twarom škitnych płotow, pytanjom a chowanjom sćerbow a intensiwnym hońtwjerjenjom dźiwich swini je so poradźiło, ličbu infekcijow Afrikanskeje swinjaceje mrětwy we wokrjesu Budyšin, Zhorjelc a dźělemi wokrjesa Mišno znižić. Statna ministerka Petra Köpping rěči wo wulkim napinanju, zo njebychu so infekcije na zawody z domjacymi swinjemi rozpřestrěli.
Młode perspektiwy na wěru
Krótkopowěsće (27.10.23)
Kupjel pječa hakle 2027 wotewru
Korzym. Terma w Korzymje njedóstanje lětsa hižo žane spěchowanske srědki za přetwar a renowaciju. Sven Gabriel, předsyda zaměrneho zwjazka Korzymska terma so nětko starosći, zo njezměja tež klětu žane srědki k dispoziciji. „Njedóstanjemy-li spěšne připrajenje srědkow za 2024, potom njehodźi so kupjel hižo 2026 wotewrić, ale hakle 2027“.
Dalši kónc dróhi wutwarja
Wojerecy. Zwjazkowu dróhu 97 móža w Němcach dale wutwarić. Kaž zdźěli krajna direkcija Sakska, ponowja jězdnu na dołhosći jednoho kilometra. Tež kolesowarski puć a chódnik matej nastać. Nětko chcedźa hač ke kupnicy twarić, wšako bu w zašłosći hižo čwak dróhi ponowjeny.
Okupaciju Krimy spominali
Krótkopowěsće (26.10.23)
Wotběhi a procesy zeznali
Budyšin. Zastupjerjo Załožby za serbski lud, Serbskeho muzeja a Serbskeho instituta su so wčera z architektami dobyćerskeho běrowa wupisanja architekturneho wubědźowanja za „Serbski forum wědy“ na dźěłarničku zešli. W zetkanju w Röhrscheidtowej bašće chcychu architekća wosebje dźěłowe wotběhi a procesy a z tym zwisowace naroki wšitkich w twarje zaměstnjenych institucijow zeznać.
Firmownikow počesćili
Budyšin. Łužiske předewzaćelske myto 2023 su třom firmownikam z Budyskeho a Zhorjelskeho wokrjesa wčera w Budyskim Dźiwadle na hrodźe spožčili. Jury měješe z 29 zapodatych nominowanjow rozsudźić. Lawreaća su Robert Gey z firmy Charlotte Meentzgen Kräutervital Kosmetik GmbH w Radebergu, Susanne Mütze z Blidarnje Mütze tzwr w Kamjencu a Achim Kittner z Hatarstwa Hóznica.
Medalja Rakečance
Krótkopowěsće (25.10.23)
Sakske wysoke šule požadane
Drježdźany. Sakske uniwersity, wysoke šule a powołanska akademija móžachu na spočatku zymskeho semestra ličby studijnych nowačkow zwyšić. Na 14 statnych wysokich šulach je něhdźe 15 000 młodych ludźi prěni raz studij nastupiło, 1 000 wjace hač loni. W powołanskej akademiji Sakskeje maja 1 569 nowych zapisanjow, loni bě jich 1 532.
Wupad wučby nadal wulki
Drježdźany. Wupad wučbnych hodźin na šulach Budyskeho wokrjesa je nadal wulki, zwěsća sakske kultusowe ministerstwo hladajo na druhe šulske połlěto 2022/2023. Najwjetši wupad 12,5 procentow je w spěchowanskich šulach. Něhdźe 10 procentow hodźin wupaduje na wyšich šulach, dźewjeć procentow na gymnazijach. Zakładne šule maja ze 4,3 procentami najnišu kwotu wupada. Hłownej přičinje stej zo nadal wučerjo a šulske rumnosće njedosahaja.
Nowy profil Kretschmera
Krótkopowěsće (24.10.23)
Hroženje z bombu dóšło
Połčnica. Z mailku wot njeznateho wotpósłarja je dźensa hroženje z bombu na zakładnu šulu w Połčnicy dóšło. Kamjenska policija je na to hnydom šulski areal, ke kotremuž tež wyša šula słuša, ewakuowała. Kriminalna słužba pad přepytuje. Policija po cyłej Němskej je hižo zawčerawšim wjacore hroženja z bombu registrowała. W žanym padźe pak rozbuchadło namakała njeje.
Kandidata nominowali
Połčnica. Jens Domann kandiduje za CDU k wólbam wjesnjanosty gmejny Sprjewiny Doł 10. měrca 2024. Jeho je Budyski wokrjesny zwjazk strony na stronskim zjězdźe w Połčnicy z 95 procentami wšěch hłosow nominował. 38lětny nan štyrjoch dźěći je wuwučeny blidar kaž tež hospodarski inženjer a bydli w Drětwi (Zerre), wjesnym dźělu gmejny Sprjewiny Doł.
Njepřetřělomne lacy za Israel
Krótkopowěsće (23.10.23)
Nowy rěčnik dźěłoweje skupiny
Zagreb. Městopředsyda Domowiny dr. Hartmut Leipner je nowy rěčnik dźěłoweje skupiny słowjanskich mjeńšin w Federalistiskej uniji europskich narodnosćow (FUEN). Wot wšitkich dźěłowych skupin je tuta z 32 přisłušnymi organizacijemi najwjetša pod třěchu FUEN. Leipner bu we wobłuku seminara słowjanskich mjeńšin minjeny pjatk w Zagrebje wuzwoleny, na kotrymž hromadźe z hłownej jednaćelku Judit Šołčinej Zwjazk Łužiskich Serbow zastupuje.
Wołtar a ambo poswjećenej
Chrósćicy. Po jednym lěće nutřkowneho přetwara Chróšćanskeje cyrkwje je biskop Heinrich Timmerevers sobotu wołtar a ambo poswjećił a z wosadu prěnje kemše w Božim domje swjećił. Mjez druhim je wołtarnišćo nětko na jednej runinje, wobswětlenje je indirektne a nabóčny kaž tež chór pod pišćelemi dósta nowe wobłoženje. Projekt płaćeše 1,2 milionaj eurow.
Lěwica nětko z dwójnym čołom
Krótkopowěsće (20.10.23)
Wjelki skónčnje třělić
Budyšin. Hladajo na wospjetowace so pady wjelčich nadpadow, žada sej Budyski krajny rada Udo Wićaz (CDU), zo dyrbjeli zamołwići skónčnje rozsudźić, wjelki Róžeńčanskeje črjódy třělić. Rubježne zwěrjata su wospjet stadło wowčerja Gerata Šmita nadpadnyli. Dalše chabłanje zarjadow njeje za potrjechenych hižo logiske.
Kemšaca kniha wušła
Hodźij. W zamołwitosći Serbskeho wosadneho zwjazka je nětko nowa „Kemšaca kniha“ wušła. Wona wobsahuje wšitke teksty, kotrež so prawidłownje na ewangelskich kemšach wužiwaja. Je to wjace hač 600 wotrězkow z biblije, kemšaca liturgija a něhdźe 150 modlitwow. Zakład za bibliske čitanja je přełožk Swjateho pisma z lěta 1728, Serbska superintendentura w Hodźiju informuje.
Nowa wustajeńca
Krótkopowěsće (19.10.23)
Ćežke njezbožo na A4
Budyšin. Z dotal njeznatych přičin zhubi šofer nakładneho awta na awtodróze mjez Wósporkom a Budyšinom kontrolu nad swojim jězdźidłom a zrazy do nadróžneje hrjebje. Wón poćerpi jenož lochke zranjenja. Tamny na njezbožu wobdźěleny šofer dyrbješe ćežko zranjeny z helikopterom do chorownje. Policija je A4 wot wčerawšeho wječora hač do dźensnišeho dopołdnja dospołnje zawrěła.
Myto za Grit Lemke
Neumünster. Za swój dokumentariski roman „Kinder von Hoy“, wušły w nakładnistwje Suhrkamp, dóstanje režiserka a spisowaćelka Grit Lemke lětuše myto Hansa Fallady města Neumünster. Wuznamjenjenje je z 10 000 eurami dotěrowane a budźe so jej přichodne lěto w měrcu swjatočnje přepodać.
Najdróše e-cigarety
