Serbske blido nachwataja
Drježdźany. Přichodne Serbske blido w sakskej stolicy wotměje so jutře, srjedu, we 18 hodź. w korčmje „Am Thor“ na Hłownej dróze 35. Z tym nachwataja Serbske blido, kotrež je 17. apryla wupadnyło, dokelž běchu wšitcy na filmowe popołdnjo a bjesadu na Hrodźe Lingnera přeprošeni. Kaž organizator Benedikt Drylich zdźěli, su sej tehdy dorěčeli, Serbske blido na jutřišej srjedźe přewjesć.
Sinfoniski koncert SLA
Budyšin. Serbski ludowy ansambl wuhotuje w kooperaciji z Nowej łužiskej filharmoniju štwórtk po swjatkach, 23. meje, w domje NSLDź sinfoniski koncert. Składnostnje 90. posmjertnych narodnin Jana Pawoła Nagela předstaja jeho „Sinfonija V – Tři modlitwy“. Dale steji „9. sinfonija“ Dimitrija Šostakowiča na programje. Koncert zakónči so z „Klawěrnym koncertom čo. 5“ Ludwiga van Beethovena. Hraje koncertna pianistka Heidemarja Wiesnerec z Berlina.
Za dyrdomdej so přizjewić
Bachowa kantata zaklinči
Chróstawa. W Chróstawskej cyrkwi wotměje so swjatki njedźelu, 19. meje, w 16 hodź. koncert z twórbami Johanna Sebastiana Bacha. Pod nawodom kantora Hansa Christiana Martina hraje Drježdźanski barokowy orchester. Zaspěwatej kurenda a cyrkwinski chór Chróstawa. Zaklinčeć budu tež Silbermannowe pišćele. Wot 15 hodź. je koncertna kofejownja wotewrjena. Zastup je darmotny, wo pjenježny dar so prosy.
Do hwězdarnje
Budyšin. „Wotkryj sej swětnišćo“ – tak rěka dalše wudaće dźěćaceje serije „Što je što junior“ za słuchopisak BOOKii. Ludowe nakładnistwo Domowina a Radworska staršiska iniciatiwa přeprosytej pěstowarske a šulske dźěći kaž tež hobbyjowych hwězdarjow na knižnu premjeru 23. meje w 16.30 hodź. do Budyskeje hwězdarnje. Hwězdar rozkładźe z pomocu teleskopa, kak wosebite hwězdy na njebju nadeńdźeš. Zdobom póńdźe wo styki k astrofyzice.
Na filmy ze serbskeho kraja
Fachowy dźeń
Budyšin. Budyska fachowa poradźowarnja swjeći lětsa swoje 25lětne a Budyski Dźěłowy kruh přećiwo seksualizowanej namocy swoje dźesaćlětne wobstaće. To je zarjadnišćomaj składnosć, fachowy dźeń na temu seksualizowana namóc mjez młodostnymi wuhotować. Zarjadowanje wotměje so jutře, 16. meje, wot 9 hodź. na Wysokej šuli Sakskeje policije w Budyšinje na Kantowej 25.
Na čitanje
Budyšin. Spisowaćelka Monika Maron čita pjatk, 17. meje, we 18.30 hodź. w Budyskim Antikwariaće při Tachantskej cyrkwi. Jeje romany wabja do diskusije. Wulkeho zajima dla je jenož hišće mało swobodnych městnow.
Z Romanom Knižku spominać
Budyšin. W Budyskim wopomnišću na Weigangowej 8a wuhotuje z Budyšina pochadźacy dźiwadźelnik Roman Knižka jutře wječor w 19 hodź. literarno-hudźbne čitanje. W geto Terezin su nacionalsocialisća wjace hač 140 000 židowkow a židow zajeli, mjez nimi mnohich wuměłcow. Swoje čitanja wěnuje Knižka twórbam wuměłcam, kotřiž su tam ćerpjeli.
Jubilej w Němskich Pazlicach
Zapósłanča přeprošuje
Berlin. Zapósłanča zwjazkoweho sejma Kathrin Michel (SPD) přeprošuje zajimowanych wobydlerjow na politisku informacisku jězbu wot 29. hač do 30. meje do Berlina. Zwjazkowy nowinarski zarjad jězbu organizuje a tež financuje. Přenocowanje, přijězd a wotjězd z busom a wjetši dźěl zastaranja su inkluziwne. Wobdźělnicy dóstanu dohlad do dźěławosće zwjazkoweho sejma a ministerstwow. Kołojězba po měsće a wopyt muzeja jězbu wudospołnitej.
Zajimcy njech so přizjewja pod: abo telefonisce pod čisłom: 03591 2744690. Dalše informacije namakaće .
Wobornicy a hosćo přeprošeni
Róžant. Wohnjowe wobory zarjadniskeho zwjazka Při Klóšterskej wodźe a susodne wobory swjeća pjatk, 10. meje, dźaknu Božu mšu k swjedźenjej swjateho Floriana. Wona započnje so w 19 hodź. w Róžeńčanskej hnadownej cyrkwi. Wšitcy wobornicy kaž tež hosćo su k tomu přeprošeni. Lětuši organizator Božeje mšě je gmejnska wohnjowa wobora Ralbicy-Róžant.
Zhromadnje spěwaja
Budyšin. Wjednistwo Zwjazka serbskich spěwarskich towarstwow (ZSST) přeprošuje na dalše terminy za zhromadne spěwanje, a to 21. meje, 4. junija, 2. julija, 6. awgusta a 3. septembra. Zajimcy zetkaja so wot 18 do 20 hodź. w chórowej rumnosći Serbskeho ludoweho ansambla. Organizatorojo wokoło Lubiny Žurec-Pukačoweje nadźijeja so mnohich wopytowarjow.
Jutře na kupu
Radwor. Na jutřišim dnju muži móža sej skupinki kolesowarjow mjez druhim na Radworsku kupu dojěć. Wot 10 hodź. witaja tam wopytowarjow z live hudźbu, chłódnymi napojemi a kulinariskimi wosebitosćemi. Kaž kupowe zjednoćenstwo zdźěli, su tež cyłe swójby witane.
Na wjesny swjedźeń
Młodostni klub porjeńšili
Hórki (mj/SN). Hórčanska młodźina je so minjenu sobotu k nalětnjej akciji při klubje zetkała. Hłownej cilej běštej nutřkownu rumnosć kluba barbić a wolejbulowe městno zaso porjeńšić. Nutřkowna rumnosć bě dotal hišće cyle bjez barby a na sćěnach běchu jenož małe molowanki narysowane. Wolejbulowe polo běše połne z njerodźu zarosćene. Nimo hrajneho pola bě tež sak skóncowany. Wón dyrbješe so znowa přahać. Po tym młodostni hišće ležownosć wokoło kluba wot njerodźe wuswobodźichu a wurjedźichu.
Hdyž wohenje powědaja
Do instituta kapałnikow
Drježdźany. Drježdźanski institut kapałnikow přeprošuje wšitkich, kotřiž so za hólči chór zajimuja, a jich staršich na dźeń wotewrjenych duri. Tón wotměje so jutře, sobotu, wot 11.30 hodź. na Wittenbergskej 88 w Drježdźanach. Zajimcy změja mjez druhim składnosć, zjawne proby sćěhować, předspěwać a sej tohorunja institut wobhladać.
Live hudźba w korčmach
Budyšin. Jědnaće barow a hosćencow w Budyšinje wobdźěli so jutře, sobotu, na Budyskim korčmowym festiwalu. W nich zaklinči wot 20 hodź. live hudźba najwšelakorišich žanrow. Korčmarjow při přihotach podpěrało je měšćanske turistiske towarstwo. Korčmowa mila powjedźe wot Jerjoweje přez Bórklin, Hrodowu, Mjasowe wiki a Kamjentnu hač na Cyrkwinske naměsto.
Na Třělnišću twarja
Budyšin. Přichodny tydźeń so dźěl Třělnišća za parkowanje awtow nachwilnje wužiwać móc njebudźe. Přičina su twarske dźěła na zadnim dźělu parkowanišća, kotrež njeje skrućene. Wone započnu so póndźelu, 6. meje, a maja tři dny trać. Šoferojo měli swoje awto w tym času w prědnim dźělu Třělnišća parkować.
Do robotiki so zanurić
Meju hižo mjetaja
Pančicy-Kukow. Na zwučene wašnje je w Kukowje hižo prěni kónc tydźenja róžownika mejemjetanje, kotrež młodźinski klub organizuje. Tři dny trajacy swjedźeń zahaja jutře, pjatk, w 16.30 hodź. z kinom za dźěći. Tomu slěduje w 19 hodź. kino za dorosćenych. Wot 21 hodź. su wšitcy na party z DJjom Guidom a Hangover Crew přeprošeni. Sobotu poskićuja w swjedźenskim stanje wot 15 hodź. kofej a tykanc. W 16 hodź. je mejemjetanje dźěći a młodostnych předwidźane. Mejske reje z kapału Serbeat a DJjom Guidom započnu so w 20.30 hodź. ze zaćahom mejskeho pora. Něhdźe w 21 hodź. předstaja młodostni swój žortny program. Njedźelu k rańšemu piwku wot 11 hodź. a k wobjedej wot 12 hodź. zahudźa Chróšćanscy muzikanća. Při wustupje chóra Šule Ćišinskeho móža sej hosćo kofej a tykanc słodźeć dać. W 15.30 hodź. zahudźi skupina Šwintuchi.
Zhromadnje rejować
