Twar centruma so nachila
Wojerecy (AK/SN). Kónc julija ma we Wojerowskim starym měsće wobydlerski centrum Konrada Zuseho, hdźež bu 1912 Domowina załožena, zakónčeny być. Spočatk awgusta poslednje twarske dźěła překontroluja. Wot 10. awgusta móžetej přichodnej podružnikaj a wužiwarjej – přirodowědno-techniski dźěćacy a młodźinski centrum NATZ a kulturna fabrika – zaćahnyć. 5. septembra chcedźa wobydlerski centrum wotewrěć. Tónle časowy wotběh zdźěli nawoda twarskeho wotrjada Wojerowskeho měšćanskeho zarjadnistwa Dietmar Wolf na wčerawšim posedźenju měšćanskeje rady.
Tuchwilu su suchotwar, poslednje woclotwarske, molerske a špundowanske dźěła na rjedźe. Runočasnje přihotuja wupisanje za wšitke zamki w domje kaž tež za wodźenski system. Tón ma po wčerawšich wuprajenjach Dietmara Wolfa tež serbskorěčny być, tak zo serbscy wopytowarjo tež w swojej maćeršćinje zhonja, dokal maja w domje hić, hdyž chcedźa tam něšto wobstarać. Dohromady dyrbja hišće nadawki za nimale 150 000 eurow rozdawać.
Krótkopowěsće (27.05.15)
Wulki zajim za listowe wólby
Choćebuz. Požadanska doba k zapisanju do wolerskeho zapisa za wólby Rady za serbske naležnosće Braniborskeje je so swjatki njedźelu skónčiła. Wólbny wuběrk je swjatki póndźelu poslednje wólbne podłožki póstej k rozpósłanju přepodał. Kaž předsyda wuběrka Jörg Masnik na naprašowanje zdźěli, bě so něhdźe 1 600 braniborskich Serbow zapisać dało.
Kniha wo kóncu wójny wušła
Budyšin. Ludowe nakładnistwo Domowina je wudało knihu Křesćana Krawca „Hdźe je kóčka wostała?“. Na jara putace, ale tež awtentiske wašnje powěda spisowaćel dźěćom wot šěsć lět wo kóncu wójny – a to z wida dźěsća. Uwe Häntsch je powědku barbnje ilustrował. Kniha wuńdźe składnostnje 70. róčnicy zakónčenja Druheje swětoweje wójny.
ABIchallenge Łužiskeje uni
Choćebuz. Braniborska techniska uniwersita Choćebuz-Zły Komorow pyta znowa najfitnišeho, najkreatiwnišeho a najmudrišeho abiturienta. 1. julija zahaji so 8. ABIchallenge na centralnym campusu w Choćebuzu, hdźež móža šulerjo pokazać, što w nich tči.
Wobě hrě live na MDR
Policija (26.05.15)
Při zaparkowanju zwrěšćiła
Běła Woda. Wulke ćeže, swoje awto porjadnje na parkowanišću wotstajić, měješe wčera rano 39lětna wodźerka Opela Astra na Humboldtowej w Běłej Wodźe. Při pospyće, jězdźidło na kmane městno stajić, wobškodźi wona tři wosobowe jězdźidła typa Mercedes, Opel a Citroën, na čož městno wopušći. Kedźbliwy wobydler pak bě wšitko wobkedźbował a policiju informował. Zastojnicy žonu hišće w bliskosći lepichu. Spěšnje so tež přičina jeje jězbnych problemow wukopa. Pola njeje mjenujcy naměrichu dwaj promilej alkohola w kreji. Starosće ze zaparkowanjom wona tuž najprjedy raz žane njezměje.
W lěsu so chować chcył
Tyhelk. Kedźbliwi wobydlerjo zwěsćichu njedźelu rano w Tyhelku (Tiegling) we Łazowskej gmejnje, zo je na terenje twarskeje firmy cuza wosoba. Jako alarmowani policisća a stafla z psami přijědźechu, podhladna wosoba ćekny a so w lěsu schowa. Dźakowano psam pak 29lětneho spěšnje namakachu a nachwilnje zajachu. Hač bě wón sam abo hač měješe komplicu, policija nětko přepytuje.
Posledni raz na Pastwinej horje
Wulki zajim za wětrnik knježił
Łuh (ML/SN). 24 króć móžachu so zajimcy wčera na wodźenju po historiskim wětrniku na kózłach z lěta 1733 na hórce Łóžko mjez Łuhom a Chasowom wobdźělić. Mjez druhim wodźeštaj jich Njeswačanski wjesnjanosta Gerd Schuster (CDU) a zamołwita za turizm gmejnskeho zarjada Kathleen Barthen jako młynk a młynska po techniskim pomniku. Při tym zhonichu wopytowarjo tójšto zajimaweho wo tym, kak běchu tam něhdy žito mlěli, kak ćežke bě dźěło wětrnika a žiwjenje młynka a jeho swójby, a móžachu sej młyńcu wobhladać.
Na wčerawšim 22. němskim dnju młynow běchu sobudźěłaćerjo Njeswačanskeho gmejnskeho zarjada zaso wokřewjacy swjedźeń za młodych a starych kołowokoło bywšeho Zarěčanskeho wětrnika wuhotowali, kotryž dósta 1978 na Łóžku swoje nowe městno. Kapała Hornjokrajni muzikanća zapiska tam wčera lóštne štučki a zaruči tak znowa, kaž hižo wot lěta 2003, dobru naladu. Dźěći so na łuce zabawjachu a Łuhowski klub Wittinghoff staraše so wo ćělne derjeměće wopytowarjow.
Tež serbske pěsnje zaklinčeli
Budyšin. Nimale 30 čłonow a přećelow měšćansko-partnerskeho towarstwa Budyšin-Dreux poda so njedawno z busom na jězbu do francoskeho města, z kotrymž Budyšin wuske přećelstwo zwjazuje a kotrež něhdźe 80 kilometrow zapadnje Parisa leži. Wšitcy sobujěducy přebywachu w hóstnych swójbach. Někotři znaja so hižo wjele lět, druzy běchu prěni raz pódla. Jich runje tak wutrobnje pohosćichu kaž „starych znatych“.
Nowosće na wjesnym swjedźenju
Wjesny dźěl Njebjelčanskeje gmejny Pěskecy ze swojimi lědma 230 wobydlerjemi bě swjatki mnohim přiwabliwy, a to nic jenož, dokelž wotmě so tam wčera 35. raz tradicionalny koparski turněr wjesnych mustwow.
Pěskecy (aha/SN). Nimale 80 sobustawow wopřijace sportowe towarstwo – najmłódši z nich je hakle pjatnaće, najstarši 70 lět – ze swojim agilnym předsydu Křesćanom Mjechelu je wjacore nowosće do swjedźenja zapřijało. Na wšěch dnjach sy čłonow towarstwa wuhladał w jich oranžowych trikotach z lipowym łopješkom a serbskim napisom Sportowe towarstwo Pěskecy.
Wažne hibićiwemu cyłkej je, zo maja w swojich rjadach tež čłonow wohnjoweje wobory z jich nawodu Křesćanom Matku a zastupjerjow młodźinskeho kluba, kotryž nawjeduje Patrik Šołta. Po tym zo běchu zašły tydźeń swjedźenišćo přihotowali a swjedźenski stan nastajili, hdźež hosći z „Witajće k nam“ strowjachu, bě sobotu wječor zazběh z koncertom skupin SerBeat a JANKAHANKA. Na to so młodostnym nóc z Berlinskimaj DJjomaj spěšnje miny.
Starosć wo duchowny dorost
Serbske katolske wosady swjatkownu póndźelu do Róžanta putnikowali
Róžant (SN/MWj). Hinak hač při lońšej njesměrnej horcoće bě tradicionalne swjatkowne putnikowanje serbskich katolskich wosadow do Róžanta wčera po wjedrje přewšo přijomne. Bjez dźiwa, zo so k hnadownemu městnu ze wšitkich wosadow poměrnje wulke procesiony nastajichu, w kotrychž družki postawu swjateje Marije njesechu. Po puću so jim dalši wěriwi přizamknychu. Nimo toho so mnozy z kolesom do Róžanta podachu.
Swjatočne kemše na putniskej łuce, hdźež běchu minjene tydźenje přichad k wołtarjej twarsce trochu změnili, wuhotowa tónkróć Chróšćanska wosada. Jeje farar Clemens Hrjehor je hromadźe ze šěsć dalšimi duchownymi Božu mšu swjećił. Hudźbnje wobrubichu ju Chróšćanski cyrkwinski chór pod nawodom Bernadet Hencyneje a wosadni dujerjo pod nawodom Symana Donata.
Krótkopowěsće (26.05.15)
Čěskemu koleze so dźakował
Berlin. Prezident zwjazkoweho sejma Norbert Lammert (CDU) je so swojemu čěskemu koleze Janej Hamáčekej při toho wopyće w zwjazkowym sejmje za parlamentariski program wuměny stipendiatow dźakował, kotryž je tež w čěskim domje zapósłancow wuspěšnje zaběžał. Při tym dojednaštaj so dale na direktne kontakty čěskich a němskich zapósłancow.
Chinske kupjele na Morawje
Brno. Chinska prowinca Hebei pola Pekinga chce w Pasohlávkach na južnej Morawje kupjelowy kompleks twarić. Projekt w hódnoće 80 milionow eurow měł za tři lěta hotowy być. Pacienća kupjelow maja być zastarani z klasiskimi europskimi procedurami; inwestorojo chcyli tež elementy tradicionelneje chinskeje mediciny poskićeć.
Zaso wjace samostatnych
Chronist wo swojej ródnej wsy přednošował
„Naše Worklecy su rjana měrliwa wjes, ležaca idylisce při Klóšterskej wodźe.“ Takle zahaji dr. Beno Wałda minjenu wutoru před seniorami tachantskeje wosady swój přednošk wo swojej ródnej wsy. Jako zubny lěkar, gmejnski radźićel, chronikar a tež druhdźe swoje talenty zasadźujo ma wón realistiski wid na wšědne žiwjenje ‚swojich‘ ludźi.
