Tež „traktor powětra“ widźeć był
Na 18. Budyskich lětanskich dnjach w Lětonju zličichu zarjadowarjo na wšitkich třoch dnjach cyłkownje něhdźe 10 000 hosći, štož maja za wulki wuspěch.
Budyšin (CS/SN). Na njebju nad Budyšinom so minjeny kónc tydźenja tójšto hibaše a bě zdobom wjele widźeć. Na lětanišću w Lětonju wotměwachu so 18. lětanske dny. Nimo mnohich modernych móžachu sej zajimowani wopytowarjo a tež wopytowarki tójšto historiskich lětanskich nastrojow wobhladać – po informacijach zarjadowarjow bě jich lětsa cyłkownje něhdźe 10 000.
Dźěło z pčołkami trěbne a wužitne
Nimo dalšich insektow su předewšěm tež pčołki za přirodu nimoměry wažne. Často pak sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym pčołkam a pčołarjam wěnujemy. (13)
Čłonka Róžeńčanskeho kružka pisacych Kata Domašcyna z Hórkow napisa baseń „Nalětnje začuća“, w kotrejž mjez druhim rěka: „... wšitko zynči, brunči, woblětuje štom. Potom spěšnje zaso tam pčołar hlada za prawom ...“.
Z pčołarjom je narěčany jeje mandźelski Měrćin, kotryž so mjeztym jako agilny wuměnkar z časa młodosće plahowanju starych sadowcow a pčołkow wěnuje. Woboje wobhladuje jako njedźělomny cyłk a woboje so mjez sobu wudospołnja.
Na jubilejnym a žnjowym swjedźenju minjeny kónc tydźenja w ...
Kak klinča dopomnjenki?
Krótkopowěsće (16.08.22)
Přepławjenja w Hornjej Łužicy
Wjazońca/Załom. Wčerawše njewjedra z wulkim mnóstwom dešća su tež někotre městna w Hornjej Łužicy přepławili. Wosebje horni kraj bě potrjecheny. W Załomju su něhdźe 37 litrow dešća na kwadratny meter na hodźinu naměrili. Wjesny hat we Wjazońcy bě přez brjohi stupił. Wohnjowa wobora dyrbješe wodu z pincow klumpać.
Wuprawa do Žitawskich hór
Worklecy. Na prózdninsku wuprawu Dekanatneho dušepastyrstwa je sej wčera 30 serbskich dźěći 5. do 8. lětnika do Žitawskich hór dojěło. Dźensa wopytowachu klóšter w Jablonneé v Podještědí. Dale steji na programje wopyt w krosnowanskim parku, pućowanje na horu Oybin a jězba z parnej železnicu.
Najwjace škodow wohenja dla
Policija (15.08.22)
Z kolesom do znački
Protecy. Po wšěm zdaću ze swjedźenja po puću domoj bě 57lětna žona w nocy na njedźelu w Protecach. Kaž policija zdźěli, zrazy wona z kolesom do znački. Dokelž nahłownik njenosyše so wona ćežko zrani a dyrbjachu ju do chorownje dowjezć. Při přepytowanjach zwěsćichu zastojnicy, zo měješe znjezbožena chorhojčku. Kak wulka tuta bě, pak policija njezdźěli. Kolesowarka pak změje so wopiwstwa w nadróžnym wobchadźe dla zamołwić.
Awto zwróćił
Drječin. Zo njeby do dźiwiny zrazył chcyše so 18lětny šofer Dacije sobotu wječor pola Drječina (Dretschen) skoćeću wuwinyć. Wón zhubi pak kontrolu nad awtom, jědźe z jězdnje a awto so zwróći. Šofer a sobujěduca so lochce zraništaj. Wěcna škoda wučinja něhdźe 5 500 eurow.
Chcedźa knihi sušić
Budyšin. Budyski měšćanski archiw je dóstał za lěće 2022 a 2023 spěchowanske srědki we wysokosći 39 500 eurow. Z pjenjezami móža tam nětko hódnotne historiske dokumenty wurjedźić a fachowje zapakować dać. Wulki podźěl na cyłkownym financowanju projekta ma z 15 000 eurami Sakski krajny zarjad za zachowanje wobstatkow. Dalše 24 500 eurow pochadźeja ze srědkow zamołwiteho zwjazkoweho knježerstwa za kulturu a medije z wosebitych pjenjez Zwjazka za zachowanje pisomneho kulturneho namrěwstwa. Město Budyšin so tohorunja na financowanju projekta wobdźěli a přida 9 500 eurow. Jako prěnje chcedźa 248 z dohromady 256 knihow komornistwa wurjedźić a zapakować. Přičina naprawy je, zo su mnohe historiske dokumenty Budyskeho měšćanskeho archiwa zdźěla mazane a mokre, a zwjetša njejsu wotpowědnje žadanjam zapakowane.
Na prózdninski campus
Njezapomnite dožiwjenja
Kónc minjeneho měsaca wuleća sej Serbska pčólnica z busom Šmitec wozydłownistwa na krajnu wustajeńcu do Beelitza blisko Podstupima. To bě wulkotne dožiwjenje widźeć pychu kwětkow a sej wobhladać, kak je w Beelitzkim kraju nastała produkcija hromaka. Wosebje žonam běše to wulkotna kubłanska jězba, wšako su zeznali jim dotal njeznate družiny rostlinow a su sej wotkryli informacije za domjacu zahrodku. Najbóle zajimawy pak bě wopyt tamnišeje cyrkwje z bohatym wuhotowanjom najwšelakorišich družin rostlinow, hdźež wot meje do winowca žane Bože mšě njewotměwaja, ale w bliskej kapałce.
Kamjetny žrawc a dar za Barleben
Njebjelčicy/Barleben (AK/SN/MiR). W Miłočanskej skale „Při Krabatowym kamjenju“ nastawa tuchwilu zornowcowa twórba z titulom „Njebjeske wrota w Barlebenje“. Čěsko-ameriski wuměłc Robert Alger je nadawk přewzał skulpturu z podpěru towarstwa Kamjenjak zdźěłać. Předwidźana je wona jako dar za saksko-anhaltsku gmejnu Barleben we wokrjesu Börde, z kotrejž wudźeržuje gmejna Njebjelčicy přećelske styki. Gmejna Barleben je Njebjelčanskej pomhała mjez druhim při wobstaranju wohnjowoborneho awta. W skulpturje zjednoći wuměłc znamjeni gmejnow, kołpja za Njebjelčansku a sekeru za Barlebensku komunu nad róžkatymi wrotami. Zajimawe na ideji čěskeho wuměłca je, zo móža zajimcy přez nju kročić. „Ći, kiž sej twórbu wobhladaja, móža hladać přez figuru kołpja a sekery pod mróčelu, kotruž do kamjenja wurězbuju“, powěda Robert Alger, „mam to za dobry motiw za fotografowanje.“ Mróčel změje na jednym boku formu duboweho a na druhim lipoweho łopjena. „Tónle zwisk, mjez narodomaj słowjanskeho a germanskeho pochada je stajnje zaso tema, kotraž mje zaběra“, Robert Alger rozjasnja.
Oldtimerowy korso wjeršk był
Smjerdźaca (aha/SN). Po třoch lětach bě skónčnje zaso móžno wubědźowanje wohnjowych woborow na arealu „Stadiona při dźiwjej rěce“ w Smjerdźacej přewjesć. Wosebity wjeršk su sej kameradojo, hłownaj iniciatoraj běštaj Marcel Rječka a Marcel Narćik, wumyslili. Přewjedźeny oldtimerowy korso ze 26 wobdźělenymi traktorami, trawusyčakami a zdźěla samotwarjenymi ratarskimi mašinami, hač na jednoho wobdźělnika z Łazka wšitcy ze Smjerdźaceje, zbudźi wobdźiwanje. Hač traktor typa Deutz z lěta 1974 abo Belorusaj so tute kaž wšě dalše hišće wužiwaja.
