Lejno. 27 škotowarjow, mjez nimi jedna škotowarka, je so předwčerawšim na škotowym turněrje serbskich seniorow w Lejnje wobdźěliło. Z Křesćanom Donatom móžachu nowačka witać. Najwuspěšniši bě tónraz Manfred Rohark z 2 980 dypkami před Herrmanom Wokom (2 773) ­a Achimom Mejglom (2 653). Po sydom hrajnych kołach nawjeduje nětko zaso Herbert Krječmar před Siegfriedom Rawu a Wolfgangom Kühnom. Přichodny turněr wotměje so 30. awgusta w Radworju.

Přeprošuja na swjedźeń

Serbske Pazlicy. Z natočenjom piwa a wubědźowanjom hornjeje přećiwo delnjej wsy započnje so jutře, pjatk, wjesny swjedźeń w Serbskich Pazlicach. Wječor sćěhuja lampionowy ćah za dźěći a reje. Sobotu w 13 hodź. pokročuja z koparskim turněrom wjesnych mustwow a w 15 hodź. ze zabawu za dźěći. K rejam zahudźi wot 21 hodź. kapała Logarhythmus. Něhdźe w 23 hodź. předstaji ­mło­dźina swój program. Njedźelu poskićuja wobjed z pólneje kuchnje. Wot 15 hodź. budźe swójbny swjedźeń z kapału Horjany kaž tež z dźěćacym a młodźinskim programom. Wšitcy zajimcy zbliska a zdaloka su witani.

„Lózy hólcy“ wustupja

Nimo dalšich insektow su předewšěm tež pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym ­pčołkam a pčołarjam wěnujemy. (8)

Kolebka hibićiweho pčołarja Wernera Čornaka steješe w Hrańcy. K małej delanskej wjesce je 66lětny wobstajnje swěru dźeržał a „bě, je a wostanje“, kaž praji, z njej kruće zwjazany. Chodźeše wottam wot 1963 hač do 10. lětnika do Worklec do šule. Hižo jako šulski hólčec dopokaza swój zajim a zwjazanosć z přirodu, štož je sej hač do dźensnišeho zachował. Hižo tehdy wón wobžarowaše, zo njebě w 1950tych lětach w Hrańcy, w susodnych Sernjanach a tež w Nowej Wjesce žanoho pčołarja. Často je so Werner ­Čornak hižo za šulski čas z w Lejpoldźe bydlacym znatym pčołarjam Jurjom Elu rozmołwjał. Wot njeho je zhonił, kak wažne pčołki su. Wón drje je jeho tež přeswědčił so sam z pčołarjenjom zaběrać. Po tym zo je 10. lětnik wuspěšnje zakónčił a swoje wukubłanje jako awtozamkar pola firmy Bloch w Kamjencu započinał, je Jurij Ela 16lětnemu Hrańčanej dwaj ­ludaj pčołkow přewostajił.

Hrajkanišćo při Slěbornym jězoru wěstoty dla zawrjene

Bjedrichecy (AK/SN). Falk Nowotnick so mjerza. „Wosrjedź sezony mi gmejna hrajkanišćo zawrěje“, měni Mužakowčan, kiž wot 2011 stanowanišćo při Slěbornym jězoru we Łazowskej gmejnje wotnaja. „Pjatk do prózdnin bě tu nadobo banćik přičinjeny. Gmejnscy dźěłaćerjo chcychu hrajkanišćo hižo wotbagrować. Tomu móžachmy runje hišće zadźěwać. Što je to do znamjenja dowolnikam, hdyž wosrjedź sezony hrajkanišćo wotstronimy? Je to spěchowanje turizma?“