Chrósćicy (MG/SN). Wosadna rada a wosadne předstejićerstwo Chróšćanskeje wosady stej wčera na druhe informaciske zarjadowanje k nutřkownej renowaciji Chróšćanskeje cyrkwje přeprosyłoj. Jako přihot běchu njedźelu po kemšach informaciski list rozdźělili. Něšto wjac hač 50 zajimcow je na wječork přichwatało. Jim farar Měrćin Deleńk a architekt Marko Dźisławk rozłožištaj, što měło so čehodla na kóždy pad wobnowić a kotre namjety a planowanja hižo eksistuja.
Něšto činić měli na přikład za wołtar a wołtarne blido, za wudospołnjenje wobłoženja wokoło chórow, za wobswětlenje, lěpšu akustiku, sakristiju a za sporjadkowanje schodow we wołtarnišću. Wuraznje farar Deleńk podšmórny: „Ale plany njejsu železny zakoń a nic do cementa late! Nic wšo, štož sej přejemy, budźe so hodźeć přesadźić, ale bjez plana njepóńdźe.“ Za lěpše znazornjenje bě architekt spřihotował kompjuterowy 3D-wobraz jako model ze wšelakich perspektiwow.
Budyšin (CS/SN). „Hodźinski plan“ Budyskeho Žónskeho centruma na Budyskej Kamjentnej je derje pjelnjeny. Społnomócnjena za runostajenje města Fränzi Straßberger a nawodnica centruma Sabrina Baumann so wjeselitej, zo je po přestawce korony dla zaso móžno zarjadowanja poskićeć. „Ći, kiž poskitki wužiwaja, su so wo to starali, zo je telefon po zahajenju dźěławosće wobstajnje klinkał“, tak Sabrina Baumann, „runje starši a samostejace žony su kontaktnych zakazow a lockdowna dla ćerpjeli. Nětko móža zaso poskitki kaž žónsku snědań wužiwać.“
NSLDź w Norwegskej
Tromsø/Budyšin. „Phōnē – mjeńšinowym rěčam hłós dać“ rěka projekt, we kotrehož wobłuku chcedźa wosom dźiwadłowych hrow wuwiwać a předstajić. Za njón wuhotuja zastupjerjo wosom mjeńšinowych jewišćow mjez druhim z Rumunskeje a Norwegskeje wot zajutřišeho prěnje, třidnjowske dźěłowe zetkanje w Tromsø. Němsko-Serbske ludowe dźiwadło zastupuje Madleńka Šołćic.
Nowy wobrazowy słownik
Budyšin. Ludowe nakładnistwo Domowina je z wudawaćelom noweje knihi „Mój wulki wobrazowy słownik – Jězdźidła“. Němski original Susanny Gernhäuser je Štefan Paška do hornjoserbšćiny přełožił. Publikacija, zhotowjena jako papjercowa brošura, hodźi so za dźěći wot dweju lět a je wotnětka mjez druhim w Smolerjec kniharni na předań.
Murja w naduwanej formje
Pančicy-Kukow. We wobłuku jubilejneho lěta Kocora a Zejlerja wotměje so sobotu 2. julija, spěwny wječor z programom „Zejler w nowym fraku“ skupiny Wólbernosće w 19.30 hodź. na Kaulfürstec statoku w Pančicach-Kukowje (Róžeńčanska 32).
Woswjeća jubilej
Smječkecy. Na swoje 25lětne wobstaće zhladuje pjatk a sobotu, 1. a 2. julija, Smječkečanski młodźinski klub. Tónle jubilej chcedźa z wulkej party woswjećić a tak z rejwanišćomaj a barami perfektny start do lětnjeho časa skićeć. Na woběmaj dnjomaj čakaja na wopytowarjow najwšelakoriše hudźbne stile. Pjatk płaći zastup pjeć eurow, sobotu při wječornej kasy 14. Za zarjadowanje płaći nastupajo korona prawidło 3G.
Tři delikty naraz
Budyšin. Nimale wšitko wopak činił je 43lětny wodźer nakładneho awta, kotrehož zadźeržachu policisća předwčerawšim připołdnju na awtodróze A 4 mjez Budyšinom a Słonej Boršću. Wón bě z Lkw-jom njedźelu po puću, hačrunjež za to dowolnosć njeměł. Nimo toho běchu spinadła jězdźidła skóncowane. A skónčnje so wukopa, zo měješe wodźer 1,94 promilow alkohola w kreji.
Komorow (JK/SN). Dobre 300 metrow zwonka Komorowa pola Rakec, blisko Wojerowskeho Čorneho Halštrowa zhromadźi so minjenu sobotu dopołdnja nahladna ličba ludźi, zo by była ze swědkom samo na sebi historiskeho wokomika. Tam bu mjenujcy posledni měznik podłu něhdyšeje prusko-sakskeje hranicy wotkryty, kotrehož postajenje bě Wienski kongres 1815 wobzamknył.
Wobstajnje přewjeduje Łazowski wjesnjanosta Thomas Leberecht rěčne hodźiny, a to nic jenož we Łazu samym, ale tež w jednotliwych wsach. Minjene dny bě wón w Lipinach.
Lipiny (AK/SN). W zwisku ze strukturnej změnu ma tež mała wjes Lipiny (Lippen) na kromje Łazowskeje gmejny nowy wodowód dóstać. Tole podšmórny wjesnjanosta Thomas Leberecht (CDU) minjeny štwórtk we wobydlerskej rěčnej hodźinje. Wón nadźija so wotpowědnych srědkow Zwjazka. Dotal wjedźe starši wodowód z Bórka do Lipin. Dalši přińdźe z Mortkowa. Nětko chcedźa nowy twarić, a to wot statneje dróhi S 108.
Tema pitneje wody ludźi w 55 wobydlerjow ličacej wsy hižo dlěje zaběra. „Po wohenju před třomi lětami buchu filtry ponowjene. Mamy pak nastajnosći mało ćišća a často mazanu wodu“, powěda wobydlerka Elke Kieschnick. Wona je 1990 z mandźelskim swójbny dom w Lipinach twariła a by sej lěpše zastaranje z wodu přała. Jeje pokiwy a starosće wjesnjanosta sobu wza, wšako wě, zo je to za wobydlerjow eksistencielny problem.