Z wjacorymi mejemjetanjemi su hač k poslednjemu kóncej tydźenja w ...
Quo vadis, Budyšin?
Krótkopowěsće (31.05.22)
Kultura a turizm stej přichod
Zhorjelc. We wobłuku zhromadneho rjadu zarjadowanjow Krajneho turistiskeho zwjazka Sakskeje a sakskeho ministerstwa za kulturu a turizm „Dialog hosćićelow“ wčera w Zhorjelcu podšmórny ministerka Barbara Klepsch (CDU) „postajowacu rólu kultury a turizma runje za Łužicu“ w zwisku ze strukturnej změnu. Tak nałožuje ministerstwo na přikład cyłkownje 400 000 eurow za marketing UNESCO-herbstwa Mužakowski park.
Wuznamny hłós woćichnył
Triest. Boris Pahor je njeboh. Přisłušnik słowjenskeje mjeńšiny w Italskej zemrě wčera 108lětny w swojim ródnym měsće Triest. Pahor słuša k najwuznamnišim zastupjerjam přitomnostneje słowjenskeje literatury. Jeho najznaćiše knihi su „Spopad s pomladjo“, „Mesto v zalivu“ a roman „Nekropolis“, wotbłyšćowacy jatbu awtora we wjacorych kacetach za čas Druheje swětoweje wójny.
Incidenca w Sakskej pod sto
Policija (30.05.22)
We wikowanišću so kuriło
Bělšecy. Krótko do připołdnja informowachu sobotu integrowanu wuchowansku dispatcharnju wo kurje na terenje twaršćiznoweho wikowanišća w Bělšecach (Ebendörfel). K hašenju přijědźechu wobornicy z Rašowa (Rascha), Bělšec a Budestec (Großpostwitz). Pod twarskim kontejnerom wuhladachu so palace drjewjane třěški. Kameradojo wšitko zhašachu a tomu zadźěwachu, zo płomjenja na bliski skład a wjacore jězdźidła přeskočichu. Policija nětko přepytuje, hač je snano něchtó naspomnjene drjewjane třěski wotpohladnje zapalił.
Kreatiwne ideje na swjedźenju
Ćisk (JT/SN). Nalětni swjedźeń je za Ćišćanske kulturne towarstwo hižo dlěje hač dźesać lět kruty wobstatk aktiwitow w běhu lěta na Ćišćanskim statoku. Dokelž dyrbješe tónle podawk korony dla dwójce wupadnyć, běchu wočakowanja njedawno ćim wjetše. Ideja nalětnich wikow wot wšeho spočatka bě, regionalnym wikowarjam a wobydlerjam Ćiska městno skićić, hdźež móža swoje rjemjeslniske a zahrodniske wudźěłki zwičnjeć. Wobrubili su wiki z kulturnymi a rjemjeslniskimi poskitkami kaž tež z lokalnymi kulinariskimi słódnosćemi, kaž na přikład z hrochowej poliwku, plincami, samopječenym tykancom a čerstwym chlěbom.
Na naměstach a hasach swjećili
Budyske nalěćo tysacy wopytowarjow do sprjewineho města wabiło
Budyšin (CS/SN). Wobydlerjo Budyšina a jich hosćo su dawno hižo na to čakali, zo móža na naměstach a hasach sprjewineho města zaso swjećić. 1018. Budyske nalěćo je kónc tydźenja tysacy ludźi do města přiwabiło. Prěni wulki wjeršk bě pjatk wustup kapały Jolly Jumper.
Na wšitkich třoch dnjach skićachu na třoch jewišćach wotměnjaty program. Hudźbna paleta sahaše wot metal přez rock a samba hač k šlagrej. Tež serbske akcenty njepobrachowachu. Tak je sobotu popołdnju rejwanska skupina Łužičanka ze wšelakimi poskićenjemi wšěch starobnych skupin wopytowarjow zawjeseliła. Mjez druhim pokazachu reju lutkow a Božich słónčkow. Dujerska kapała Horjany je tradicionalnje njedźelu na rańše piwko morawsku a serbsku dujersku hudźbu zahudźiła. Wčera popołdnju dožiwi předewšěm serbski publikum premjeru noweho pisaneho programa Smjerdźečanskeje rejwanskeje skupiny.
Na hinašim městnje
Chrósćicy. Přichodny škotowy turněr serbskich seniorow wotměje so jutře, 31. meje. Hinak hač dotal připowědźene pak njehraja wuměnkarjo w Radworskej „Zelenej hałžce“, ale w Chróšćanskim Krawčikec hosćencu, zdźěli organizator Měrćin Nowak. Započatk budźe po zwučenym wašnju w 14 hodź. Přichodny turněr w juniju wotměje so w Nowoslicach.
Spušća wudawki
Sprjewiny Doł. Na dobro wjacorych towarstwow w gmejnje Sprjewiny Doł bě rozsud tamnišich gmejnskich radźićelow na njedawnym posedźenju. Woni wobzamknychu, wšitkim w gmejnskich imobilijach zaměstnjenym towarstwam połojcu zawodowych wudawkow w zašłymaj pandemijowymaj lětomaj spušćić. Z toho profituja mjez druhim wjesnej klubaj w Bórkhamorje a w Bórku kaž tež sportowe towarstwo w Nowym Měsće nad Sprjewju. Pozadk je, zo mějachu towarstwa w zašłymaj lětomaj lědma dochody. Na tamnym boku su wone wažne za wjesnu zhromadnosć. Přidatne wudawki za gmejnsku kasu wučinjeja nětko 12 300 eurow.
Po ryzy serbskim katolskim wašnju staj sej sobotu Lucija Smolic z ...
Myto za Co-Wor- king-Space
Ochranow (SN). Statne myto za twarjenje na wsy lěta 2021 je so mjez druhim Ochranowej spožčiło. Ze wšitkich 110 předležacych projektow je jury loni nazymu dobyćerjow ze štyrjoch kategorijow wuzwoliła a dalšich 20 twarskich objektow wuznamjeniła. Pandemije dla je so wuznamjenjenje hakle dźensa popołdnju na žurli cyrkwje Ewangelskeje bratrowskeje wosady Ochranow wotměło. Myto wučinja 5 000 eurow. Tworjenje tak mjenowaneho Co-Working-Space w něhdyšej hašerni Ochranowa, kotraž steji pod pomnikoškitom, je fachowcow přeswědčiło. Statne myto bu w kategoriji „přemysłowe wužiwanje“ spožčene. Po wuznamjeju bě składnosć za bjesadu. Na wjesnym přechodźowanju su wobdźělnicy zarjadowanja měli na pjeć stacijach składnosć, sej městačko zbližić.
Statne myto za twarjenje na wsy bu loni prěni króć wupisane. Požadać móža so priwatny twarscy knježa, předewzaća a towarstwa kaž tež komuny, architekća a planowarjow. Jury, w kotrejž skutkuja fachowcy kaž architekća, pomnikoškitarjo, planowarjo a twarscy ekologojo skutkuja njewotwisnje.
Krótkopowěsće (30.05.22)
Jubilej takrjec nachwatali
Radebeul. Dźiwadźelnik Gojko Mitić je – takrjec z dwulětnym zapozdźenjom – we wobłuku wčera zakónčenych 29. Karla Mayjowych swjedźenskich dnjow swoje wosomdźesaćiny „nachwatał“. Kaž swjedźeń wuhotowacy kulturny zarjad města Radebeul dale zdźěla, zličichu lětsa cyłkownje 25 000 wopytowarjow.
Mjenje amfibijow
Podstupim. We wodźiznach Braniborskeje je ličba amfibijow, kaž su to žaby abo krokawy, w minjenych lětach jasnje woteběrała. Britta Schmidt, nawodnica Přirodneje straže Braniborskeje, rěči wo „pododólnej jězbje“ populaciju amfibijow nastupajo. Za hłownu přičinu toho ma Schmidt přiběracu suchotu jako sćěh změnjeneje klimy. Towarstwo 15 „narodnych přirodnych krajinow“ dohladuje.
Čěski tepjer w Žitawje
