Policija (24.05.22)
Pokradnjene koło w interneće
Wojerecy. Ze swojej kedźbnosću staj mandźelskaj we Wojerecach přinošowałoj, paducha kolesa dosahnyć. Pola eBay pytaštaj wonaj za nowym kolesom. Jako běštaj kmane žonjace marki Giant namakałoj, daštaj ramikowe čisło najprjedy wot policije přepruwować. Kaž so wukopa, bu poskićene koleso minjeny tydźeń we Wojerecach pokradnjene. Policija za nim hižo pytaše. Město mandźelskeju jědźechu nětko policisća k wučinjenemu přepodaću. Tam zetkachu 30lětneho znateho – a pytane koleso. W bydlenju a pincy podhladneho namakachu dalše wěcy, kotrež běchu po wšěm zdaću pokradnjene, mjez druhim wšelki grat.
52 km/h přewjele
Ottendorf-Okrilla. 172 km/h bě rekord při kontroli spěšnosće w nocy na póndźelu na awtodróze A 4 pola Ottendorfje-Okrilli. Dowolenych je tam 120 km/h. Wodźer pólskeho Citroëna ma nětko 320 eurow pokuty płaćić a njesmě jedyn měsac žane awto wodźić. Při kontroli bě dohromady 85 wodźerjow přespěšnych.
Šulsku infrastrukturu skrućić
Zakładna šula jedne z ćežišćow komunalneho dźěła Rakečanskeje gmejny
Rakecy (JK/SN). Rakečanska zakładna šula „Bjarnat Krawc“ je jedyn z klučowych produktow Rakečanskeje gmejny. To je njedawno tamniša gmejnska rada wobzamknyła. Z tymle narokom ma so šula jako infrastrukturnje wažny wobstatk gmejny dale skrućić a wutwarić. To wuzběhny wjesnjanosta Swen Nowotny (CDU) na njedawnym posedźenju gmejnskeje rady, jako poda rozprawu k minjenym a přichodnym inwesticijam gmejny nastupajo zakładnu šulu.
Wuměnkarjo a přećeljo Serbskeho šulskeho towarstwa su sej minjene ...
Maja słužić
Wotmołwa njespokoja
Na schodach před Budyskim krajnoradnym zarjadom sedźeše wčera Wojerowski farar Jörg Michel a je z hłodowym stawkom na njedostatki krajnoradneho zarjada skedźbnił. Stajił je pódla so plakat z napisom „Knježe krajny rada, čakam na wotmołwu!“
Budyšin/Wojerecy (SN/MiR). Ze swojej akciju, kotruž je mjeztym hižo zakónčił, kritizowaše Wojerowski farar a rěčnik wobydlerskeho zwjazka „Wojerecy pomhaja z wutrobu“, zo je Budyski zarjad za wukrajnikow wosobinske daty třećim spřistupnił a zo njeje narunał financnej požčonce ewangelskeje cyrkwje prošacymaj wo azyl. Farar Michel bě wjackróć pisomnje na to skedźbnił, wotmołwy pak njedóstał.
Krótkopowěsće (24.05.22)
Nowa radźićelka spřisahana
Budyšin. W Budyskim wokrjesnym sejmiku bu na wčerawšim posedźenju Elke Jung jako wokrjesna radźićelka Lěwicy spřisahana. Wona naslěduje zemrěteho wokrjesneho radźićela Ralpha Büchnera. Serbskemu čłonej sejmika Hajkej Kozelej su nadawk zastupowaceho čłona w zwjazkowej zhromadźiznje Euroregiona Nysa dowěrili. Tež wón funkciju přewozmje, kotruž bě Büchner wukonjał.
Podpěra studowacym
Podstupim. Něhdźe 500 000 eurow chce Braniborska přewostajić wysokim šulam a slědźenišćam w kraju za ukrainskich ćěkancow. Europa-uniwersita Viadrina chce srědki mjez druhim za tutorow/ki kaž tež studentske pomocy wužiwać. Zdobom słuža za coachingi, dźěłarnički a za kursy jendźelšćiny a němčiny.
Přepruwuja ruske wobsydstwo
Instrumenty w přehladce widźeć
Twory druhi dźeń wotewzać
Budyšin (SN/MiR). Stajnje a wjace Budyšanow a wonkownych zajimcow nakupuje w sprjewinym měsće zasydlenym předewzaću „Marktschwärmerei“. Ze swojim online-poskitkom při nakupowanju podpěruja producentow w regionje, kotřiž předewšěm zežiwidła poskićuja.
Kónc tydźenja zhromadnosć swjećili
Pod hesłom „Štóž wěri, njeje sam“ je Radworska wosada minjeny kónc tydźenja na 125. jubilej wosadneje cyrkwje spominała, při čimž mějachu přez cyły kónc tydźenja wobšěrny program.
Radwor (SN/BŠe). Poprawom su wěriwi Radworskeje wosady hižo loni kermušu swjedźensku Božu mšu hladajo na 125. jubilej wosadneje cyrkwje swjećili. Tola swjedźeń wobmjezowanjow dla móžny njebě. Tuž su jón minjeny kónc tydźenja nachwatali. Po wječornej Božej mši chwatachu wěriwi do wulkeho stana na farskej łuce. Pětr Kliman a Beno Bělk staj historiski přednošk wo farskej cyrkwi a wosadnym žiwjenju minjeneho lětstotka přihotowałoj a pilnje fota, wideja a zajimawostki znosyłoj a wosadźe nětko předstajiłoj, štož je mjez přitomnymi wulku zahoritosć wubudźiło.
Na tójšto wsach meju mjetali
Po lětomaj přestawki so mnozy nad pisanosću nałožka radowali
Na mnohich wsach Hornjeje a srjedźeneje Łužicy su kónc tydźenja meju mjetali. Po lětomaj bjez nałožka móžachu wšudźe njeličomnych hosći witać, kiž běchu lačni za tym, sej mejemjetanje bjez wobmjezowanjow wobhladać.
Šunow/Konjecy (JWje/SN). Filip Kral a Klara Čornakec staj mejski kralowski por w Šunowje. Tam zličichu wčera popołdnju dźesać porow młodźiny, kiž w Šunowje wokoło meje rejwachu. Po tym zo bě kralowski porik jasny, ćehnjechu wšitcy zhromadnje do Konjec, hdźež přizamkny so mejemjetanje dźěći. Wosebitosć bě, zo podaštaj so mejska kralowna a mejski kral na łastojčce do Konjec, při čimž kralowna moped wodźeše a mejski kral bě jeje socius. W Konjecach rejwaše potom jednaće porow dźěći wokoło meje. Mejski kral bu Jurij Bětnar, kiž wuzwoli sej swoju sotru Hanku za mejsku kralownu.
