Ludźi a jich ideje zapřijeć
Za město Kulow a přisłušne wsy zdźěłaja gmejnski wuwićowy koncept
Kulow (AK/SN). Za město a přisłušne wsy zdźěłaja w Kulowje gmejnski wuwićowy koncept. Wón wopřijima wšitke wobłuki zjawneho žiwjenja. Paleta temow saha wot bydlenja a wobchada přez turizm a wikowanje hač k sportej a wobswětoškitej. „Smy so wobydlerjow intensiwnje naprašowali. To běchu jara konstruktiwne rozmołwy, při kotrychž bu woprawdźe doprědka myslene“, wuzběhny Martin Neumann z měšćanskeje wuwićoweje towaršnosće (STEG) předwčerawšim na posedźenju Kulowskeje měšćanskeje rady. W nadawku města ma STEG wuwićowy koncept zdźěłać a při tym wobydlerjow kaž tež jich ideje a předstawy sobu zapřijeć.
Krótkopowěsće (06.05.22)
Wuspěšna němska premjera
Berlin. Serbska wirtuozowka na tereminje Carolina Eyckec je z wupředatym koncertom wčera w Berlinskim Zeissowym wulkoplanetariju němsku premjeru swojeje noweje tačele „Thetis 2086“ swjećiła. Dźensa slěduje dalša prezentacija nowostki na samsnym městnje. Za čas redakciskeho kónca běchu nimale wšitke zastupne lisćiki hižo předate.
Snadne wotpinanje pandemije
Budyšin/Zhorjelc. Roberta Kochowemu institutej buchu z Budyskeho wokrjesa 174 nowonatyknjenjow z koronawirusom a dwaj smjertnej padaj w zwisku z infekciju přizjewjene. Incidenca tu wučinja aktualnje 322,1. We wokrjesu Zhorjelc zwěsćichu 99 nowownatyknjenjow, dwaj schorjenej pacientaj staj zemrěłoj. Incidenca tam je so snadnje na 249,4 znižiła.
Tramwajkowu čaru ponowjeja
Policija (05.05.22)
Móraka lepili
Budyšin. W nocy na srjedu je policija w Budyšinje móraka lepiła. Z komplicu bě wón runje sćěnu domskeho Při měšćanskim nasypje pomórał, jako jeho swědk wuhlada a policiju zazwoni. Blisko Třělnišća jeju zastojnicy wuhladachu. Młodaj mužej ćisnyštaj nachribjetnik preč a chcyštaj ćeknyć. Jednoho z njeju zastojnicy dosahnychu. 19lětny měješe hišće samsnu barbu na rukomaj a na kabaće, kaž bě wona w nachribjetniku.
Myto dobyć
Nadawki za wohnjowobornu gratownju přepodali
Malešecy (CS/SN). Hospodarski plan za lěto 2022 z wobjimom 8,5 milionow eurow je Malešanska gmejnska rada na swojim zašłym posedźenju schwaliła. Nimo toho wobzamknychu nowe wustawki wo zarjadniskich kóštach.
Dale zaběrachu so radźićeljo z bywšim dwórnišćowym terenom Malešanskich twaršćiznowych wikow. Tam chce gmejna nowe přemysłowe płoniny wutworić. Radźićeljo su nětko nadawk za prěnje planowanske dźěła we wobjimje nimale 60 000 eurow přepodali. Dalše planowanja za 8 600 eurow chcedźa za škitne naprawy přećiwo wulkej wodźe w Dubrawce a w dźělach Barta zahajić. Nimo toho radźićeljo rozsudźichu, dróhu Při hrodźe w Budyšinku za 158 000 eurow saněrować. W Zuborničce pak předachu ležownosć, na kotrejž maja bydlenja bjez barjerow nastać.
Za nowu wohnjowobornu gratownju w Barće rozdachu radźićeljo dalše twarske nadawki w cyłkownym wobjimje 58 000 eurow. Při tym jedna so wo nutřkowne durje, kachlicarske dźěła, kładźenje špundowanja, molerske dźěła a twar wobłoženja schodow.
Na dźeń wotewrjenych duri
Kamjenc. Swój dźeń wotewrjenych duri móže Kamjenska hudźbna šula lětsa zaso w prezencnej formje přewjesć. Wšitke na hudźbje zajimowane dźěći kaž tež młodostni a starši su sobotu, 7. meje, na Kamjensku Macherowu 140a přeprošeni. W času wot 14 do 17 hodź. móža wopytowarjo instrumenty wuspytać a so z hudźbnymi wučerjemi rozmołwjeć. Hudźbny program poda dohlad do skutkowanja kubłanišća. Zajimcy njech přizjewja so pod telefonowym čisłom 03578 7747370.
Wobornicy přeprošeni
Róžant. Dobrowólne wohnjowe wobory zarjadniskeho zwjazka Při Klóšterskej wodźe swjeća jutře, pjatk, dźaknu Božu mšu składnostnje swjedźenja swjateho Floriana. Wona započnje so w 19 hodź. w Róžeńčanskej hnadownej cyrkwi. Wšitcy wohnjowi wobornicy kaž tež dalši hosćo su k tomu přeprošeni. Božu mšu organizuje lětsa Njebjelčanska dobrowólna wohnjowa wobora.
Gratownja změje wěžu
Nowy domicil wohnjoweje wobory w Slepom derje pokročuje
Slepo (AK/SN). Nowotwar Slepjanskeje wohnjowoborneje gratownje z městnom za štyri hašenske jězdźidła derje pokročuje. Tole podšmórny twarski nawoda Slepjanskeho zarjadniskeho zjednoćenstwa Steffen Seidlich na zašłym posedźenju Slepjanskeje gmejnskeje rady. „Mulerske dźěła na dźělu za wohnjowych wobornikow su wotzamknjene. Tuchwilu twarja mulerjo jězdźidłowu halu“, tak Seidlich.
Jako přichodni budu ćěslojo na rjedźe. Mjeztym da gmejna dochadźane poskitki za blidarske a zamkarske dźěła kaž tež za wonkowne připrawy pruwować. Nadawk za elektropřiprawu a za škričkowansku techniku we wobjimje 173 000 eurow přepodachu Wojerowskej elektrofirmje. Nimo toho přepodachu nadawk za twar tepjenja, přewětrjenja a sanitarnych připrawow za 295 000 eurow.
Financy rjadować sobu najwažniše
Dokelž k wólbam wjesnjanosty 12. junija w Njebjelčanskej gmejnje wjesnjanosta Tomaš Čornak (CDU) hižo njekandiduje, změja tam na kóždy pad naslědnika. Za to maja jeničkeho kandidata.
Miłoćicy (SN/MWj). Hdyž André Bulank doma w Miłoćicach na swojej zahrodźe sedźi, móže tak prawje wodychnyć. Po 12. juniju snano tak wjele składnosće k tomu njezměje. Jako njewotwisny kandidat je wón jenički, kiž so k wólbam wjesnjanosty Njebjelčanskeje gmejny staji. 48lětny nan dźowki chcyše spočatnje jenož alternatiwa k móžnym dalšim kandidatam być, wo kotrychž bě w gmejnje rěč. Nětko pak ma dobre šansy, sam na čoło komuny stupić.
We Wudworskim Krollec zahrodnistwje je hižo wšitko za domjace ...
Rěč steješe w srjedźišću rozmołwy
Ryzy serbske aspekty stejachu w srjedźišću rozmołwy z Alexom Theilu, zhromadnym kandidatom SPD, Lěwicy a Zelenych za wólby Budyskeho krajneho rady wčera w Kamjencu.
Kamjenc (SN/at). Serbšćina je tež w dwurěčnych kónčinach Budyskeho wokrjesa druha hamtska rěč. „We wokrjesnym sejmiku žadyn poskitk w serbskej rěči njepředleži, tež žadyn protokol do njeje přełoženy njeje.“ Swojemu zwěsćenju zhromadny kandidat Alex Theile hnydom trěbnu konkluziju, stanje-li so wón z krajnym radu, dodawa: „Budu so postarać, zo w serbskej rěči k dispoziciji su.“
Krajny dźěłowy kruh Serbja sakskeje SPD bě wčera do Kamjenca přeprosył, organizował bě zarjadowanje hromadźe ze serbskimaj cyłkomaj Lěwicy a Zelenych w swobodnym staće. Nimo sobustawow, kotřiž so zdźěla sobu w Serbskim sejmje angažuja, a dalšich zajimcow bě tež Kathrin Michel, předsydka SPD Sakskeje a zapósłanča zwjazkoweho sejma přišła. Wona swoju přichilnosć k serbskim naležnosćam znowa podšmórny.
