Budyšin (SN/JaW). Hłownu a wólbnu zhromadźiznu Domowiny, kotruž pla­nuja za 27. měrc 2021 w Slepom, měli do lěća přestorčić. To je wčera předsyda třěšneho zwjazka Dawid Statnik na onlinowym wuradźowanju prezidijej zwjazkoweho předsydstwa namjetował. A pre­zidij poručenje předsydy podpěruje. Doskónč­nje wo tym rozsudźić chce Zwjazkowe předsydstwo Domowiny na swojim jutřišim posedźenju, kotrež móža­ zajimcy pod www.youtube.com/watch?v=KYEss6x5wjc&feature=youtu.be live sćěhować. Jako hłownu přičinu, hłownu zhromadźiznu přestorčić, mjenuje Domowina koronapandemiju.

Njebjelčicy/Budyšin (SN/JaW). Spěchowanske towarstwo SMY z.t. je Załožbje za serbski lud próstwu wo institucionelne spěchowanje jednaćelnje Serbskeho sejma zapodało. Tak chce skutkowanje gremija zaměrnje podpěrać, pisa towarstwo w nowinskej zdźělence.

„Wulke wužadanja před nami ležacych nadawkow so hladajo na trěbnu kwalitu a přaty časowy ramik za serbski lud z ryzy čestnohamtskim dźěłom zmištrować njedadźa“, měni pokładnica towarstwa SMY a zapósłanča Serbskeho sejma Aneta Zahrodnikowa. Dale w zdźělence mjez druhim rěka, zo so wšitcy zapósłancy Serbskeho sejma „bjezwuwzaćnje bjez zapłaćenja a zwonka powołanskeho dźěła angažuja“. Kaž towarstwo SMY tohorunja připowědźa, předstaji swój „koncept čłonam załožboweje rady na jich posedźenju“.

Kaž direktor Załožby za serbski lud Jan Budar wobkrući, próstwa wo institu­cio­nelne spěchowanje jednaćelnje Serbskeho sejma „wot wutory našemu zarjadej předleži. Na wuradźowanju załožboweje rady přichodnu wutoru pak naležnosć na dnjowym porjedźe njesteji.“

Druhim na swěće pomhać je wšo druhe hač samozrozumliwe. Kóždy dźě ma swoje mjeńše a wjetše starosće. Ale přiwšěm so tež wo susoda starać je prosće čłowjeske a čłowjeka tež wuznamjenja. Naš tuchwilny čas zawěrno runje lochki njeje a štóž pomoc trjeba, je wjesoły, hdyž ju dóstanje. Zo pak je so telko ludźi na lětušej akciji Towarstwa swjateje Filomeny wobdźěliło, swědči wo tym, zo při wšitkich starosćach njejsmy na to zabyli, zo so druhim hišće hubjeńšo dźe hač nam. Tohodla je to w tychle dnjach rjane poselstwo, zo je tež we Łužicy dosć zwólniwych, kiž jenož na sebje njemysla, ale spytaja druhim pomhać. To wšo pak njeby fungowało, njeby-li to něchtó organizował, nic z wulkimi rěčemi, ale z praktiskim dźěłom; kotryž njeboji so zadźěwkow, ale je přewinyć spyta. Ludźi měć kaž Gerata Róbla, kiž je lětušu pakćikowu akciju hižo dwacety raz organizował, njemóžemy wysoko dosć hódnoćić a směmy za to tež dźakowni być. Marian Wjeńka

Towarstwo swjateje Filomeny lětsa dwacety raz pomha

Smjerdźaca (aha/SN). 20. raz je Towarstwo swj. Filomeny z předsydu Geratom Róblom na čole lětsa w dohodownym času za nuzu ćerpjacych pakćikowu akciju přewjedło. Wčera je sej wulke nakładne awto z Bołharskeje do Smjerdźaceje dojěło. Wjele pomocnikow su dźensa dopoł­dnja něhdźe 700 darjenych pakćikow kaž tež wot Kamjenskeje wotnožki Carity přewostajene wjetše mnóstwo hygieniskich srědkow za wobydlerjow starownjow a samo nimale nowe koleso za zbrašene dźěćo kaž tež pjeć wulkich měchow muki ze Sulšečanskeho Brězanec młyna nakładowali. Dźensa je so Lkw na daloki puć do Bołharskeje nastajił. Pakćiki do maćerno-dźěćaceju domow w čěskim Jiřetínje a Dolním Podluží dowjeze Gerat Róbl jutře z transporterom. W domje w Dolním Podluží bydli tuchwilu dźesać maćerjow z dohromady 14 dźěćimi. W Jiřetínje je jich wjace hač dwójce telko. Kóžda mać dóstanje pakćik, kotryž su darićeljo za swójbu postajili a kóžde dźěćo, hač hólc abo holca, starobje wotpowědny pakćik.