Sobotu, 7. nowembra, měješe dźiwadłowy kruch lajskeje dźiwadłoweje skupiny Šunow-Konjecy „Wumrěć njedawa, ćeta“ w režiji Petry-Marije Bulankec-Wenceloweje w Šunowskej Fabrikskej hospodźe swoju premjeru.

Syła Delanow steješe tón wječor na jewišću. Anita (Regina Kurjatowa) je sej na swoje narodniny črjódku hosći přeprosyła. Mjez nimi běše ćeta Frieda (Regina Šołćina) z Čorneho lěsa z mužom Otom (Pawoł Janca). Tež turkowska susodka Ajša­ (Kerstin Mauwowa) bě na swjedźeń přišła. Zawjedliweho turkowskeho rakija dla ma mandźelski Anity Theo (Rajmund Čórlich) na narodninach chětro ćerpjeć. Nic naposledk tež lěkarki na mopedźe (Angelika Šěnowa) dla. A k tomu hišće wjesny pólcaj Dubik (Markus Šołta) přichwata, kiž so do studentki skótneje mediciny Rezi (Viktorije Žurec) zahlada.

Kontrowersnje diskutowali

póndźela, 23. nowembera 2015 spisane wot:

Zwjazkowe předsydstwo Domowiny je stejišćo k zaměstnjenju ćěkancow zabrało.­ Zdobom je wobzamknyło, wutworić­ „serbsku rěčnu radu“.

Towarstwo swj. Filomeny potrěbnym znowa pomha

štwórtk, 19. nowembera 2015 spisane wot:

Smjerdźaca (aha/SN). Jako předsyda Towarstwa swj. Filomeny Gerat Róbl před někotrymi lětami připadnje dr. Milenu Valevu zezna, kotraž bydli mjeztym 17 lět w Němskej a na uniwersitomaj w Niederrheinje a Nürnbergu wuči, přeprosy wona Smjerdźečana do swojeje bołharskeje domizny. Gerat Róbl dojědźe sej z njej do Razgrada blisko rumunskeje hranicy, hdźež so wo nuzy ludźi w měsće z 33 000 wobydlerjemi přeswědči. Lětsa je tomu štwórty raz, zo Towarstwo swj. Filomeny z pakćikowej akciju dźěći w tamnišich syrotownjach a nuzu tradace swójby hody zwjesela.

Zo bychu wobešli korupciju a zo statne instancy rozdźělenje darow kontro­luja, załožichu tam loni Towarstwo Odyseja, kotrehož čłonaj staj tež dr. Milena Valeva a Gerat Róbl. Towarstwo, mjeztym z wunoška lońšeho Łazkowskeho beneficneho koncerta z transporterami wuhotowane, stražuje nad sprawnym rozdźělenjom darow. Tak je zaručene, zo móža so tam dźěći na wjace hač 30 městnach z pomocy z Łužicy wjeselić.

Domowina wupraja so za pomoc ćěkancam

štwórtk, 19. nowembera 2015 spisane wot:

Budyšin (SN/JaW). Zwjazkowe předsydstwo Domowiny chce na swojim jutřišim wuradźowanju w Budyšinje mjez druhim chětro aktualnu azylowu temu načeć. Dokładnje chcedźa stejišćo třěšneho zwjazka k tomu wothłosować a schwalić.

W naćisku wobzamknjenja wupraja so Zwjazk Łužiskich Serbow cyle jasnje za pomoc ćěkancam. „Jako Serbja smy hordźi na swoju tradicionalnu hospodliwosć a rólu jako kulturny a rěčny móst mjez ludami. Tohodla je za ćěkancow tež městno na serbskich a dwurěčnych wsach“, rěka w naćisku stejišća. Zdobom wupraja so třěšny zwjazk za decentralne zaměstnjenje požadarjow azyla a přeje sej wot wšitkich wobydlerjow kaž tež komunalnych politikarjow wotewrjenosć a zo bychu nachwilnych abo nowych sobuwobydlerjow bjez předsudkow witali. Wot krajneje a zwjazkoweje politiki pak wočakuje Domowina jasne praktiske signale za hodźace so koncepty integracije mjez druhim we wobłukomaj rěč a dźěłowe wiki.

Ze serbskim princowskim porom

póndźela, 16. nowembera 2015 spisane wot:

Kóžde lěto znowa je wulke potajnstwo, štó drje budźe nowy princ Serbskopazličanskeho karnewaloweho towarstwa. Po wšěm zdaću jenož dwajo wo tym wěstaj. Tuž bě napjatosć sobotu wulka, jako noweho princa předstajichu.

Njebjelčicy (HS/SN). Serbskopazličanske karnewalowe towarstwo ma znowa serbski princowski por. Na zarjadowanju sobotu w Njebjelčanskej „Bjesadźe“ předstajichu Maćija Cyža z Wěteńcy jako noweho princa. Hromadźe z mandźelskej Hertu Delanowej naslědujetaj wonaj Andreasa III. z Młónčikowych łukow a jeho princesnu Dianu I. Jako Maćij II. z Wěteńčaniskeje powjedźe nowy princ karnewalowe towarstwo po 46. sezonje.

Njewučerpany potencial wužiwać

pjatk, 13. nowembera 2015 spisane wot:

Budyski wyši měšćanosta Alexander Ahrens (njestronjan) porěči we wobłuku počesćenja Jana Arnošta Smolerja. To je wón je wčera na posedźenju Budyskeho župneho předsydstwa přilubił.

Budyšin (kl/SN). Přeprošenje na wuradźowanje z předsydstwom Budyskeje župy „Jan Arnošt Smoler“ staj Budyskaj wyši měšćanosta Alexander Ahrens a měšćanosta za hospodarstwo, kubłanje a socialne dr. Robert Böhmer (njestronjanaj) wčera do Serbskeho domu sćěhowałoj. Županka Jana Pětrowa skedźbni na to, zo měł kóždy sobudźěłaćer města dwurěčnosć wot spočatka wobkedźbować, hdyž projekty přihotuje a přewjeduje.

Přitomni rozjimachu wopomnjenske zarjadowanje na česć 200. narodnin Jana Arnošta Smolerja. Jako nošerka jeho mjena wuhotuje Budyska župa 3. měrca 2016 počesćenje při Smolerjowym pomniku na Lubijskej dróze w Budyšinje. Kulturnje wobrubić budźe zarjadowanje 1. serbska kulturna brigada. Alexander Ahrens přilubi na zarjadowanju porěčeć.

Zhromadny list reformy dla

pjatk, 13. nowembera 2015 spisane wot:

Choćebuz (HA/SN). Rada za serbske naležnosće Braniborskeje a Domowina chcetej nětko aktiwnje zapřimnyć do di­skusije wo předwidźanej strukturnej a wokrjesnej reformje w Kraju Braniborskej. Wobě instancy pósćeletej w přichodnych dnjach do Podstupima wotpowědny list braniborskemu ministrej za nutřkowne naležnosće Karlej-Heinzej Schröterej (SPD). Předsydstwo župy Delnja Łužica­ je so na swojim wčerawšim wu­radźowanju w Choćebuzu ze spisom zaběrało.

Hotuja so na 500. róčnicu reformacije

štwórtk, 12. nowembera 2015 spisane wot:

Za dwě lěće swjećimy 500. róčnicu reformacije. Martin Luther bě ju z wozjewjenjom 95 tezow přećiwo njedostatkam w tehdyšej cyrkwi 31. oktobra 1517 we Wittenbergu zahajił. Jubilej wuznamneho historiskeho podawka je tež za Serbow wažna naležnosć. Sćěhi žadanja reformatora za Božu słužbu w maćernej rěči běchu, zo je naš lud swoje pismowstwo dóstał, ječitać a pisać nawuknył. Ewangelscy Serbja su tuž hižo w přihotach reformaciskeho jubileja na swojim lětušim cyrkwinskim dnju w Bukecach, na farje w Slepom a na namši 31. oktobra w Janšojcach Lutherowe lipy sadźeli. Štom za reformatora su w septembru tež wobdźělnicy tradicionalneje wuprawy Serbskeho busa we Wittenbergu sadźili.

Stejišćo k regio- nalnemu planej wobzamknjene

štwórtk, 05. nowembera 2015 spisane wot:

Wojerecy (SN/JaW). Prezidij Domowiny je na swojim wčerawšim posedźenju we Wojerecach přichodne wuradźowanje zwjazkoweho předsydstwa 21. nowembra w Budyšinje přihotował. Wo tym informowaše předsyda třěšneho zwjazka Dawid Statnik na naprašowanje našeho wječornika.

Smolerjowe lěto jedne z ćežišćow

štwórtk, 05. nowembera 2015 spisane wot:

Budyšin (mkc/SN). Předsydstwo Maćicy Serbskeje dojedna so na swojim posedźenju wčera w Budyšinje na přihoty a wotběh zarjadowanja, kotrež wěnuje 3. měrca 1816 we Łuću rodźenemu sobuzało­žićelej Janej Arnoštej Smolerjej.

Serbske wědomostne towarstwo přihotuje k dwustotym narodninam wótčinca swjedźensku akademiju. Wona wotměje so sobotu, 5. měrca 2016, w Budy­šinje a rozpřestrěwa so na tři městna: Dopołdnja budźe spominanje při Smolerjowym rowje na Hrodźišku z narěču předsydy Maćicy, superintendenta Jana Malinka, a z kładźenjom kwětkow. Na žurli Serbskeho muzeja přepodadźa na to Maćičnej myće Michała Hórnika a Bogumiła Šwjele. Přizamknjetej so Jana Arnošta Smolerja počesćacej přednoškaj. Akademija skónči so z přijećom w hosćencu „Burghof“. Tam poskići so tež składnosć k swjedźenskim postrowam hosći.

Samsny dźeń popołdnju změja Maćicarjo swoju hłownu a wólbnu zhromadźiznu.

nawěšk

nowostki LND