Wona je stajnje zwólniwa a dowěrjene nadawki spušćomnje spjelnja. Rěč je wo Mari Ošikowej z Pančic-Kukowa. Minjeny měsac su ju z Čestnym znamješkom Domowiny wuznamjenili.

Wot lěta 2007 dźěła Marja Ošikowa w předsydstwje Domowinskeje skupiny Pančicy-Kukow. „Předewšěm wot 2012 do 2016, jako běše skupina bjez předsydy abo předsydki, bě wona jedna z najaktiwnišich a zdobom sylny stołp skupiny“, rěka w hódnoćenju za počesćenje. Nimale lětdźesatk zamołwješe a organizowaše wona dźiwadłowe wopyty. Hišće dźensa jězdźa Pančičansko-Kukowscy Domowinjenjo na předstajenja do Němsko-Serbskeho ludoweho dźiwadła do Budyšina, štož je předewšěm jeje zasłužba.