Hižo njeličomne lěta so wón za serbstwo angažuje a skutkowanje serbskich gremijow kritisce přewodźa. Rěč je wo Torstenu Maku. Jemu spožči předsyda Domowiny Dawid Statnik minjeny pjatk Čestne znamješko za wosebite wukony při zwoprawdźenju programa Domowiny. K serbskej rěči je Choćebužan skerje připadnje přišoł, rěka w lawdaciji k spožčenju myta. W šuli chcyše w mecklenburgskim měsće Ludwigslust rodźeny něšto wosebiteho předstajić. A „njedźiwajo na argumenty staršeju je so za serbšćinu rozsudźił. Hač do dźensnišeho delnjoserbšćina a serbska kultura jeho žiwjenje wobwliwujetej.“

Maturu złožił je dźensa 52lětny Mak na Choćebuskej rozšěrjenej wyšej šuli a poda so do Lipska na studij wučerstwa delnjoserbšćiny a němčiny. Tam nawjaza krute styki k hornjoserbskim studentam, jako bě w Sorabiji kaž tež w studentskich wuběrkach uniwersity aktiwny.