Nawjazujo na tuchwilu wotměwacy so Interkulturny tydźeń a składnostnje 210. posmjertnin serbskeho molerja Hendricha Božidara Wjele (1778–1805) zarjadowa Muzej Budyšin kabinetnu wustajeńcu za swój čas w ryzy serbskej wsy Dołhej Boršći rodźeneho molerja předromantiskeje doby.
Nahladnu ličbu serbskich a němskich wopytowarjow móžeše nawoda muzeja dr. Jürgen Vollbrecht minjenu sobotu witać. Nowy měšćanosta za hospodarstwo a financy města Budyšina dr. Robert Böhmer njepokaza pak jenož na wuměłski wuznam přezměru talentowaneho syna fararja Jana Wjele. „Wuměłcy widźa hižo něštožkuli dočasa, štož druzy dawno hišće njewidźa“, wón zwurazni, rozšěrjejo tak zaćišć wo bohužel hižo ze 26 lětami zemrěteho wobhnadźeneho serbskeho wuměłca z takrjec profetiskim widom. Wjela běše so na ekspediciji carja Aleksandra I. w Kawkazu jako moler krajiny ze zapřijećom cyrkwjow, klóštrow a hrodow tohorunja złožował na armensku kulturu jako předwidźenje pozdźišich žałostnych pogromow na tymle ludźe.