Běrny w srjedźišću
Wojerecy. Z mnohotnosću běrnow a móžnosćemi jich wužiwanja zaběra so zarjadowanje za seniorow jutře, štwórtk, wot 10 do 13 hodź. na Wojerowskej dźěćacej a młodźinskej farmje. Tam informuja wo tym, za čo trjebamy rozdźělne družiny běrnow, předstajeja nowše a starše družiny a přeradźa recepty, po kotrychž zhromadnje warja.
Nowa twórba zaklinči
Budyšin. Koncert z nowej hudźbu pod hesłom „invokacije – Nowa hudźba za pozawnu a pišćele“ wotměje so sobotu, 10. oktobra, w 17 hodź. w Budyskej Mariji Marćinej cyrkwi. Mjez druhim tam Jana Cyžowu kompoziciju „Pola Boha jeno so pokojej, moja duša, dokelž wot njeho mam, čehož so nadźijam“ (psalm 62,6) prapremjernje předstaja.
Čmjeła Hana přileći
Hory. Ze swojej aktualnej inscenaciju „Čmjeła Hana namaka přećela“ je Němsko-Serbske ludowe dźiwadło přichodne dny w dźěćacych dnjowych přebywanišćach po puću. Pjatk, 9. oktobra, přileći Čmjeła Hana w 10 hodź. do Horjanskeje pěstowarnje „Lutki“, wutoru, 13. oktobra, dožiwja ju wot 9.30 hodź. we Wotrowskej pěstowarni „Dźěćacy raj“ a štwórtk, 15. oktobra, w 9.30 a w 11 hodź. w Ralbičanskej pěstowarni „Dr. Jurij Młynk“.