Serbscy putnicy so ze swětoweho zetkanja młodźiny nawróćili
Krakow (SN/MkWj). Z wulkimi zaćišćemi su so serbscy putnicy swětoweho zetkanja młodźiny z bamžom Franciskusom wčera wječor z Krakowa nawróćili. Něhdźe 70 serbskich młododostnych bě so tydźenja na puć nastajiło. Na wjeršk zetkanja je so kónc tydźenja dalša skupina putnikow do druheho najwjetšeho města Pólskeje podała. Organizatoriske přihoty měještaj młodźinska referentka serbskeho dušepastyrstwa Leńka Langec a farar Gabriš Nawka na starosći. Bože mšě sobu swjećił je tež serbski diakon Florian Mróz.
Gabrišej Nawce běchu zetkanja z bamžom Franciskusom „wusahowace dožiwjenje, runje tak tež jeho dorazne poselstwa, kotrež su wšitkich narěčeli“. Tole rjekny Gabriš Nawka na naprašowanje Serbskich Nowin. Přenocowali su młodźi putnicy w swójbach we wjacorych wjeskach njedaloko Krakowa, štož bě tohorunja hnujace dožiwjenje.