Wuměłcy SLA 60. raz ptačokwasny program předstajili
Hochoza (dku/SN). Składnostnje woblubowaneho nałožka ptačeho kwasa w Hornjej, ptaškoweje swajźby w srjedźnej a zapusta w Delnjej Łužicy prezentuje Serbski ludowy ansambl tež lětsa wotměnjawy program, zhladujo z předstajenjom „Dejmantne a hinaše ptački“ na 60lětny jubilej. Po premjerje minjeny pjatk w Choćebuskim Delnjoserbskim gymnaziju zasta SLA kónc tydźenja tež w Hochozy a Nowej Niwje.
Jurij Šiman, dźiwadźelnik Budyskeho Němsko-Serbskeho ludoweho dźiwadła, přewodźeše jako braška na šarmantne wašnje po programje z dohromady 23 jednotliwymi přinoškami. Žortne ideje tu a tam při rejwanskich scenach, satiriske skeče kaž tež pointowane přispomnjenja braški přinošowachu k dobrej naledźe přihladowarjow. Hochožanski publikum je so smějkotał runje tak kaž wutrobnje a wótře so smjał.
Orchester pod hudźbnym nawodom Andreasa Pabsta wječor zahaji, a pomału pjelnješe so jewišćo z rejwarjemi a spěwarjemi ansambla, kotřiž hižo w swojej pisanej drasće žiwjensku radosć wuprudźachu.
