Předpředań za lětuše Budyske lětnje dźiwadło „Olsenowa cwólba wupućuje“ zahaji so 8. apryla w 11 hodź. w Budyskim NSLDź. Za šěsć tydźenjow trajacy spektakl pod hołym njebjom na Hrodźe stara so dźiwadło tónraz wo wjace městnow za přihladowarjow.

Budyšin (SN/CoR). Hišće so předpředań za 22. Budyske lětnje dźiwadło započała njeje, naprašowanjow pak je Němsko-Serbske ludowe dźiwadło hižo tójšto měło. „Hačrunjež bychmy hižo móhli, žane zastupne lisćiki do oficialneho starta předpředanje 8. apryla njepředawamy“, rozłoži medijowa rěčnica NSLDź Gabriele Suschke na wutornej nowinarskej konferency.