Duchowna twórba „Serbske jutry“ w Drježdźanach a Budyšinje zaklinčał

Drježdźany/Budyšin (cry/SN/CoR). Hižo w zwisku z premjeru 2013 bě wotpohlad Towarstwa Cyrila a Metoda, oratorij „Serbske jutry“ tež tam předstajić, hdźež je zbóžny Alojs Andricki skutkował. Minjenu sobotu bě tomu tak daloko, a w Drježdźanskej katedrali (Dwórskej cyrkwi) su duchownu twórbu komponista Jana Cyža a libretistki Chrysty Meškankoweje předstajili.

Situacija před cyrkwju bě spodźiwna: twarske płoty, wobjězdka a k tomu hišće demonstracija hibanja Thügida. Štóž chcyše do cyrkwje, měješe so tuž do spěcha. Mnozy to běchu, snano wjace hač kažerjo wonka. A wottam je so na to lědma zwuk nutř do swjateje hale zadobył. Nutrnosć njebu mylena.