Žonow, kotrež so za motorske horja, je tež w Serbach dźeń a wjace. Jedna z nich je samo swój hobby k powołanju sčiniła: Andrea Thielec. Mnohim je wona w Serbach znata jako něhdyša čłonka młodźinskeje redakcije Serbskeho rozhłosa. Rodźena Šunowčanka bydli mjeztym dźesać lět w Mnichowje a dźěła tam w marketingu za wulku bayersku awtomobilowu firmu. Wona zamołwja móhłrjec dožiwjenski marketing po cyłej Němskej. Zajim na spěšnych mašinach je so pola njeje poměrnje zahe zbudźił. Běchu to spočatnje wosebje dožiwjenja motocrossa w Jaworje. Tak prawje započała za motorske horić pak je so z 18 lětami, jako złoži jězbnu dowolnosć za awto a motorske. W lětach po tym je z motorskim na dowolu była, mjez druhim w Italskej, Chorwatskej a samo w afriskim Marokku. Wot lětušeho chce so Andrea Thielec hišće intensiwnišo do aktiwneho motorsporta zanurić, kaž je Clemensej Šmitej powědała.
Wšojedne hač w enduroklasy abo w motocrossu, Andrea Thielec, Wy sće so w najwšelakorišich motorskich disciplinach hižo wuspytała. Mjeztym pak najradšo po motorskich čarach na čas smaliće!