Sportowa jednotka Chrósćicy swjeći lětsa štyrcetu róčnicu wobstaća
Nowa doba je 18. meje 1985 w swojej přiłoze Předźenaku wo koparskim dorosće Sportoweje jednotki Chrósćicy 1981 z.t. rozprawjała. Jedne lěto po załoženju dorosta bě jasne, zo njebě spočatk runjewon lochki, dokelž hrajachu šulerjo wot 7. šulskeho lětnika hižo wěsty čas pod nawodom Bena Młynka za Traktor Ralbicy-Hórki. Tak móžachu w Chrósćicach jenož mustwo dźěći a hólcow wot 2. do 6. lětnika za dypkowe hry zestajeć. Najmjeńšich trenowaše Jan Rjelka, wjetšich Měrćin Škoda. Někajkich wosebitych wukonow njemóžachu so najprjedy raz nadźijeć, dokelž so tón abo tamny dobry kopar druhim jednotkam přizamkny. Haj, a k tomu dyrbjachu domjace hry nowotwara sportnišća dla hač do lěća 1986 do Hórkow přepołožić.
Prěnje swětleško na horiconće