Sokoł Ralbicy/Hórki – SC Großröhrsdorf 3:0 (0:0)
Zestawa domjacych: Schöne – Šewc, Schultz, Wałda, T. Bejma (68. Nuk), Rachel (71. Matka), Rawš, B. Bejma, D. Gloxyn, Janca (60. Bejmak/85. Ch. Gloxyn), Šiman
Po swobodnym hrajnym dnju witachu Sokoljo wčera, njedźelu, robustne mustwo z Großröhrsdorfa w Ralbičanskim Stadionje přećelstwa. Dotal běchu partije stajnje jara bojowniske, tónkróć pak běchu Sokoljo jasny faworit, štož tež wot spočatka pokazachu. Hižo po někotrych sekundach móhł Paul Rachel nawjedowanje třělić, před wrotami pak jemu čuwy zaprajichu. Domjacy hru dale kontrolowachu, prawe puće k dalšim móžnosćam pak wulce njenamakachu, dokelž hosćo z wosom mužemi chětro hłuboko stejachu. Bjezmała by so jim samo po konteru nawjedowanje poradźiło, bul wrota wo centimetry misny. Dwě dalšej wulkej šansy na boku Ralbičanow tohorunja do wrotow njedźěštej. W kabinje trenar Chrystof Gloxyn swojim chowancam rjekny, zo dyrbja dale sćerpni wostać.