Bičwolejbulowy turněr so w měsće wikow Lipsku wotměł
26. požnjenca wotmě so w Lipsku posledni turněr lětušeje LE-bičtury. Tónle turněr mjenuje so „L.E.-beach meets Sachsen-beach“ a běše minjene lěta přeco wulki podawk na Augustusowym naměsće wosrjedź města. Lětsa dyrbjachu organizatorojo falowaceje planowanskeje wěstoty a korony dla wubědźowanje přesunyć a na areal při tak mjenowanej boulderowej hali „Bloc No Limit“ přepołožić. Tak je bohužel jenož wosom mustwow z cyłeje Sakskeje připrajiło. To poprawom žana wosebita powěsć njeje, ale zo bě mjez tymi 16 hrajerjemi šěsć Serbow, je pak wulkotna wěc. Tući šesćo z prěnjeho mustwa Viktorije Worklecy (hlej foto) su poprawom nimale jedna startowa šestka, jeničce přistajer pódla njebě. Ale w pěsku su tak a tak wšě kwality wolejbulista we wobaranju, přihraću a nadběhu prašane.