1.FC Lok Lipsk –
FC Energija Choćebuz 1:3 (0:2)
Zestawa hosći: Stahl – Hasse, Hildebrandt, Eisenhuth, Borgmann, Kujović (90.+3. Wagner), Erlbeck, Proničew (89. Mäder), Badu (89. Geisler), Engelhardt (90.+3 Harz), Zografakis (78. Schulz)
Cyle suwerena wopokaza so FC Energija při nachwatanskej hrě w Lipsku. Z wulkim běhanskim pensumom su Łužičenjo 1. FC Lok daloko do jich połojcy stłóčili a zas a zaso rjane kombinacije pokazali. Tak nastachu wšitke wrota hosći po wulkotnych zhromadnych hrajnych akcijach. 0:1 (26.) třěli Maksimilian Proničew, 0:2 (43.) Nikos Zografakis a 1:3 (77.) wospjet Proničew.
Lipšćanam poradźichu so srjedź druheho połčasa čestne wrota. Jonas Hildebrandt bě bul njezbožownje pozdźišemu třělcej Djamalej Zianje přihrał (66.). Na hrajnym koncepće FC Energije pak so ničo njezměni. Wšitcy koparjo běchu zwólniwi rumy wobsadźeć. Młody Arnel Kujović w srjedźnym polu a Erik Engelhardt jako rozdźěler bulow w nadběhu pokazaštaj jara dobry wukon. Muž dnja pak bě Proničew ze swojimi wrotami čisło wosom a dźewjeć. Nimo toho bě wón tajke něšto kaž křižnišćo w ofensiwnym srjedźnym polu w harmonisce agěrowacym mustwje.