Dźiwadźelnik Marian Bulank w róli Reichsbürgera
Hłowny a jenički akter němskeje inscenacije „Der Reichsbürger“, kotrehož Serb Marian Bulank tuchwilu w NSLDź předstaja, so hnydom spočatnje měri na přihladowarstwo: Wilhelm S., wuwučeny elektrikar a mjeztym dwě lěće po puću jako přednošowar, praša so přećelnje publikum, hač so swobodny čuje, hač je w swobodźe žiwy. Wuznawacy Reichsbürger a sebjezarjadnik (Selbstverwalter) na łoskoćiwe a poprawom starodawne prašenje sam filozofisce wotmołwi: Wšitcy wěrja, zo su swobodni, tola we woprawdźitosći to njejsu.