Zhorjelc (JB/SN). Hornjołužiska towaršnosć wědomosćow je swoje nalětnje zhromadźenstwo minjeny pjatk a sobotu w Zhorjelcu wotměło. Na nim spožčichu młodemu wědomostnikej Janej Michaelej Goldbergej z uniwersity Halle-Wittenberg Myto Hermanna Knotheho za jeho slědźenja wo wliwje konfesije na wuwiće swójbow w kónčinje Varnsdorf a Wodowe Hendrichecy. Lawreat tež na tutu temu přednošowaše. Dalše přednoški so tohorunja z hornjołužiskimi temami zaběrachu. Wěsty wjeršk dweju dnjow bě spožčenje čestneho čłonstwa prof. dr. Lence Bobkovi, kotraž hižo wjele lětdźesatkow k čěskim stawiznam wuči a slědźi, wosebje wo stykach k Hornjej Łužicy. Stefan Wollman ze Šěrachowa přepoda někotre akty swojeho njeboh dźěda archiwam towarstwa, kotrež bě jeho předchadnik hižo krótko do smjerće poslednjeho prezidenta towarstwa po wójnje, Bena von Nostitz-Wallwitz (1865–1955), dóstał a wobchował. Akty su wosebje tohodla zajimawe, dokelž wobsahuja wójnski a powójnski čas a prócowanja, towarstwo tež w Sowjetskim wobsadźenskim pasmje dale wjesć.