Budyšin (SN/bn). Dołho trajacy přiklesk, někotrežkuli „brawo!“ a bjezposrědnje „yeah!“ kaž tež tójšto chwalacych słowow po zarjadowanju – zazběh noweho rjadu sinfoniskich koncertow Serbskeho ludoweho ansambla je so hudźbnikam pod nawodom Georgiosa Balatsinosa hladajo na wothłós publikuma bjezdwěla zešlachćił. Přiwšěm so tón abo tamny wopytowar nad snadnym zajimom dźiwaše, wšako zličichu předwčerawšim na žurli SLA jenož něhdźe 30 hosći.

Koncept rjadu je z jónkróćnym koncertom „přirunować rozdźělne narodne hudźbne rěče na zakładźe třoch kompozicijow, kotrež su do wěsteje měry runočasnje nastali“, kaž w programowym zešiwku rěka. Zdobom ma so „tworjenje serbskich komponistow w europskim konteksće předstajić“, bě intendant SLA Tomas Kreibich-Nawka zahajiwši aktualnu hrajnu dobu připowědźił. Wotpowědnje wopřijimaše zahajacy program serbski, us-ameriski a grjekski přinošk.