Jurij Łušćanski a Gregor Kliem počesćenaj

Smochćicy (SN/mb). Hdyž je Gregorej Kliemej wospjet nahle słuch popušćił, běše jasne: Z hudźenjom w swojej rockowej skupinje Die Folksamen je nimo. Tehdyši student hudźbnych wědomosćow z ćežišćom etnologije hudźby njebě sej ani wěsty, hač budźe hudźba scyła hišće jeho přichod. Tola w Ljubljanje, hdźež Serb z Dešna semester studija přebywaše, namaka nowy započatk. Na mosće stejo dožiwi, kak ludźo k ludowej hudźbje koło teptaja. A tak je so serbskim ludowym rejam přiwobroćił a skupinu „Serbska reja“ sobu załožił. Sobotu je jemu społnomócnjena zwjazkoweho knježerstwa za wusydlencow a narodne mjeńšiny Natalie Pawlik (SPD) w cyrkwi Smochčanskeho kubłanišća swjateho Bena Spěchowanske myto Ćišinskeho přepodała - za kreatiwne, zahorjace kulturne dźěło, kotrež wšě generacije zwjazuje.

Lawdator Maksimilian Hasacki je wuzběhnył, zo je hudźba Kliemej, dźensa je wón hudźbny redaktor serbskeho radija RBB, kluč za sposrědkowanje serbskeho ducha a rěče. Swojimaj dźěsćomaj wón swoju serbsku maćeršćinu dale dawa.