Drježdźanske statne dźiwadło spěchuje kulturu we wsy – tež w Njebjelčicach
Drježdźany/Njebjelčicy (SN/MiR). Drježdźanske statne činohrajne dźiwadło angažuje so za to, zo by so kultura na wsy zakótwiła. Za to maja financielne srědki za swójski projekt X-Dörfer. Marlies Richter, předsydka towarstwa Sowutu, je informaciju wo projekće w syći namakała. „Sym so cyle jednorje za našu ideju, natwarić w Njebjelčicach kulturnu kofejownju, požadała. Při tym bě mi napadnyło, zo spěchuje Drježdźanske kulturne zarjadnišćo jenož projekty we wobkruhu 60 kilometrow wokoło sakskeje stolicy“, wona na wotewrjenju kofejownje zašłu sobotu rjekny.