Namjet „Łužiske naslědne krajiny hórnistwa“ přepadnył

Berlin/Choćebuz (SN/at). „Linije serbskich tradicijow so na wuswědčenjach a wopomjatnych městnach zwuraznjeja, kotrež přesydlenje wsow a zhromadźenstwow wujasnjeja. Čehodla pak su jeničcy Serbja nošerki a nošerjo z krajinu brunicowych jamow zwjazanych tradiciskich linijow, to sej wujasnić njemóžemy.“ To piše fachowa přirada w kónčnej rozprawje za Konferencu kulturnych ministrow, kotraž je minjenu póndźelu wo přiwzaću nowych městnosćow z Němskeje do krajneje lisćiny kulturneho namrěwstwa UNESCO rozrudźiła. Na namjeće „Łužiske naslědne krajiny hórnistwa“ za swětowe herbstwo měli akterojo dale dźěłać, jón wudospołnjeć a zrawić dać. Wědomostnicy na přikład paruja w požadanskich podłožkach spokojacu definiciju hódnotow a hranicow, zo bychu zakład za přirunowacu analyzu měli.