1985 přińdźeš Ty třeći raz na Budyske dźiwadło. Ja prěni raz. Tak so zeznachmoj. A ja běch chětro wot Tebje jimany. Sy, nimale połstalětny, tabula rasa sčinił, běše ze wšěch organizacijow wustupił, SED, DOMOWINA, Zwjazk serbskich wuměłcow atd. Samo Twoje mandźelstwo so rozwjedźe. Tajku bjezwuměnitu konsekwencu njeběch hač dotal zetkał. Dźiwach so a někak běch tež połny wobdźiwanja – to w NDR, hdźež wšitcy pozdatnje wěstotu pytachu!

Ale tajki ty běše a sy tež wostał: njewobličomny, konsekwentny a połny překwapjenkow.

Tohorunja 1985 přewza w Sowjetskim zwjazku Gorbačow wjesło a naškara z tym cyły wuchodny blok. A Budyske dźiwadło měješe sensacionalny hrajny plan. Na to sy ty jenož čakał, to bě za tebje prawa pomazka. Dopominam so, kak sy so ze swojej cyłej energiju, takrjec wuswobodźeny wot wšeho balasta, do hrow Šatrowa, Aitmatowa a Plenzdorfa dał. To móžach so jenož dźiwać a wuknyć. W „Rewizorje“ Jürgena Großa hraješe Ty wumustrowaneho knježerstwoweho šofera Patscha a ja titulnu figuru. To bě ći wjeselo! Ludźo ćěrjachu k nam do dźiwadła.