Budyšin (SN/bn). Němsko-Serbske ludowe dźiwadło „zhladuje na wuspěšne dźiwadłowe lěto 2023“. Dohromady zličichu w minjenych dwanaće měsacach na cyłkownje 784 zarjadowanjach 128 304 wopytowarkow a wopytowarjow. To je něhdźe 20 000 wjace hač w lěće 2022, kaž w zdźělence institucije medijam rěka.
„Bě to dobre dźiwadłowe lěto. Móžachmy ličby wopytowarjow jasnje stopnjować, po tendency přibližujemy so krok po kroku niwowej do pandemije. Přihladowarjo maja wočiwidnje zaso lóšt na dźiwadło“, podšmórnje intendant NSLDź Lutz Hillmann. Dale wón wuzběhnje: „Aktualna hrajna doba započa so ze swjatočnosćemi składnostnje narodnin a jubilejow. Dźiwadło na hrodźe wobsteji mjeztym 20 lět, loni w decembru swjećachmy z inscenaciju ‚Schierzens Hanka‘ załoženje Serbskeho ludoweho dźiwadła před 75 lětami a poradźenu fuziju z Budyskim měšćanskim dźiwadłom k dźensnišemu NSLDź před 60 lětami. Za lětsa je so nam poradźiło, we wobłuku projekta ‚Phonē – Mjeńšinowym rěčam hłós dać‘ mjezynarodny festiwal z europskimi mjeńšinowymi dźiwadłami planować, kotrehož wuslědki chcemy nalěto na našich jewišćach předstajić.“
