Po prapremjerje prěnjeje produkcije filmoweho labela Lusatiafilm „Ein Feuerwerk für die Kleinstadt“ w Grodku předstajichu pask wčera w Zhorjelcu prěni raz w Sakskej. Wot lětušeho septembra chcedźa film regularnje w kinach po cyłej Němskej pokazać.
Zhorjelc (SN/bn). „Wšojedne, kelko filmow sy hižo zwoprawdźił – kóžda premjera je stajnje znowa něšto wosebite“, powita režiser paska Erik Šyško něhdźe 90 hosći w Zhorjelskim Filmowym palasće. Produkcija je po jeho słowach „wuslědk dwě lěće trajaceho, intensiwneho procesa“ a „prěni krok, Łužicu jako filmowu kónčinu etablěrować. Wšako so naš region na tymle polu lědma jewi. Tole změnić je z hłownym nadawkom labela Lusatiafilm.“