Berlin (dpa/SN). Znowa wuzwoleny zwjazkowy prezident Frank-Walter Steinmeier widźi dale dobre šansy, konflikt mjez Ruskej a Ukrainu diplomatisce rozrisać. Rusojo kaž tež Ukrainjenjo maja wulki zajim na tym wuspěchi docpěć, rjekny wón wčera w telewiziji ARD. „Dołhož je zajim na woběmaj bokomaj widźomny, móže tež Němska k tomu přinošować, zo najhóršemu zadźěwamy.“ Steinmeier je sej wěsty, zo zwjazkowe knježerstwo wšitko za to čini.
W znamjenju dramatiskeho přiwótřenja krizy Ukrainy dla je so zwjazkowy kancler Olaf Scholz (SPD) dźensa do tamnišeje stolicy Kijewa podał. Tam wočakowaše jeho prezident Wolodymyr Zelenskyj. Ryzy formalnje je to nastupny wopyt Scholza na Ukrainje. Wopyt je pak zasćinjeny wot přiběracych napjatosćow mjez Ruskej a Ukrainu a wot warnowanjow ze stron USA před móžnym wojerskim nadpadom Ruskeje. Jutře chce so Scholz w Moskwje z ruskim prezidentom Wladimirom Putinom zetkać.
Waršawa (dpa/SN). Po warnowanju knježerstwa USA před móžnym ruskim nadpadom wusměrja so Pólska na přiwzaće ćěkancow z Ukrainy. Hladajo na situaciju w susodnym kraju přihotuja wšelke scenarije, pisaše pólski minister za nutřkowne naležnosće Mariusz Kamiński wčera w socialnej syći Twitter. „K tomu słušeja tež přihoty ze šefami zarjadnistwow, kotrež dyrbja na móžny přichad škit pytacych ćěkancow z Ukrainy reagować“, wón wuzběhny.
Staćenjo z Ukrainy smědźa tuchwilu jeno z turistiskich přičin 90 dnjow bjez wizuma do Pólskeje a Schengenskeho ruma přichadźeć. Nimo toho dźěła w Pólskej tež wjele Ukrainjanow. Po informacijach pólskeho wukrajneho zarjada ma 300 000 ludźi z Ukrainy přebywansku dowolnosć, kotraž je na tři lěta wobmjezowana. Ličba přebywacych bjez dowolnosće pak je po wšěm zdaću wo wjele wjetša.
Z njewšědnym wubědźowanjom pytaja w delnjosakskim Emdenje za wobsedźerjemi šotrowanych zahrodow, zo bychu jim přirodźe tyjace přerjadowanje poskićili. Hač do měrca móža so wobsedźerjo tajkich zahrodow z fotom přizjewić. Komisija dźesać z nich wuzwoli. W mjezsobnej dorěči nastanje potom na dobro překasancow a ptačkow dźesać nowych zahrodow, kotrež pak hodźa so na tamnym boku jednorje wobhospodarić.
Ze swojim luksusowym awtom do Neckara zajěł je muž w badensko-württembergskim Gundelsheimje, po tym zo bě w přistawje čołmikow wustupić był. Jako chcyše dale jěć, zajědźe wóz małeje njeleposće dla do rěki. Awto płuwaše hišće wěsty čas na wodźe, doniž so dospołnje njepodnuri a tak 100 000 eurow. 37lětny móžeše so sam wuswobodźić a pobrjóh docpěć, poćerpje pak šok.
Karlsruhe (dpa/SN). Winowatostne šćěpjenje za přistajenych strowotnistwa móže so z prawniskeho wida kaž planowane přesadźić. Zwjazkowe wustawowe sudnistwo w Karlsruhe je dźensa w pospěšenym jednanju skóržbu přećiwo šćěpjenju wotpokazało. Skoržili běchu nawodźa wjacorych chorownjow. Sudnicy běchu měnjenja, zo je škit pacientow w chorownjach wažniši hač wobmyslenja dla móžnych negatiwnych strowotniskich wuskutkow za personal.
Warnuje před wójnskej retoriku
Berlin (dpa/SN). W konflikće mjez Ukrainu a Ruskej je předsyda AfD Tino Chrupalla před „wójnskej retoriku“ warnował. W rańšim magacinje ZDF wón diplomatiske prócowanja wo wotputanje witaše, zdobom pak namołwješe, přestać „z tesakami šćerkać“, a to na woběmaj bokomaj. Chrupalla dodawanje bróni Ukrainje wotpokaza. Wo koncentraciji swojich wójskow při ukrainskej mjezy móže Ruska po jeho słowach sama rozsudźić. Předsyda AfD so za to wupraji, zo měła so Ukraina z neutralnym krajom stać.
Namjet za šćěpjenje
Berlin (dpa/SN). Wjetšina ludźi w Němskej starosća so po nowym woprašowanju financnych poćežowanjow wysokich płaćiznow za energiju dla. 62 procentow woprašanych so boji, zo so energijowa kriza tež přichodnje negatiwnje na jich pjenježnu situaciju wuskutkuje, kaž woprašowanje instituta Kantar w nadawku zwjazkoweje centrale přetrjebarjow wunjese. 36 procentow njewidźi žane wosobinske wuskutki.
Frakcija CDU/CSU w zwjazkowym sejmje planuje požadanje za miliardy eurow wopřijacy pomocny program na dobro wobydlerjow. We wotpowědnym naćisku, kiž powěsćerni dpa předleži, rěka, zo dyrbjało zwjazkowe knježerstwo „skónčnje jednać“, zo by poćežowanje ludźi inflacije a wysokich płaćiznow energije dla dołhodobnje znižiło.