To a tamne (01.04.22)
Eksotiska žaba je wjacore tysac kilometrow dołhu jězbu z Etiopiskeje do Wulkeje Britaniskeje derje přetrała – w tiće čerstweje mjetlički (Minze). Wikowar sadu a zeleniny je zeleno-brune blakate zwěrjo w měsće Corbridge wuhladał a organizaciju za škit zwěrjatow informował. Spočatnje ani njewědźachu, wo kotru družinu so jedna. Wočiwidne pak bě, zo dźe so jej derje a zo jej mjetlička zesłodźi.
Awto pacienta chorownje pokradnył je sobuwobydler w chorobnej stwě w braniborskim Perlebergu. Do toho bě so 77lětny muž dźiwał, zo so jeho muž w susodnym łožu stajnje zaso za awtom praša. Srjedu rano wón zwěsći, zo je so susod, runje tak kaž móšeń a awtowy kluč, zhubił. Policija je mjeztym zwěsćiła, zo je so susod z pokradnjenej chorobnej kartu do chorownje zapokazać dał. Zastojnicy nětko za mužom a awtom pytaja.
Namjetuja limit spěšnosće
Berlin (dpa/SN). Sejm městow Němskeje je zwjazkowe knježerstwo namołwjał, móžnosć wobmjezowanja spěšnosće na awtodróhach pruwować, zo móhli energiju lutować. Hłowny jednaćel Helmut Dedy rjekny powěsćerni dpa, zo ma přetorhnjenje dodawanja płuna a zemskeho wolija z Ruskeje za „realistiski scenarij“. Tuž měło so najspěšnišo hladać, hdźe móhła so přetrjeba energije znižić. Wobmjezowanje spěšnosće by hnydomny a widźomny wuskutk lutowanja měł.
Skrótša čas karanteny
Berlin (dpa/SN). Hladajo na aktualnu žołmu koronawirusa z mnohimi, ale zwjetša snadnymi infekcijemi chcedźa prawidła karanteny zjednorić a dobu domjaceje izolacije na pjeć dnjow znižić. Tole předwidźi zhromadny namjet zwjazkoweho ministerstwa za strowotnistwo a Roberta Kochoweho instituta. Koncept su mjeztym zwjazkowym krajam rozesłali. Dotal traje čas izolacije dźesać dnjow a móže so najzašo po sydom dnjach z testom skónčić.
Podlěša darmotne testowanja
Znowa su po sylnych zliwkach wjacore kónčiny Awstralskeje ...
Namołwjetaj k rozumnosći
Putin wopak informowany
Zelenskyj: Ničo konkretneho
Kijew (dpa/SN). Ukrainski prezident Wolodymyr Zelenskyj njewidźi žane konkretne wuslědki rozmołwow z Ruskej. „Haj, mamy jednanja, z kotrymiž pokročujemy. Dotal pak su to jenož słowa, ničo konkretneho“, rjekny Zelenskyj w minjenu nóc wozjewjenym widejowym poselstwje. Ruska dobrowólnje wokolinu Kijewa abo Černihiwa njewopušći, wón rjekny. Ukrainske wójsko ju k tomu nuzuje. Zdobom prezident na to pokaza, zo hotuja so ruske jednotki na nowy nadpad na Donbas. „Na to so přihotujemy.“
Ukraina a Ruska běštej so dojednałoj, zo knježi wot dźensnišeho ranja w měsće Mariupol přiměr, zo móhli ciwilisća kónčinu wopušćić. Dotal běchu pospyty tajkeho razu stajnje zaso zwrěšćili. Wobě stronje sej mjezsobu za to winu dawatej.
Knježerstwo USA je Ukrainje dalšu pjenježnu pomoc přilubiło. Prezident Joe Biden je prezidentej Zelenskemu cyłkownje 448 milionow eurow direktneje pjenježneje podpěry připowědźił. Němska pruwuje, Ukrainje dalše brónje, kaž tajke k wotwobaranju tankow, přewostajić.
Euro za płun dale akceptowany
Zwjazkowy kancler Scholz a ruski prezident Putin telefonowałoj
Moskwa/Berlin (dpa/SN). Zwjazkowy kancler Olaf Scholz (SPD) je po rozmołwje z ruskim prezidentom Wladimirom Putinom potwjerdźił, zo chce Němska ruski zemski płun, kaž w zrěčenjach dojednane, dale w eurach abo dolarach zapłaćić. „Wostanje při tym, zo dojednanje płaći“, zdźěli rěčnik knježerstwa Steffen Hebenstreit wčera w Berlinje. Putin bě Scholzej w telefonaće rozłožił, zo płaći wot 1. apryla zakoń, po kotrymž ma so ruski płun w rublach zapłaćić.
Při wšěm so za europskich zrěčenskich partnerow ničo njezměni. Přepokazanki su dale w eurach abo dolarach na rusku banku Gazprom móžne, kotraž njeje wot sankcijow potrjechena. Banka pjenjezy potom na ruble konwertěruje. Scholz bě Putina prosył, jemu tole pisomnje wobkrućić, Hebenstreit rjekny. Wo telefonat bě Putin prosył.
Krjeml bě do telefonata rozłožił, zo njesměło přestajenje přepokazankow za ruski płun na ruble k njelěpšinam za Němsku wjesć. Přestajenje na rubl njesměło „k pohubjeńšenju zrěčenskich wuměnjenjow za europskich kupcow ruskeho płuna wjesć“.
To a tamne (31.03.22)
Tysacy blešow ilegalneho alkohola je policija w Indiskej z pomocu dróhotwarskeje walcy zničiła. Alkohol w hódnoće 200 000 eurow bě policija za čas pandemiskeju lět w měsće Ahmedabad a staće Gujarat, hdźež je alkohol zakazany, sćazała. Wjacorych ludźi su zajeli. Něhdźe 200 zastojnikow zaruči, zo njeměješe zjawnosć žadyn přistup k městnu zničenja. Črjopy su zahrjebali, policija zdźěla.
Spěšniši hač wohnjowa wobora bě ćěšenk w Augsburgu. Žona měješe sylne hrona a njemóžeše nuzowemu lěkarjej durje wočinić. Tón wołaše na to wohnjowu woboru, zo by durje wotewrěła. Mjeztym pak bě so mały hólc hižo narodźił a mać móžeše wobornikam sama wočinić. Starša sotra narodźeneho bě při porodźe tohorunja pódla a połoženje „wustróžana“ wobkedźbowaše. Mać a wobě dźěsći dowjezechu do chorownje.
Sakska apeluje na zamołwitosć
Drježdźany (dpa/SN). Sakska njebudźe runja druhim zwjazkowym krajam w zwisku z nowymi naprawami koronawirusa dla epidemiske połoženje podlěšić. Město toho spušća so swobodny stat wot přichodneje njedźele na swójsku zamołwitosć wobydlerjow a na dodźerženje doporučenjow. To je ministerka za strowotnistwo Petra Köpping (SPD) wčera připowědźiła. Doporučenja poćahuja so na wužiwanje nahubnikow w zjawnje přistupnych institucijach, na dodźerženje wotstawka a na redukowanje kon- taktow.
Habeck: Lutujće płun
Berlin (dpa/SN). Zwjazkowe knježerstwo hotuje so ruskeho nadpada na Ukrainu dla na problemy při zastaranju ludźi ze zemskim płunom. Minister za hospodarstwo Robert Habeck (Zeleni) je tohodla dźensa warnowanski schodźenk nuzoweho plana „płun“ wukazał. Zastaranje z płunom je dale zaručene, wón rjekny. Z wukazanjom warnowanskeho schodźenka pak dźěła nětko krizowe mustwo. Habeck namołwja ludźi, płun lutować.
Woporaj z Ukrainy byłoj
